Хезрети Халид ибн Зейд Эбу Эйюб эл-Энсары разыяллаху анхуның какасы тарапындан онунҗы аркасы, эҗеси тарапындан болса секизинҗи аркасы Ресулы-Экрем-саллаллаху алейхи веселлем  Серверимиз билен бирлешйәндир. Бухари хем Муслимиң роваятларына гөрә, Халид ибни Зейд Нечҗар огулларындан болуп, «Эбу Эйюп» лакамы билен мешхурлык газанан сахабайи-җелиледир (улы сахабалардандыр). Акабе Беятында (ылалашыгында) болуп, Бедир, Хендек, Ухуд сөвешлерине гатнашяр. Беятур-Рызван шертнамасына ве башга-да бирнәче мөхүм вакалара шаят болан, өрән гайратлы, сабырлы, таква, җихады (Алла үчин сөвешмеги) сөен аҗайып бир ынсанды. Хезрети Халид Эмевилер дөврүне ченли Мединеде яшап, соң Шама гөчйәр. Муавияның халыпалык эден заманында онуң оглы Езидиң «Константиниййә сапарына» мүҗәхид болуп гатнашяр.  Душман билен баша-баш сөвешлериң нетиҗесинде агыр хассалыга дучар болуп, ахыръете гөч эдйәр. Оны Константинийе галасының дүйбүнде депин эдйәрлер.

* * * * * * * * * * * * * *

     Хезрети Халид разыяллаху анхуның лакамы Эбу Эйюпдыр. Арапларың адатларына гөрә, машгаланың илкинҗи перзендиниң ады билен багланышыклы шол машгала лакам берилйәр экени. Хезрети Халид разыяллаху анхуның иң улы оглуның ады Эйюп боландыгы үчин ол халк арасында «Эбу Эйюбел-Энсары» лакамы билен таналыпдыр. Мухаҗирлериң арасында илкинҗи мусулманларың болшы ялы, Энсарларың арасында-да илкинҗи мусулманларың бири Эбу Эйюп эл-Энсары разыяллаху анхудыр. Ол Ресулы-Экрем саллаллаху алейхи веселлем Серверимизиң Мединейи-Мүневверә гөчмегинден ики йыл өң мусулманчылыгы кабул эден сахабалардандыр.