Бу гезек Мединедәки мусулманлар ол ерде яшаян Мухаммет Пыгамбериң умматына Куръаны-Керими хем Шеригатың хөкүмлерини долы ве догры өвредип билҗек Куръан мугаллымыны ибермеги Пыгамбер Серверимизден  хайыш эдйәрлер. Серверимиз саллаллаху алейхи веселлем оларың ислегини назарда тутуп, дөврүниң уламасы хасапланылян Мусаб бин Умейри Мединә иберйәр. Мусаб хезретлери Медине халкына Куръаны-Керими хем-де Ысламыети вагыз эдип, хат-да мешхур-азанчы Ибни Умми Мектум-разыяллаху анху билен хемише биле боляр. Умуман Мединейи-мүневвереде мусулманчылыгың ровач алмагында  Мусаб бин Умейриң-разыяллаху анх- хызматы бимөчбердир.

    Арадан бирнеме пурсат геченден соң Аммар бин Ясир, Билал Хебеши, Сад хем оларың ызяны Омар Ибнул Хаттап-разыяллаху анхум-йигрими төвереги сахаба билен Мединә гөч эдйәрлер. Аз салымың ичинде Медине халкының көп бөлегиниң Ыслам динини кабул этмеги нетиҗесинде Эвс ве Хазреҗ тирелериниң арасындакы йыллар бойы довам эдип гелен хопукдырыҗы уруш тогтап, Ыслам дини ровач алып, мусулманларың гүйчлери Яхудилериңкиден гөз-гөртеле агдыклык эдйәндиги месе-мәлимди.