Хайбар галасы Мединейи-Мүневверә 200 мил төвереги аралыкда ерлешен бир ердир. Бу ер Мединәниң төверегинде яшаян Яхудилериң меркезиди. Ысламыете хем Ресул Серверимизе әхли пыссы-пуҗурлыклар шу ерден гелйәрди. Ягдай чыдам эдип болмаҗак дереҗә етенден соң, Пыгамбер Серверимиз саллаллаху алейхи веселлем 1600 кишилик гошун билен Яхудилериң кувваты болан Хайбар галасына йөрүш эдйәр. Хайбар солтаны дереҗесини алан Алы разыяллаху анху бу сөвешде өрән улы гахрыманчылык гөркезйәр. Сөвешде алнан есирлердир олҗаларың саны-саҗагы ёкды. Йөне гынандырян ери Яхудилер бу гезегем Пыгамбер Серверимизе зәхер берипдирлер. Ресулы Худа саллаллаху алейхи веселлем өлмезиниң өң яны шу сөзлери гайталан экени: «Хениз-хенизем Хайбарда иен зәхерли этимиң тәсирини дуйярын. Чүнки мөвлам Ухуд сөвешинде газылык мертебесини ыхсан эдиши ялы, шу себәпден шехитлик мертебесини-де ыхсан этҗекдир». Бу сөвешде Пыгамбер Серверимиз саллаллаху алейхи веселлеме башга-да ховпларың абаняндыгындан ховатыр эден Мүҗәхитлерден Эбу Эйюп Эл-Энсары разыяллаху анху гиҗеси билен тә даң атянча Ресулы-Экремиң чадырының дашында нобатчылык эдйәр. Бир гүн ирден Әлемлериң Сервери саллаллаху алейхи веселлем  чадырындан даш чыканда Эбу Эйюбың өзүни горамак үчин нобатчылык эдйәндигини гөрүп, шейле дога эдйәр: «Аллахым гиҗелерини укусыз гечирип мени горамага гайрат эден Эбу Эйюбы шу дүнйәде-де, ахыръетде-де өзүң горагын». Бир роваятда болса: «Аллах җелле ве ала саңа рахмет этсин! Аллах җелле ве ала саңа рахмет этсин» дийип, гайта-гайта дога эдйәр. Башга бир роваятда болса, Пыгамбер алейхыс салам оңа: «Эй, Эба Эйюп, индиден бейләк саңа хич бир эрбетлик тәсир этмез» диййәр. Мухаммет алейхыс саламың догасының берекети  биле  Эбу Эйюп өмрүниң довамында хер хили бела-бетерлере саташса-да, хемише аман галяр. Хат-да ол өленден соңам, онуң габры-шерифиниң бир ят юртда ятандыгына серетмезден 800 йыл төвереги горагда сакланяр. Фатих Солтан Мехмет Хан заманындан башлап, тә бизиң шу гүнки гүнлеримизе ченли мүбәрек габры горалып, ол мусулманларың зыяратгәхине өврүлди.

  Сөвешиң довам эдйән вагтында Пыгамбер Серверимиз саллаллаху алейхи веселлемиң чадырының төверегинде Эбу Эйюпдан башга-да нобатчылык чекип, Оны горанлар шу ашакдакылардыр: Сад  ибни Муаз, Сад ибни-Эби Вакгас, Аббад бин Бишр, Зубейр ибнул Аввам, Мухаммет бин Меслеме, Зекван бин Абдуллах бин Кайс разыяллаху анхум. Куръаны-Керимде: «Алла Тагала сени адамларың шеридир, зелелинден горар» («Мәиде» сүреси, 67-нҗи аят) диен аяты керимеси иненден соң, сахабалар нобата дуруп, Пыгамбер алейхыс саламы горамак везипесини терк эдйәрлер.