«Аллахың гулы ве Ресулы Мухамметсаллаллаху алейхи веселлемден, Кыбт юрдуның патышасы Мукавкыса:

  Хидаята табын болана салам. Мен сени Ыслама чагырярын. Мусулман бол, саламатда боларсың. Алла Тагала саңа ики гат согап берер. Эгер йүз өвүрсең, кыбт ковмуңы хеләк этҗек бела-бетерлер сениң үстүңе болар! Эй, Китап әхли! Биз диңе шу ынанҗың дашында бирлешип билерис. Ол болса сизиң Алладан гайра ыбадат этмезлик ве Оңа хич зады шәрик гошмазлыкдыр. Эгер-де Алладан башга кәбир адамлары Таңры  дийип танамазлыгы хакыкатданам бес этсеңиз, онда «шаят болуң, биз мусулман болдук» дийиң.

  Шу гымматлы хат 1275-нҗи йылда Мүсүрде «Эл-Хамим» шәхериндәки бир ыбадатханада Кыбт китапларының арасында сакланып, ол Стамбула Солтан Меҗит заманында гетирилйәр. Бу тарыхы документи Солтан Меҗидиң везири Сейит Паша бир франсуз алымындан өвренйәр. Солтан Меҗит ол алымы Стамбула чагырыпдыр. Пыгамбер Серверимиз саллаллаху алейхи веселлемиң шол хаты уламалар тарапындан тассык эдилип, Топгапы көшгүнде Мукаддес аманатларың арасында хорматлы ерде гойлупдыр.

* * * * * * * * * * * * * * *

  Мукавкыс Хатип разыяллаху анхуве шейле диййәр:

  -Ханы, хабар бер, бакалы, сениң Пыгамбериң Мухаммет саллаллаху алейхи веселлем дәлми? Хатиб:

  -Элбетде, Онуң Пыгамбердигине хич хили шек-шүбхе болуп билмез-диййәр. Мукавкыс:

  -Миллети оны ватанындан, ягны Мекгеден чыкарып кованларында, о нәме үчин душманларының хеләк болмаклары үчин бет дога этмеди. Хатиб:

  -Сенем онда мениң шу совалыма җогап бер бакалы! Меръемиң оглы Иса Алейхыс салам Пыгамбер болса-да, онуң ковмы оны асмак иследилер. Эмма Керемли Хак Тагала  Исаны гөге галдырды-да асмады. Иса алейхыс салам-да ковмуна бет дога этмеди. Мунуң себәби нәме? Мукавкыс:

  -Сен гаты говы җогап бердиң. Хикметли бир ынсаның янындан гелендигиңи субут этдиң-дийип, онуң пайхасына хайран галяр. Хатиб разыяллаху анху Мукавкысың янында бәш гүн галып, соң ызына гайдяр. Мукавкыс ондан Пыгамберимиз саллаллаху алехйхи веселлеме совгат хөкмүнде Марияны хем онуң кенизегини иберйәр.