Бу Месҗиди-Шериф Ыслам тарыхында иң овалкы хем ичинде илкинҗи гезек ач-ачан җемагат билен намаз кылынан месҗит болуп, онуң Мединейи-Мүневвере билен арасы үч мил төверегидир. Халк арасында бу ере Алие хем дийилйәр. Ресулы-Экрем саллаллаху алейхи веселлемиң өзи бу месҗидиң гурлушыгында ишчи мысалы арманы-ядаманы билмән ишлейәр. Гөтерйән дашларының агырлыгы үчин мүбәрек гөвреси ики бүкүлйәрди. Ине, шу ашакдакы язҗак аяты-җелиләмиз шу ерде назыл болупды: «Илкинҗи гүнден башлан таквалыгың эсасында гурлан Кубадакы месҗитде намаза дурмаклыгың хас догрудыр. Ол ерде тәмизлиги ве нәзиклиги сөен ынсанлар бардыр. Аллах-да тәмизлененлери сөер».  («Тоба» сүреси, 108-аят).

      Месҗиди Харамдан, Месҗиди шериф-и Небевиден ве Месҗиди Аксадан соң ады хормат билен тутулҗак месҗит-ол хем Куба месҗиди-шерифидир. Пыгамбер саллаллаху алейхи веселлем Серверимизиң дүеси хем бу месҗидиң төверегинде чөкендир ве онуң чөкен ери хәли-хәзире ченли бес-белли болуп дурандыр. Бир хадысы-шерифде: «Бу месҗиди зыярат эдип, ики рекеат намаз кылана бир умре (хач) согабының бардыгы» буйруландыр.

       Ресулы-Экрем саллаллаху алейхи веселлем Серверимиз Җума гүни Кубадан гайдып, Бени Салим бин Авф җүлгесинде Рануна дийлен ерде дүшлейәр ве хутба окап, Җума намазыны кыляр. Ресулаллах саллаллаху алейхи веселлемиң илкинҗи окан Җума намазы шудыр.