Ресулаллахың чапыксувары

МИКДАД ИБНИ ЭСВЕД

разыяллаху анху

     Ыслам леззетлери түкенмейән бир нурдур. Ол леззети дадан ыззата етер. Онуң биле яшаян хер дайым мертебе тапар. Хормат биле ятланар.

     Ыслам нуры кимиң көңлүне гирен болса, оны дирелдендир. Байың-гарыбың, яшың-гаррың, гараз бу леззетиң тагамыны алан хер кес яшан өмрүни манылы гечирендир.

   Ысламъетден озал Мекгә гелип, Эсвед ибни Абды Егус билен ылалашып, огуллыга кабул эдилен Микдад ибн Амр атлы бир яш оглан бар. Бу яш оглан миладының 584-нҗи йылында Мекгәниң этегинде Нехрада энеден догулды.

   Тәзе Ыслам дининиң гелендигини эшидип, ол шол нура тарап ылгады ве Ыслама илкинҗи гиренлериң арасында орун алды. Ол җуда батыргай боландыгы үчин Ыслама гиренини гизлемеди. Мусулманчылыгыны ач-ачан ыглан этди.

     Эмма бейле дийилдиги Ыслам сөйгүси билен долуп-дашан Микдад ибни Эсвед разыяллаху анхуның мүшрүклериң эзъетинден өз пайыны аланок дийилдиги дәлди. Мүшрүклериң хетденашмалары зерарлы ол бейлеки бирнәче мусулманлар билен билеликде Хебешистана хиҗрет этди. Бирнәче вагтдан соң, Серверимиз саллаллаху алейхи веселлемиң Мединә гөчендигини эшидип, ол хем Мединә гөчди.

    Микдад ибни Эсвед разыяллаху анхуның калбында Пыгамбер Серверимизе болан шейле бир улы сөйги барды велин, хат-да ол Серверимизиң йүзүне екеҗе гезек середенинде, онуң әхли гайгы-гуссасы, чекен җебри-җепалары зым-зыят болярды. Сөйгүли Пыгамберимиз бир гезек ол хакында шейле диййәр: "Аллах маңа сахабаларымдан айратын дөрт кишини сөййәнини билдирип, мениң-де олары сөймеклигими эмир этди. Ол дөрдүси шулардыр: Алы, Микдад, Селман хем Эбу Зердир."

    Хезрети Микдад шу сөйгә лайык болуп билмек үчин бүтин зехинини, көңлүни Ресулы-Экрем саллаллаху алейхи веселлем Серверимизиң хызматына, онуң саглык-саламатлылыгына багышлады. Ол Ысламың ёлунда илкинҗи ат чапдыран боландыгы үчин, илкинҗи чапыксувар хөкмүнде мешхур болуп, "Ресулаллахың чапыксувары" диен ат билен таналды.

    Мединеде сәхел бир ынҗалыксызланма дуюлса, Микдад деррев атына мүнүп, гылыҗыны билине дакып, Ресулаллахың гапысының өңүнде хәзир боларды. Серверимиз оны хер гезек сөвеш гейиминде урша тайяр болуп дуран мүҗәхид хөкмүнде гөрйәрди.

    Бедир, Ухуд, Хайбар ве бейлеки сөвешлере гатнашан Микдад ибни Эсвед разыяллаху анхуның Бедир гүни гөркезен гахрыманчылыгы Ики Җаханың Гүнешини өрән хошал этди. Бу хадысаны Бухариде Абдыллах ибни Месуд разыяллаху анху шейле гүррүң берйәр:

   -Мен Микдадың агзындан шейле бир айгытлы сөз эшитдим. Бир гезек Микдад хем яранлары мүшрүклериң үстүне сөвеш максады билен гитмек үчин Неби саллаллаху алейхи веселлемиң хузурына гелди ве:

   -Эй, Ресулаллах! Биз Мусаның ковмуның Муса Пыгамбере: "Ханы сен гит-де, Реббиң душманларына гаршы сөвеш эт, биз шу ерде дуралы"  дийши ялы диймерис. Биз сениң сагыңда, солуңда, өнүңде, ызыңда душман билен чарпышарыс!-дийди.

    Әлемлериң Сервери саллаллаху алейхи веселлемиң Микдадың бу гөвүн гөтириҗи сөзлерине бегенҗинден яңа мүбәрек йүзлери нур сачды.

     Бедир сөвешинде тайсыз гахрыманчылык гөркезен Микдад ибн Эсвед разыяллаху анху Пыгамберимиз арадан чыкандан соң хем өрән көп сөвешлере гатнашандыр. Ол 70 яшларында милады йыл хасабының 656-нҗы йылында Мединеде арадан чыкяр. Онуң җыназа намазыны Хезрети Осман разыяллаху анху кылдыряр.

     Керемли Хакдан бизиң-де хер хайырлы ише онуң ялы йүрекден көмек берип билмеклиги ве шепагатларына лайык болмаклыгы ныяз эдйәрис. Әмин.