Нубувветиң (Пыгамберлигиң) он үчүнҗи йылында хач мөвсүминде Куръаны-Керими өвредйән мугаллым Мусаб бин Умейр етмиш үч эркек хем ики саны аял болуп Мекгә гелдилер. Буларың арасында Бени Нечҗардан өзүниң гайратлылыгы, таквалыгы, зехинлилиги, сабыр-такатлылыгы, алымлыгы  билен мешхур болан Хезрети Халид бин Зейд Эбу Эйюп эл-Энсары хем барды. Булар Фетих сурасының 18-нҗи аятындакы: «О агаҗың ашагында сениң билен беят (ягны сениң Пыгамберлигиңи ыкрар эдип, Сени хемише гораҗакдыкларына вада) эден мөмүнлерден Аллах разыдыр» дийлип, өзлери догрусында аят инен багтыярлардыр. Догруданам, бу сахабалар-разыяллаху анхум-илкинҗи гезек агаҗың көлегесинде Пыгамбер Серверимизе әхди-пейман эдипдирлер. Шонуң үчин хем бу вака Ыслам тарыхында Акабейи-кубра ады билен мешхурдыр. Энсарылар Пыгамбер Серверимиз саллаллаху алейхи веселлеме Мединә гөчүп гелмеги теклип эдип, өз җайларыны, малларыны, аял-эбтадларыны нәхили гораян болсалар, Пыгамбер Алейхыссаламы-да шо шекилде гораҗакдыкларына сөз бердилер, хем-де Пыгамбер Серверимиз саллаллаху алейхи веселлемиң мүбәрек элини тутдылар. Җан берип Җеннет алдылар.