Пыгамбер Серверимиз саллаллаху алейхи веселлем бир Хадиси-Шерифинде шейле буйрупдыр: «Аллах җелле ве Ала Хезретлериниң салых амалларың ичинде иң халаяны шу үч амалдыр: 1. Намазы намаз вагтының башында кылмак. 2. Эне-ата хеззет-хормат этмек. 3. Алла ёлунда душман билен сөвеш этмек». «Халыс Алланың разылыгы үчин сөвешип, душмана хүҗүм эдйән мүҗәхидиң үстүне гүнүң догмагы хем-де агшам дүшенде өз караргәхине дөнмеги Алла тагаланың хузурында үстүне Гүн догуп-батан бүтин дүнйә хем  шамүлкүнден хас хайырлы хем согаплыдыр». «Константиниййәниң басылып алынҗакдыгы элбетде шүбхесиздир. Онуң эмири нәхили гөзел бир эмирдир. Онуң гошуны-да нәхили гөзел бир гошундыр». Бу Хадиси-Шериф Аясофиа хем Фатих месҗитлериниң гапыларының ёкарсында язылгыдыр. Бу Хадиси-Шерифи Эсхаби-Кирамдан Бишрул-Ганави разыяллаху анху роваят эдипдир. Ол оглы Абдуллах ибни Бишри-де Меслеме бин Абдыл-Мәлиге табшыряр. Меслеме газат ёлы билен хиҗретиң 99-нҗы йылында Константинийе (Стамбула) баряр хем-де Рум императоры билен ылалашып, узак вагтлап Галата шәхеринде орнашяр. Меслеме Галатада яшан дөврүнде мусулман җемагаты үчин ол ерде арап месҗидини бина этдирип, Халыпаның хорматына Хутба окатдырса-да, Стамбулы эллемән Шама дөнйәр. Мухиддин ибни Араби күддүсе сыррух «Мусамерат» атлы китабында Меслемәниң Стамбулы айланып, Аясофийәниң ичине ченли гирендигини белләп гечйәр.

  «Мениң умматымдан газат этмек үчин илкинҗи деңзе гирен эсгерлере, о ягшы амаллары үчин җеннет ваҗып боландыр. Ягны, оларың җеннеди хем магфырети газанандыкларына шүбхе ёкдур». «Мениң умматымдан газат үчин тайярланып, румы-Кайсарың юрды болан Константиниййә-Стамбула җихаде гиден эсгер-де авфу-магфыръете эе боландыр». «Кисра дийилйән ша хеләк боландан соң, башга ша гелҗек дәлдир. Кайсар дийилйән карол хеләк боландан соң, башга карол гелҗек дәлдир. Сиз Кайсарың, Румуң хем Кисраның хазыналарына эе болҗакдыгыңыза Небсимиң эрки гудратында болан Реббиме касам эдйәрин». Бу Хадиси-Шериф-де Пыгамбер Серверимиз саллаллаху алейхи веселлемиң мугҗыза болан келамларындандыр. «Бир тарапы гуры ере, бейлеки тарапы-да деңзе бакып дуран бир шәхериң бардыгыны эшитдиңизми?»-диенде, Эсхаби-Кирам: “Хава, эшитдик о-ер Константинийе, ягны Стамбулдыр” диййәрлер. Шонда Ресулы-Экрем Серверимиз:

     -Тә Бени Исхакдан 70 000 (етмиш мүң) эсгер текбирлер айдып, о шәхери басып алянча Кыямат гопмаз-диййәр.

 «Хак Тагала Хезретлери мөмүн гулларына Румың меркези болан Константиниййәни, ягны Стамбулы тесбихдир, текбирлер  билен басып алмагы несип эдйәнчә, Кыямат гопҗак дәлдир. Бу еңиш гайратлы хем яш мусулманлара миессер болуп, онда уммасыз мал-дөвлет эле салынҗакдыр». Хезрети Халид бин Зейд Эбу Эйюп Эл-Энсары разыяллаху анху бүтин өмрүни җихәд этмәге багыш эдипди. Дүнйә, мал-мүлк онуң назарында хич затды. Ол ниреде җихәд бар дийселер, шол ердеди. Онуң бар максады-мырады Алла ёлунда җихәд эдип, шехитлик мертебесине етмекди. Шонуң үчинем бу аҗайып ынсан, бар гүйч-кувваты биле Ыслам меркезинден узакда болан Стамбула ченли барып етйәр. Эбу Эйюп разыяллаху анхуның Стамбула бармагының бир себәби-де Пыгамбер Серверимиз саллаллаху алейхи веселлмиң бу хусусдакы ышаратының нетиҗесидир.

  Езидиң иң соңкы баран командасында 50 000 адамлык агыр гошуның ичинде сайлама шахсыетлер болуп, оларың бири Пыгамбер Серверимиз саллаллаху алейхи веселлемиң доганогланы Абдуллах ибни Аббас, Хезрети Омар ибнул-Хаттап разыяллаху анхуның оглы Абдуллах ибни Омар, Пыгамбер Серверимизиң эҗекесиниң оглы Абдулла ибни Зубейр, Эбу Эйюп Эл-Энсары шейле-де мешхур арап батырларындан Абдулазиз бин Зураре, Алланың гылыҗы лакамыны алан Халид бин Велидиң оглы Абдурахман бин Халид, Абдуллах ибни Езид дагылар барды. Езидиң гошунлары Константиниййә  гирип-гирмән эййәм душмана хүҗүм этмәге башлаярлар. Ыслам гошуны Рум гошунлары билен алты ай төвереги сөвешйәрлер. Гошунда ачлык зерарлы хер хили кеселлер йүзе чыкмага башлаяр. Бир гүн ирден  Абдулазиз разыяллаху анху келлесиниң гызгынына душманың бирнәчесини гылычдан гечирип, душманларың җүммүшине аралашяр. Шо пурсат румлылар Абдулазиз разыяллаху анхуны шехит эдйәрлер. Сөвешиң довам эдйән гүнлери Хезрети Халид бин Зейд Эбу Эйюп Эл-Энсары разыяллаху анху агыр кеселе дучар боляр. Ол шо вагтлар сегсен яш төверегинде экени. Ёлдашлары онуң яшының бир чене барандыгыны, шол бир вагтың өзүнде-де онуң ят юртдадыгыны гөз өңүне тутуп:

    -Сен яраңок, җихады терк этмәге саңа шеригат ругсат берйәр ахыры, диенлерирнде-де гошун биле билеликде Стамбула тарап йөрүш эдйәр. Эбу Эйюбы сөвеш мейданында бир чадырда ерлешдирйәрлер. Йөне сөвеш узак вагтлап довам эденден соң, онуң халы гүн-гүнден бетерлейәр. Эбу Эйюп гошунбашылары хем бейлеки мүҗәхидлери янына чагырып, олар билен разылашяр. Табиин неслинден болан Эбу Зейд биле Невфул-Бикалы рахметуллахи алейх хассаның халыны сорамага барярлар. Невф Хезрети Эбу Эйюбың хакы үчин: «Эй, Реббим! Эбу Эйюп Хезретлерине саламатлык хем шыпа бер» дийип, дога эденде, Эбу Эйюп:

 -Гардашларым, мениң хакыма бейле дога этмәң! Эгер дога эдесиңиз гелсе, эй, Реббим, Эбу Эйюбың аҗалы голайлан болса, гүнәсини гечип, оңа рахмет эт. Эгер аҗалы даш болса, оңа саламатлык бер, дийип дога эдиң, диййәр. Шол пурсат Езид гелип: «Эй, Эбу Эйюп, айтҗак-гойҗак, ислеҗек бир задың бармы?»-диенде, Эбу Эйюп Хезретлери Езиде:

    -Мен сизиң дүнйәңизден хич зат ислемейәрин. Йөне мен өләйсем, җеседими душман юрдуның ортасына әкидип билсең,  әкит-де, сөвешйән мүҗәхидлериң аякларының ашагына гөм… Мениң габрым оларың атларының аягының ашагында тем-текиз болсун. Чүнки мен Ресулы-Экрем ве Небийи-Зишан Серверимизден: «Константинийеде галаның янында бир раҗули-салих (говы адам) депин эдилҗекдир» диенини эшитдим хем шол раҗули-Салих болан кимсәниң өзүм болмагыны ислейәрин» диййәр ве рухуны Хак Тагала Хезретлерине табшыряр. Хезрети мүҗәхидиң весъетини болмалысы ялы ерине етирйәрлер. Бизиң шу гүнки гүнлеримизе ченли онуң мүбәрек габры-шерифи көплериң зыяратгәхидир. Зыяратчылар ондан шепагат ислейәрлер хем шепагатына эе боларлар. «Ким Алла үчин песпәл болса, Алла оны хем онуң шаныны бейгелдер»  Хадиси-Шерифине ышаратдыр. Иң ыгтыбарлы хасапланылян алты саны хадис китабының хадис алымлары Эбу Эйюпдан бирнәче хадис роваят эдипдирлер. Ресулы-Экрем саллаллаху алейхи веселлем Серверимиз Хадиси-Шерифинде шейле буйряр: «Мениң сахабаларымың хер бири бир юрдуң халкындан иманлы болуп өлен аялы-эркегиниң хеммесини кыямат гүнүнде мөмүнлериң өңүнде Алла тагаланың багыш эден нуры биле ёлларыны ягтылдып, өңлерине дүшүп олары Җеннетиң белент дереҗесинде ерлешмәге шепагат этҗекдирлер». Башга бир роваятда болса, шейле гетирилйәр: «О сахабамың элине нурдан бир байдак «әлем» берип, ол байдагың ашагында болан кимселер онуң шепагаты биле Алланың эмри эсасында Җәхеннемден азат эдилҗекдирлер». Эбу Эйюп Эл-Энсары разыяллаху анхуның җыназа намазыны Езид окаяр.