Алла Тагала Хезретлери Куръаны-Керимиң «Ахзап» сүресиниң 6-нҗы аятында Ресулаллах саллаллаху алейхи веселлем Серверимизиң аялларыны «Уммехатул-муьминин-мөмүнлериң энеси» хөкмүнде ыглан эдендир. Башга бир аяты җелилесинде-де Энелеримиз хакында шейле дийилйәр: «Эгер о сизи бошатса, Ребби оңа сизден хас говы, өзүни Аллаха берен, ынанан, боюн болуп, көңүлден ытагат эден, тоба эден, ыбадат эден, ораза тутан, дул ве дурмуша чыкмадык янёлдашлары берип билер». («Тахрым» сүреси: 5-аят).

   Бу аяты җелиле хем Энелеримизиң артыкмачлыкларыны билдирип, оларың хич бирини-де бошатмандыгыны гөркезйәндир.

   Ики Җаханың Гүнеши Серверимизиң о пәк аяллары-Энелеримиз аяты-керимеде беян эдилиши ялы көңүллерини Аллаха берен мөмүнлердир. Олар өмүрлерини иман угрундакы гөреш билен гечирендирлер. Җебри-җепалар, гайгы-хасратлар оларың иманларының мәкәмлигине асла зепер етирип билен дәлдир. Энелеримиз Аллаха ве Ресулына чын йүрекден табын боландырлар. Билип-билмән эден гүнәлери үчин довамлы тоба эдипдирлер. Олар бир өмри таквалык билен гиже каим, гүндиз саим, ягны гиҗелери намазлы, гүндизлери оразалы болуп яшапдырлар. Олар мухлис (ыхласлы) ве мухсин (пәк) багтыярлардырлар.

   Сөйгүли Энелеримизиң бейлеки аяллардан кәбир тапавутлы тараплары бардыр. Бейик Реббимиз Китабы Кериминде: «Эй, Пыгамбериң аяллары! Сиз хайсыдыр бир аяллар ялы дәлсиңиз» («Ахзап» сүреси: 32-аят) дийип буюряр.

  Реббимиз шу аят биле оларың мертебесини бейгелдип, тапавутлы тарапларыны ыммата дуйдурыпдыр. Бейлеки ягдайларыны-да шейле беян эдипдир:

1. Пыгамберимизиң аяллары Серверимиз арадан чыкандан соң өйленмезлер.

Мөмүн аял адамсы арадан чыкандан соң, иддет (гарашмалы) мөхлети гутарандан соң, ене-де дурмуша чыкып билерлер. Ысламың эсасы хөкүми шудыр. Сөйгүли Пыгамберимизиң аяллары болса, бу хөкүмиң дашында галандырлар. Оларың башга бир эркек кишә дурмуша чыкмаклары асла дүрс дәлдир. Чүнки Алла Тагала оларың Пыгамберимизиң аялы ве мөмүнлериң Энеси болмак мертебелериниң кыямата ченли довам этмесини арзув эдипдир. Аяты-керимеде бу хакыкат шейле билдирилйәр: «Сизиң Аллахың Ресулыны гынандырмаклыгыңыз ве өзүнден соң онуң аялларыны никаламагыңыз асла дүрс болмаз. Чүнки бу, Аллахың хузурында улы бир гүнәдир».

   «Бир зады ач-ачан этсеңиз-де, гизлесеңиз-де,, шүбхе ёк ки, Аллахың өзи хер бир зады говы билйәндир».(«Ахзап» сүреси: 53-54-аятлар)

2. Пыгамберимизиң аялларының эллерини ве йүзлерини өртмеклери-де парздыр. Ханафи ве Мәлики мезхеплерине гөрә, эл ве йүзүниң япынҗа дахылы ёкдыр. Бәлиг яшына етен гыз чаганың эли ве йүзүнден башга ерини өртмеги парздыр. Пыгамберимизиң аяллары болса, бейлеки аяллардан тапавутлылыкда эллерини хем-де йүзлерини өртмеклери парз кылыныпдыр.  

3. Энелеримизден бир зат исленсе пердәниң аңырсындан исленерди. Пыгамберимизиң аялларындан бир зат сораҗак болан ят эркек киши пердәниң аңырсындан сорамалыды. Чүнки аяты-керимде Алла Тагала шейле эмр эдипди: «Пыгамберимизиң аялларындан бир зат ислән вагтыңыз пердәниң аңырсындан исләң. Бу хем сизиң калпларыңыз хем-де оларың калплары үчин хас тәмиз чемелешмекдир». («Ахзап» сүреси: 53-аят)

4. Ягшылыкларына ве яманлыкларына ики мисли гаршылык барды. Пыгамбериң аяллары үчин бир ягшылык эденде ики эссе согап, хайсыдыр бир яманлыкларына-да ики мисли ягны ики эссе гүнә язылар. Бу Алла Тагаланың перманыдыр. Бу айратынлык Энелеримизе Куръаны-Керимде шейле билдирилйәндир:

  «Эй, Пыгамбериң аяллары! Сизден бириңиз ач-ачан хаясызлык этсе, онуң азабы ики эссе болар. Бу Аллах үчин аңсатдыр».

  «Сизден Ким Аллаха ве Ресулына ытагат эдип, дегерли иш этсе, оңа гаршылыгы ики эссе берерис. Ве оңа (җеннетде) бол рызк тайярландырыс».

   «Эй, Пыгамбериң Аяллары! Сиз хайсыдыр бир аяллар ялы дәлсиңиз. Эгер Аллахдан горкян болсаңыз, (ят эркеклериң) үнсүни чекер ялы геплешмәң: соңра  калбында хассалык болан кимсе (мынапыклар) умытда болар. Говы сөз сөзләң».

   «Өйлериңизде отурың, көне җахылыет адамлары ялы ачылып сачылмаң. Намаз кылың, зекат бериң. Аллах ве Ресулына ытагат эдиң. Эй, Әхли-Бейт! Аллах сизден диңе гүнәни гидирмек ве сизи тәмизлемек ислейәр».

  «Өйлериңизде окалан Аллахың аятларыны ве хикмети ятлаң. Шүбхесиз Аллах, хер задың ич йүзүни билендир ве хер бир затдан хабары боландыр». («Ахзап» сүреси: 30-34-аятлар).