Ыстамбулда багтыярлык чагының ядыгәрлиги

ЭБУ ЭЙЮП ЭЛ-ЭНСАРЫ

разыяллаху анху

 

     Ресулаллах саллаллаху алейхи веселлем Серверимизиң мыхмансөери, Стамбулың рухы сакчысы, эзиз мыхман Эбу Эйюп эл-Энсары разыяллаху анху Энсары сахабалардан болуп, Хазреч тиресине дегишлидир. Ады Халид, кунъеси (лакамы) Эбу Эйюпдыр.

   Хиҗретден ики йыл озал Акабеде мусулман болан Эбу Эйюп разыяллаху анху сөйгүли Пыгамберимиз Мединә гөченлеринде, өйүнде еди ай мыхман алмак багтыярлыгына етен ынсандыр. Ол Ресулы-Экрем Серверимизи зыярат этмәге геленлере хеззет-хормат этди. Сачагыны гиңден язып, сөйги билен хызмат эдип, Аллахың Ресулының догасына хем сөйгүсине эе болды.

   Эбу Эйюп разыяллаху анхуның өзи шейле гүррүң берйәр: «Агшамларына нахар тайярлап, Ресулаллаха хөдүр эдердик. Гаплар ызына геленде аялым Патма икимиз Ресулаллахың мүбәрек бармакларының деген ерлеринден ийип теберрик эдердик. Бир гезек сарымсаклы нахар ибердик. Гаплар ызына геленде Ресулаллахың нахара эл дегирмәндигини гөрдүк. Мен гайга батып, мунуң себәбини соранымда, Ресулы-Экрем саллаллаху алейхи веселлем Серверимиз:

    -Мен ныяз хем ыбадат билен мешгул. Перишделере эзъет бермек ислемедим. Нахарда сарымсагың ысы барды. Шо себәпден иймедим, сиз ийиң-дийди.

    Шондан соң  Эбу Эйюп разыяллаху анху хем:

   -Сиз халамасаңыз менем халаман-дийип, галан өмрүне асла сарымсак датмаяр.

   Ине, багтыярлык чагының йылдызлары Аллахың Ресулына шейле дереҗеде баглыдырлар. Дурмуш өлчеглери ве еке-тәк нусгалары Ол саллаллаху алейхи веселлемди. Ол саллаллаху алейхи веселлемиң сүннетине уймак, ызындан гитмек өзлери үчин айрылмаз эсасды.

    Сахабалар Ики Җахан Гүнеши болан Серверимизи шейле бир сөййәрдилер велин, гушуң екеҗе түйүниң онуң үстүне гачмагына разы дәлдилер. Ол саллаллаху алейхи веселлеме хызмат эденлеринде ялңышлык гойбермезлик үчин гөзлерини ондан айырмаздылар. Эбу Эйюп разыяллаху анхуның шу херекети иң говы нусгалыкдыр:

    Бир гүн Эбу Эйюп эл-Энсаны разыяллаху анху Ресулы Экрем саллаллаху алейхи веселлем Серверимиз билен биле отырдылар. Серверимизиң сакалы-шерифлерине бир гушуң түйи гачяр. Муңа биынҗалык болан Эбу Эйюп ругсат сорап, деррев түйи айыряр. Онуң бу херекетинден хошал болан Серверимиз оңа сөйги билен дога эдйәр:

   -Эй, Эбу Эйюп! Иншаллах мундан соң саңа хич бир яманлык кәр этмесин. Халамаян затларыңдан Алла сени горасын.

    Эбу Эйюп эл-Энсарының хызмат, мухаббет хем җихад долы дурмушы барды. Оңа не мал, не мүлк герекди. Ол сабырлы, эденли, таква ынсан болуп, хемише газадың, җихадың ышгындады.

    Бар арзувы җихаддан җихада ылгамак хем шехит болмакды. Эбу Эйюп тә Муавийәның дөврүне ченли хич сөвешден галмады. Газатларың әхлисине гатнашды. Мединеден Ыстамбулы эелемек үчин ики гезек сапар этди.

   Ол Хайбар сөвешинде эли гылычлы даңдана ченли укламады Ресулаллах саллаллаху алейхи веселлемиң чадырының төверегинде нобатчылык этди.  Сөйгүли Пыгамберимиз саллаллаху алейхи веселлем ирден чадырындан даш чыкып, оны гөрди ве:

    -Болшуң нәхили, эй, Эбу Эйюп?-дийди. Эбу Эйюп:

   -Эй, Аллахың Ресулы! Сизе бир яманлык эдәймесинлер дийип, горкыма укламадым-дийди. Онуң бу херекетлеринден аша хошал болан Әлемлериң Сервери саллаллаху алейхи веселлем онуң үчин: «Аллахым! Укудан галып сәхерлере ченли мени горамага чалышан Эбу Эйюбы сен хем шу дүнйәде ве ахыръетде гора» дийип, дога этди.

     Өмрүни  җихад билен өтүрен Эбу Эйюп эл-Энсары разыяллаху анхудан:

   -Нәме себәпли җихады сайладың?-дийип, соранлара шейле җогап берди:

   -Мен Куръаны-Керимде: «Хер хили халыңызда газатдан ыза галмаң» («Тоба» сүреси; 41-нҗи аят) диен эмри окадым. Шондан соң газады терк этмек хакында пикирем этмедим.

    Ол Реббимизиң перманыны ерине етирмек ве Ресулың: «Ыстамбулы басып алан эсгер нәхили говы эсгердир» диен өвгүли бушлугына эе болмак умыды биле Мединеден Стамбула гайдян мушакгат долы ёллары, даглары, дүзлери, чөллери сөкди.

    Ол соңкы гезекки сапарында Езидиң ёлбашчылыгында 80 яшларындака ёла чыкыпды. Эбу Эйюп разыяллаху анху гошун Стамбулың алкымына геленде кеселледи. Бир чадыра ерлешдирилен Эбу Эйюп разыяллаху анхуның халының агырлашяндыгыны гөрен гошунбашы онуң халындан хабар алмага гелип, соңкы арзувыны сорады. Ол шейле дийди:

   -Эгер мени гүйҗүң етсе, душман юрдуның ортарагына әкит-де, депин эт. Чүнки мен Ресулаллахың «бир салых киши Константинияның диварларының дүйбүне депин эдилҗикдир» диенини эшитдим. Белки ол киши мендирин-дийип, йүрек арзувыны беян этди.

    Эй, Реббимиз! Бизлере-де Хезрети Эбу Эйюп эл-Энсары разыяллаху анхуныңкы ялы мертебе, ышк хем мухеббет несип эт. Көңүллеримизе Хабыбың сөйгүсини ичир-де, бизлери җихад рухы билен долы бир мөмүн эйле… О Сөйгүлиниң байдагының астында, бизлери-де җем эйле!…

    Иң соңкы деминде-де җихад ышыгы ве Ресулаллах саллаллаху алейхи веселлем сөйгүси билен янан Эбу Эйюп разыяллаху анху арадан салым гечмәнкә, шехитлик шерабыны ичди. Онуң весъети дийши ялы ерине етирилди. Алла Тагала сөйгүли Пыгамберимизиң догасының берекети биле онуң габрыны 7 асыр пеналады. Хачанда Стамбул мусулманларың элине геченде хәзирки месҗит хем онуң үстүндәки гүммез Фатих Солтан Махмыт хан тарапындан салдырылды.

    Бизиң үчин улы мертебе, төверегимиз үчин берекетиң рухы себәпкәри болуп дуран Сөйгүли Пыгамберимизиң мыхмансөери Эбу Эйюп эл-Энсары разыяллаху анхуны бу дуйгулар билен зыярат эделиң. Онуң Ресулаллаха болан сөйгүсини, җихад рухуны көңлүмизе гечирелиң. Сөйгүли Пыгамберимизиң: «Сахабаларымың хер бири кыямат гүни арадан чыкан ериниң халкы үчин өңбашы хем нур болуп дирелдилҗекдир» диен бушлугына мынасып болалың. Керемли Хакдан онуң шепагатына лайык болмагымыз үчин ныяз эделиң.

   Реббимиз өз сөенлерини сөйдүрип бизи разылыгына лайык эйлесин. Әмин.