Бир ухуд гахрыманы

ЭНЕС ИБНИ НАЗР

разыяллаху анху

              Иман шейле бир гөхвердир велин, ынсан онуң биле кувват тапар. Бүтин гөзелликлер ондан дөрәндир. Хер дүрли гахрыманчылык, гуҗур-гайрат имандан алнан кувватың бир бөлегидир.

   Мөмүн батырдыр, мынапык болса горкакдыр. Мөмүн өзүне бил баглап, ички дүнйәсинде рахатлык боландыгы үчин, Алладан башга хич бир затдан горкмаз. Мынапыгың болса, озалы билен ички дүнйәси бүкгүлдиден долы боландыгы үчин, хемише горкуда хем гайгыда яшар.

    Мерхум Акиф: «Имансыз йүрек сынада йүкдүр» дийип, иманың иң улы ныгматдыгына, имансызлыгың-да бетбагтлыкдыгына ышарат эдипдир.

    Багтыярлык чагындан бизиң шу гүнки гүнлеримизе ченли акып гелен тарыхымыз иман гахрыманчылыклары биле долудыр. Ысламың илкинҗи гахрыманлары сөйгүли Пыгамберимизиң сахабаларыдыр. Олар дин дийип малларындан-җанларындан гечендиклери, хер бир гөркезен гахрыманчылыклары бизиң үчин нусгалыкдыр. Хезрети Энес ибни Назр разыяллаху анху-да бу улы гахрыманлардан биридир. Ол Ухуда ганы хем җаны биле адыны язан сахабадыр.

    Энес ибни Мәлик разыяллаху анху агасының гахрыманчылыкларыны шейле гүррүң берйәр:

    -Агам Энес ибни Назр Бедир сөвешинде ёкды. Ол шу себәпден Ресулаллах саллаллаху алейхи веселлеме:

   -Эй, Ресулаллах! Мүшрүклер билен эден илкинҗи газадыңа гатнашып билмедим. Эгер-де Аллах мени мүшрүклер билен сөвеш мейданына чыкарайса, шонда ойнаҗак гахрыманчылык оюнларымы, Аллах хеммелере гөркезҗекдир-дийип, сөз берди.

   Ухуд гүни мусулманларың дарганыны гөрен ибн Назр разыяллаху анху:

   -Эй, Реббим! Шуларың, ягны мусулманларың пытраңңылыгы себәпли сенден өтүнч сораярын. Мүшрүклериң-де Ресулаллаха этҗек җенаятындан саңа сыгынярын-дийип, догры мүшрүклере тарап йөнелди. Шол вагт Сагд ибни Муаз разыяллаху анхуве габат гелди ве оңа:

   -Эй, Сагд! Мен Җеннети ислейәрин. Җеннедиң ысыны Ухуддан аляндыгыма Аллаха касам эдйәрин-дийип, шехитлик күйсеги билен дилленйәрди.

 

************

    Сагд ибни Муаз разыяллаху анху ибни Назрың соңкы сөзлерини Ресулы Экреме гүррүң берйәркә:

   -Эй, Ресулаллах! Ибн Назр мүшрүклер билен шейле бир сөвешди велин, онуң гөркезен гахрыманчылыкларыны тесвир этмәге гүйҗүм етмез-дийип, хайран галандыгыны диле гетирди.

   Ухуд гүнүнде ол, Пыгамбер сөйгүси биле долы болан шу сөзлери билен тарыха гирди. Сөвеш мейданында шол пурсатларда «Мухаммет өлди» диен сеслер эшидилди. Энес ибни Назр разыяллаху анху бирнәче сахаба билен Хезрети Омар разыяллаху анхуның янына барып:

   -Бу ерде нәме доңуп дурсуңыз?-дийди. Олар-да:

   -Ресулаллах өлдүрилипдир-диен җогабы бердилер. Шонда Энес ибни Назр разыяллаху анху шейле дийди:

   -Боляр, Ресулаллах өлдүрилен болса, ондан соң сиз дурмушы нәме этҗек? Туруң, Ресулаллах нәме үчин өлен болса, сиз хем шонуң үчин өлүң-дийип, сөвеш мейданына гирди ве шехит болды.

    Мөмүн үчин Ресулаллахсыз дурмушың манысы ёкдур. Онуң сөйгүси өлүми-де гөзеллешдирйәр. Горкының ерини гахрыманчылыга беслейәр. Оны сөен, Аллахы сөенден боляр. Бүтин гүйч-кувват Аллахыңкыдыр. Онуң хемме зада гүйҗи етйәндир, ол хер зады билйәндир, хер зады гөрйәндир ве хер затдан хабарлыдыр.

 

************

      Энес бин Мәлик разыяллаху анху ибн Назрың шехитлик шербетини иченинден соңракы халыны шейле беян эдйәр:

    -Биз ибни Назрың шехит җеседини тапанымызда, онуң беденинде сегсене голай яра гөрдүк. Мүшрүклер онуң гулак-бурнуны ве бейлеки агзаларыны кесипдилер. Шо себәпден бу эзиз шехиди хич ким танамады. Диңе гыз доганы ягны мениң бибим бармакларының уҗундан танап билди.

************

     Дурмуш иман билен күпүриң арасында гөреш билен гечйәр. Имандан узак болан ынсан, вагшылыкда, йыртыҗылыкда, зулумда иң вагшы хайвана-да гайра дур диййәндир.

    Реббимизден иманымызы кувватлы эдип, ол йылдыз ынсанларың яшайышлары ялы яшамаклыгы, олардакы гахрыманчылыгы, сөйгини хем табынлыгы бизлере-де несип этмесини ве шепагатларына лайык эйлемесини ныяз эдерис. Әмин.