Халид бин Зейд Эбу Эйюп Эл-Энсары разыяллаху анху Мүсүре йөриш эдиленде гөрүшмек үчин Укбе бин Амир  разыяллаху анхуның янына баряр. Укбе бин Амириң өзүне етерлик ылмы болуп, ол Куръан окан вагтында энчемелери өзүнден гидер экени. Ибни Аббас, Эбу Эйюп Эл-Энсары ве башга-да бирнәче сахабалардыр табинлериң бирнәчеси Укбе бин Амир разыяллаху анхудан бирнәче Хадис роваят эдипдирлер. Бир гезек бир Хадиси-Шерифи Укбе бин Амириң роваят эдендигини эшиден Эбу Эйюп разыяллаху анху: «Ким шу дүнйәде бир мусулман доганының айбыны өртсе, Алла Тагала-да онуң дүнйәде хем ахыръетде айбыны өртер. Хадиси-шерифини» сен роваят этдиңми?-дийип, Укбеден сораяр. Укбе:

    -Доганым Эба Эйюп, бу хадиси роваят эден хәзирки Мүсүр баштутаны Меслеме бин Мухаллет разыяллаху анхудыр. Ондан бир сора бакалы, диййәр. Эбу Эйюп разыяллаху анху шол ерден гөни Меслеме бин Мухаллитиң янына гелйәр. Салам берйәр. Саглык-аманлык сорашыландан соң Меслеме:

 -Эй, Эбу Эйюп! Хайырдыр. Бейле гыссаглы гелмегиңизиң себәби нәме? Ёгса-да бир ишиңиз бармы?-диййәр. Эбу Эйюп:

 -Сениң яныңа гелмегимиң себәби бир Хадиси-Шерифдир-дийип, ёкаркы Хадиси-Шерифи окаяр хем шейле диййәр:

 -Инди шу Хадиси-Шерифи икимизден башга Пыгамбер алейхыс саламдан эшиден галмады. Укбе:

 -Мен бу Хадиси-Шерифи Ресулалладан эдил сениң окайшың ялы эшитдим-диенде Эбу Эйюп онуң сөзүни тассык эдйәр ве Мединә доланяр. «Гөршүмиз ялы, Сахабайи-Кирам Хезретлери, табиин несли, уламадыр-алымларың әхлиси Куръаны-Керимден соң Пыгамбер Серверимизиң сүннетине хормат хөкмүнде Хадиси-Шерифлери роваят этмекде иңңән җогапкәрчиликли чемелешмегиң хөтдесинден гелипдирлер. Хат-да олар узак ёлуң хупбатыны пикир этмезден бир ерде пылан хили хадис айдян улама бар» дийселер, гүндогардан-гүнбатара, гүнбатардан-гүндогара ченли гитмели-де болса җанларыны гайгырман, диңе Алланың разылыгы, Пыгамбер алейхыс саламың шепагаты үчин, өвезине хич дүнйә задына хантама болман алыс юртлара сапара гидипдирлер.