Аллаху Тагала Хезретлерине хамду-сена, Ресулы Серверимизе ве онуң машгаласына, сахабаларына ве онуң ёлундан гиденлере салат ве салам айдарыс.

Ыслам машгаласы көки ерде, шахалары гөклере галан асырлар яшан чынарлар ялы, гүйч-кувватлы хем гиңиш бина эедир. Онуң җан дамарлары мөмүнлериң көңүллеринде довам эдйәндир.

Сөйгүли Пыгамберимизиң аяллары,  чагалары, гызлары ве гыз агтыклары бу машгаланың эсасларыны кәмиллешдирерлер. Мөмүнлер бу шерепли машгаланың бир агзасы болмага, олара лайык өмүр сүрмәге чалшарлар. Өзлерини шол машгаланың бир парчасы хасаплап, о йылдыз ынсанларың дурмушларындан, херекетлеринден, өңде гоян максатларындан нусгалык дерслери алмага гайрат эдерлер.

Шонуң үчин, Сөйгүли Пыгамберимизи, мөмүнлериң энелери болан энелеримизи ве нубуввет (пыгамберлик) бакҗасының гүллери, нур юмагы чагаларыны, гызларыны ве агтыкларыны танамак хер бир мөмүниң көңүл арзувыдыр.

Ысламың илкинҗи машгала гурамасыны эсасландыран бу нусгалык машгала бүтин ынсанъете багтыярлыгың нусгасыдыр. Оларың имандакы кувваты ве дурнуклылыгы, машгала дурмушлары, төверек-дашлары билен баглылыклары, ынсан гатнашыкларында гүлер йүзли херекетлери, җан-дилден мәхирли гатнашыклары, мерхеметли херекетлери, ынсанлара сөйги долы назар билен бакышлары, хич кими ынҗытмазлыклары, хич кими пес гөрмезликлери, ягшы гүзеран айламаклары, өз араларында бирлешип, хызмат ве сөхбет меҗлислерини кәмиллешдирмеклери, таква яшайышлары, хайыр-хасанатлары, гызыкланмаклары, сөйгүдир-хорматлары гелҗекки ымматлара аҗайып нусганы өзүнде җемлейәндир.

Ыслам эркеге-аяла, умуман хер бир ынсана гадыр гойяр. Ыслам җахылъет дөврүндәки гыз чагалара эдилен вагшычылыгы асла кабул этмез. Чүнки олары Аллахың аманады хасаплар ве хорматлар. Хат-да «Җеннет энелериң аякларының ашагындадыр» ялы сөзлер билен шереплендирер. Мекгели мүшриклериң надан, вагшыяна херекетлериниң ялңышдыгыны-да вахйың (аядың) нуры билен айдыңладар. Манысы шейле ки:

«Олардан бирине гыз бушланан вагтында йүзлери гап-гара болар.

Өзүне айдылан бушлугың эрбетлигинден яңа ковмундан гизленер.

Оны песелмек дуйгусының ичинде янында гойсунмы, ёгса-да Ере гөмсүн?

Бакыңки, берен хөкүмлери нәхили ямандыр» («Нахл» сүреси, 58-59-аят)

Ысламың илкинҗи йигитлери көп азаплар чекдилер. Илкинҗи нусгалык машгаланы кәмиллешдирен Пыгамберимиз, аяллары ве гызлары-да мүшриклериң четин азапларына дучар болдулар. Ыкдысады гысышлар гурналды. Мекгеден чыкмак кынлашдырылды. Хезрети Зейнепдир, хезрети Рукиййе разыяллаху анхуманың ынанчлары билен яшамак меселесинде чекен җебир-сүтемлери мөмүн көңүллерини иңледип, йүреклерини сызлатҗак дереҗеде хасратлыды. Муңа серетмезден олар асла ыза бир әдим хем әтмедилер. Сабыра даяндылар ве Аллахың разылыгына етдилер.

Нубуввет (пыгамберлик) бакҗасының гүллери кәмиллиге етип, улалдылар. Багтлы машгалалар, нурлы оҗаклар берк хем йылы хөвүртгелер гурдулар. Хабиби-Кибрия саллаллаху алейхи веселлем Серверимизиң неслиниң довамы шу йылы хөвүртгелерде ачылан гунчалар билен кемал тапды. Рахатлыгың чешмеси болан бу хөвүртгелер гурланда, Ыслам машгаласының үйтгевсиз өлчеглери орта гоюлды.

Оларың машгала болмаклары, тойлары, гелинлик эшиклери, машгала ичиндәки мынасыбетлери, өй ишлерини башарышлары, өзара сөхбетлери, сөйги долы хызматлары, гоңшучылык гатнашыклары, гарып-пукара, ёксула гарайышлары, ылмы дүшүнҗелери хем сарп эдишлери бүтин ыммата нусгалык болды. Шунлукда, Хезрети Алы разыяллаху анху билен Хезрети Патма разыяллаху анханың машгала гурмагы билен бүтин ыммата улы дерслер берилди.

Олар асла задың гулы, хызматчысы болмадылар. Дүнйә герегинден артык үнс бермедилер. Олар эбеди яшайшы газанмак үчин бу дүнйәни пурсат билдилер. Аллаха халысана гул болуп билмек, онуң разылыгына етмек үчин гайрат этдилер. Өзлери иймедилер, пакыра, ёксула ийдирдилер. Гапысына геленлери бош гайтарман, оларың мүшгилини битирмек үчин гушлар ялы чырпындылар. Олар бу артыкмач ахлаклары билен белент мертебә етип, эбеди китабымыз Куръан-ы Керимде ахлак белентликлери билен ине, шейле өвүлдилер. «Олар өз иеслери гелйәндигине гарамаздан, нахары ёксула, етиме ве есире ийдирдилер. Биз сизи Аллах  разылыгы үчин доюрярыс; сизден не гаршылык, не-де бир миннетдарлыга гарашярыс. Биз четин ве белалы бир гүнде Реббимизден (Онуң азабына дучар болмакдан) горкарыс (диерлер)» («Ынсан» сүреси: 8-10-аят)

Элхамдулилләх мөмүнлер хөкмүнде шейле шерепли машгала эе болмак бизлер үчин-де не улы багтыярлыкдыр!.. Керемли Хак хеммәмизи ики җаханда-да оларың сөйгүсинден, хемаятындан даш этмесин.

«Пыгамберимизиң Гызларыве Гыз Агтыклары» Алтын чешме журналында «Ханым сахабалар» сөзбашысының ашагында нешир эдилди. Окыҗыларымызың ислеглерини назарда тутуп, язгылар җемленип, бирнәче ерлерде, эсасанам, Хезрети Патма разыяллаху анха бөлүмине кәбир затлар гошулып, китап халына гетирилди.

 Бу китапда он саны нур юмагы перзентлер, Аллах ве Ресулының ёлунда чекилен эзъетлер, гөрлен гөргүлер, иман угрундакы гөрешлер, белент ахлак хәсиетлеринден нусгалар ве машгала хөвүтгесиндәки рахатлыкдан, багтлылыкдан аңлатмалар берилмәге чалшылды. Оларың мухаббети, хызматы, гайратдыр-пидакәрликлериниң нусга алынмаклары арзув эдилди. Шейле-де оларың гөзелликлер билен долы гөрелдели өмүрлеринден манылар чыкарылсын дийип гайрат эдилди.

Реббимиз языланлары олара лайык эйлесин. Калпларымызы оларың сөйгүси билен долдурсын. Оларың шепагатына весиле кылсын. Эгсиклеримизи, айыпларымызы-да эҗизлигимиз үчин гүнәмизи гечсин. Окыҗыларымызың пейдаланмагына себәп эйлесин. Әмин.

Гайрат бизден, товпык Аллаху-Тагаладан.

                                                                   Мустафа Эриш                   

                                                          5 Реҗеп 1423