Мединейи-Мүневвереде «Эвс» хем «Хазреч» тирелеринден башга-да яхудилер хем яшаярдылар. Олар ики сөзлериниң биринде, «Биз якын вагтда ахырзаман пыгамбериниң орта чыкҗакдыгыны Төвратдан окадык. Биз шонда сизи хөкман Мединеден ковуп чыкарарыс» дийип, Эвс хем Хазреч тирелерини горкузярдылар. Бу тирелериң баштутанлары-да нәме этҗеклерини билмән, эйләк-бейләк урунярдылар. Шол икарада-да Мекгейи-Мүкерремеден Ресулы-Экрем саллаллаху алейхи веселлемиң өз пыгамберлигини ыглан эдйәндиги барадакы хабар эшидилйәр. Бу тирелериң адамларының кәбир кишилери дерхал Мекгә ёл шайыны тутярлар. Чүнки шол вагт хач мөвсүмиди.

      Пыгамбер Серверимиз саллаллаху алейхи веселлем хер йыл хач мөвсүминде «Суки Узак» (Указ базары)  дийилен ерде отурып, төверекден гелен тайпалар билен гөршүп, олары Ыслам динине чагырярды. Нубувветиң (пыгамберлигиң) он биринҗи йылында ене Минада Акаба дийилйән ерде пыгамбер Серверимиз саллаллаху алейхи веселлем Мединелилере гарашылмадык ягдайда шейле совал берйәр: “Сиз кимсиңиз?” Олар: “Биз Хазреч тиресинден”-дийип, җогап берйәрлер. Пыгамбер Серверимиз саллаллаху алейхи веселлем:

    -Бираз отурсаңыз сиз билен гүрлешип болмазмы?-диййәр. Олар разылашярлар. Ресулы-Экрем саллаллаху алейхи веселлем Серверимиз Куръаны Керимден бирнәче аятлары окап, олары хак дине ягны, Ыслама чагыряр. Олар хем ата-бабаларындан ве яхудилерден якын вагтда бир пыгамбериң  орта чыкҗакдыгы хакындакы хабары озалам эшидендиклерини ятлап:

      -Эйсем яхудилериң диййән пыгамбери шу болса герек дийишйәрлер ве Пыгамбер алейхыссалату вессаламың хузурында «Эшхеду эллә иләхә иллаллаху ве эшхеду энне Мухаммеден абдуху ве ресулух» дийип, мусулманчылыгы кабул эдйәрлер. Энсарылар җемагатындан илкинҗи Ыслам билен шерепленен сахабалар шулардыр: Эсад бин Зураре, Рафи бин Мәлик, Авф бин Харис, Кутбе бин Амир, Харис ибни Абдылла ибни Ребаб-разыяллаху анхум эҗмаин (Алла оларың хеммесинден разы болсун!)

      Нубувветиң (пыгамберлигиң) он икинҗи йылында Акабеде ибни Зураре хем онуң ёлдашлары Рафи, Авф, Кутбе, Укбе, Муаз ибн Харис, Зекван ибни Абды Кайс, Убаде ибни Самит, Абдылхейсем бин Теййихан, Аббас ибни Убаде, Эбу Абдылла Зейд ибни Салабе, Увейм бин Саиде разыяллаху анхум  дагылар ене Әлесмлериң Сервери Мухаммет Мустафа саллаллаху алейхи веселлем Серверимиз билен гөрүшип, онуң эмирлерини, гадаган эден буйрукларыны кабул этҗекдиклерине Оны ынандырярлар.