Ресулы-Экрем саллаллаху алейхи веселлем Серверимиз җума намазыны кыландан соң, дүесини мүнүп, Мединейи-Мүневверә тарап ёла дүшйәр. Йөне Пыгамбер алейхыс саламың Мединеде кимиң өйүнде мыхман болҗакдыгыны хич ким биленокды. Энсарылар озал Мухаҗирлере сөз билен тарып эдип болмаҗак дереҗеде хеззет-хормат эдипдирлер. Бу гезек  Пыгамбер саллаллаху алейхи веселлемиң гелйәнини эшиден миллетиң Оңа болан Мәхир-Мухаббетинден Мединейи-Мүневвере нура гарк болупды. Чагалар бегенчлеринден яңа көчелерде: «Аллаху экбер, Мухаммет Мустафа гелди! Аллаху экбер, Ресул Алла гелди!»-дийип гыгыршярдылар. Көчелериң ики тарапында баса-бас болуп дуран мәреке: «Я Ресул Алла! Өйлеримиз, малларымыз, җанларымыз эмриңиздедир. Бизе гелиң! Душманларыңызы депгилемәге гүйҗи етҗек, Сизе ят болмадык машгаламыза мыхман болуң»-дийип, хайыш эдйәрдилер. Шәхере гирәен еринде мәхелләниң көплүгинден яңа аяллар тамларың үчеклерине чыкып, шейле мазмундакы шыгырлары окаярдылар:

     «Депелериң аңырсында ай догды. Аллаха ялбаранлары гөрүп, бизе-де шүкүр этмек ваҗып болды.

     Эй бизе гөндерилен эзиз Пыгамбер! Сен бизе боюн эгилмеси ваҗып бир эмр билен геленсиң!»  

      Пыгамбер Серверимиз саллаллаху алейхи веселлем Кусва атлы дүесине мүнүп, Мединәниң көчелеринден гечип барярка, хер кес өйүниң деңине етенде:

    -Гелиң, Я Ресул Алла!-дийип чагырярдылар. Дүйәниң овсарындан тутуп, оны өз өйүне тарап өвүрҗек болян миллети гөрен Ресул Алла саллаллаху алейхи веселлем:

   -Оны өз угруна гойбериң. Ол Аллахың «дур» диен ерине барып дурар. Ханы, дуруң, бакалы, нирә гидеркә?-диййәр.

   Догруданам Пыгамбер Серверимиз оны өз угруна гойберипди. Ресулы-Экрем Серверимизиң «дүйәни өз угруна гойбериң» диен сөзлеринде бир хикмет барды. Себәби Серверимиз бириниң өйүне барып дүшсе, бейлекилериң гөвни галҗакды. Алла Тагала мугҗыза хөкмүнде бу иши дүйәниң ыгтыярына гоюпды. Дүе илки гидип Мәлик бин Нечҗарың  өйүниң өңүндәки бош гиңишликде чөкди. Эмма тиз вагтдан туруп, Ибни Эзиз биле Сейит бин Мансур хем Җафер бин Мухаммет Али биле Хасан бин Зейдиң арасында ерлешйән Бени-Нечҗардан Халид бин Зейд Эбу Эйюп Эл-Энсары разыяллаху анхуның нурлы өйүниң гапысына барып, Керемли Хак Тагаланың эмри билен шол ерде чөкйәр. Ине, шейдип мыхманың болҗак ерини дүе гөркезенсоң бу ише хич ким хич зат дийип билмейәр.

   Бени Нечҗарлыларың отуран ери Энсарылар җемагатының ортарасында болуп, о тиреден Пыгамбер Серверимизиң атасы хем энеси тарапындан болан гарындашларының әхлиси шол төверекде орнашыпды. Бир мүддет соңра дүе туруп, ене өңки чөкен ери Мәлик бин Нечҗарың өйүниң өңүндәки ачыклыга барып, бөгүрмәге башлаяр. Ресулы-Экрем саллаллаху алейхи веселлем: «Иншәаллаху Тагала мыхман болмалы еримиз шу еридир» дийип, дүесинден дүшди ве Эбу Эйюп Халидил-Энсары разыяллаху анхуның өйүне гирди. «Дүйәниң чөкен ери «Мүбәрек-Накайи Ресул» ады билен мешхур болуп, ол ыз хәли-хәзире ченли хем белли болуп дурандыр.

* * * * * * * * * * * * * *

   Ресулы-Экрем саллаллаху алейхи веселлем Серверимиз Эбу Эйюп Эл-Энсары разыяллаху анхуның өйүне ерлешенден соң, кичиҗик гызҗагазлар-да: «Биз Нечҗарзадаларың гызларыдырыс. Мухаммет саллаллаху алейхи веселлемиң гоңшулыгы нәхили гөзел гоңшучылыкдыр. Оңа якынлык ве онуң билен гарындаш болмак нәхили багтыярлыкдыр» шекилиндәки газаллары окаярдылар. Хебешилер бегенҗинден яңа ок-яйларыны ойнадярдылар. Касыда окан гызҗагазлара Пыгамбер Серверимиз:

    -Мени сөййәрмисиңиз?-диенде, чагаларыңхеммеси бир агыздан:

    -Элбетде, Я Ресул Алла! дийип бөкҗеклешйәрдилер. Ресулы-Экрем Серверимиз хем:

      -Мениң хем сизи сөййәндигими элбетде, Алла Тагала билйәндир, дийди. Эбу Эйюп илки өйүни гөркезип, соң Зейд бин Харисе разыяллаху анху билен Пыгамбер алейхыс саламың гошларыны гетирип:

      -Ниреде отурарсыңыз, Я Ресул Алла!-диенде, Ресул Алла саллаллаху алейхи веселлем:

     -Кишиниң гошы ниреде болса, онуң өзем шол ерде болар-дийип, җогап берйәр. Энсарылар җемагатының иң улусы болан Эсад бин Зураре разыяллаху анху теберрук хөкмүнде Пыгамбер алейхыс саламың дүесини өз өйүне алып гидйәр. Серверимизиң Мединейи-Мүневверә хиҗрети хакындакы вакаларың беяны шу ерде тамам боляр.

* * * * * * * * * * * * * * *

     Мухаммет алейхыс салату вессаламың хиҗретинден соң, Мединейи-Мүневвере өвлүйәлериң дүшелгесине, салыхларың галасына, мусулманларың аркадаянҗына, мөмүнлериң сыгынян ерине ве алымларың хидаят меркезине өврүлип, бу шәхериң ады тутуланда Куббетул-Ыслам, Дарул-Иман, Арзул-Хиҗрет, Месвел Халали-Вел-харам диен ялы аҗайып сөзлер уланыляр.

     Бир гезек Пыгамберимиз саллаллаху алейхи веселлем: «Энсары-Кирамың хайырлы, берекетли хем шерефли өйлери Бени Нечҗарың этрапындакы өйлердир. Абдул-Эшхел огулларының хем-де бейлеки энсар өйлериниң хеммесинде хайыр хем берекет бардыр» диенде, Сейиде тиресиниң баштутаны Сад бин Убаде разыяллаху анху:

  -Я Ресул Алла! Сиз Энсары өйлериниң хайыр берекетини сананыңызда бизи ызкы хатарда гойдуңыз, диййәр. Шонда Сеййидул-Кевнейн (Дүнйә ве ахыръет Сеййиди) саллаллаху алейхи Веселлем Серверимиз шу җогабы берйәр.

  -Эй, Сад! Ягшылыкда адыңыз агзалып-да, хайырлыларың ичинде болмагыңыз сизе етмезми?

   Нечҗар огулларының өйлери бу җәхтден иң башда геленлеридир.