Җан базарындакы догрулык

САГД ИБНИ ЭБИ РЕБИ

разыяллаху анху

    Дүнйә бир ярыш еридир. Ынсан-да о ерде ярышянларың биридир... Догмак хем өлмек бу ярышы башлаян хем гутарян чызыкдыр... Дурмуш бу чызыгы ызарламакдан ыбаратдыр… Өмүр хем шу аралыкда гечен заманадыр.

   Мөмүн көңлүни Аллах ве Ресулына долулыгына багыш эден йигитдир. Дине болан ыхласы йүрекдендир. Хич бир сөйги оны бу чызгыдан чыкарып билмез. Онуң үчин Аллах ве Ресулына болан сөйги әхли затдан ёкардадыр. Мал, перзент, везипе, пул-буларың хич хайсысы онуң калбында Аллах ве Ресулына болан сөйгүни гечип билмез. Чүнки мөмүн иманың леззетини алып, өзүндәки җөвхер ышыгы биле хакыкаты гөрүп, Аллаха боюн эгендир.

   Табынлык хем ыхлас эсхабы-кирамың иң эсасы айратынлыкларының бириди. Аллах ве Ресулына догры болуп, шол чызгыда ыхлас биле йөремек Сөйгүли Пыгамберимизиң җана-җан достларының үйтгевсиз ахлагыды. Өмрүңде ыхласлы яшамак хем өмүр сүрмек болса улы багтыярлыкды.

    Сөйгүли Пыгамберимиз саллаллаху алейхи веселлем: «Аллах тарапындан Сагда рахмет этсин. Чүнки ол дирилигинде-де, өленден соңам Аллаха ве Ресулуна ыхласлы боландыр»  дийипдир. Сагд ибни Реби разыяллаху анху Энсары сахабаларың иң сыланян адамларынданды. Ол биринҗи Акабеде Ыслам биле шерепленипди. Ол икинҗи Акабада хем боландыгы үчин ики гезек бейгат этме багтыярлыгына мынасып боландыр.

   Сагд ибни Эби Реби разыяллаху анху Энсарының байларынданды. Сөйгүли Пыгамберимиз Мединә гелип, Энсары-Мухаҗирлериң арасында доганлык ыглан эденде Сагд разыяллаху анхуны Абдырахман ибни Авф разыяллаху анху билен доган этди. Онуң  гөркезен дин доганлыгы тарыхда өрән сейрек душ гелйәр. Ол Мухаҗир доганыны өз сүйтдеш доганындан хем эй гөрүп, оңа хер хили хеззет-хорматлар этди. Онуң дин доганлыга шейле әхмиет бермеги бүтин ыммата гөрелде болды.

   Ухуд гүни Сагд ибни Реби душман билен шейле бир гарпышды велин, онуң яраланмадык ери галмады. Ресулы Экрем сөвеш гутарандан соң:

   -Эйсем, Сагд ибни Эби Реби не халдака? Шехитлериң арасындамы я-да яралыларың ичиндеми? Оңа он ики ерден гылыч билен хүҗүм эдиленини гөрдүм-дийип сорады ве оны гөзләп тапмак үчин Мухаммет ибни Меслемәни иберди. Меслеме яралыларың арасына барып:

   -Эй, Сагд ибни Эби Реби!-дийип чагырды. Сөзүни бирнәче гезек  гайталаса-да, җогап алмады. Ахыры

   -Эй, Сагд! Мени сениң яныңа Ресулаллах иберди-диенде, инчеҗик сес билен:

   -Мен өлүлериң арасында-дийип, җогап берди.

    Мухаммет ибни Меслеме разыяллаху анху оны шехитлериң арасында эндам-җаны элеме-дешик халында тапды. Онуң деми зордан гелип гидйәрди. Сагд Мухаммет ибни Меслемәни гөрүп, оңа шейле дийди:

     -Ресулаллаха саламымы етир. Җеннетиң ысыны алярын. Ковмуңа-да менден салам айт ве шейле дий: «Акабеде Ресулаллаха эден әхтлерини унутмасынлар. Гөзлери гөрүп, кирпиклери гырпылдап дурка, Аллах Ресулына душман якынлашайса, Алла хузурында оларың өтүнҗи кабул эдилҗек дәлдир».

    Мухаммет ибни Меслеме Неби саллаллаху алейхи веселлемиң хузурына гелип, Сагдың саламыны хем иң соңкы сөзлерини етирди. Шонда Ресулы Экрем Серверимиз:

    -Эй, Реббим! Сен Сагд ибни Эби Ребиден разы бол-дийип, дога этди ве:

   -Аллах Сагда рахмет этсин, чүнки ол дирилигинде-де, өленден соңам Аллаха ве Ресулына ыхласлы боландыр-дийди.

   Олар Акабада берен сөзлеринде садыклык билен тапылдылар. Берен сөзүнде дураның газанҗы болса Җеннетдир. Бу кепилнаманы олара Алла Тагала берди. Сагд ибни Эби Реби-де бу багтыярлыга етенлерденди.

   Керемли Хак бизлере-де онуң ышкыны, мухаббетини несип эйләп, шепагатына лайык кылсын. Әмин.