Перишделериң депин эден шехиди

АМИР ИБНИ ФУХЕЙРЕ

разыяллаху  анху

 

     Амир ибни Фухейре разыяллаху анху хиҗретде җаныны орта гоян пидакәр йигит... Ресулаллах саллаллаху алейхи веселлем ве Сыддыкы-Экбер Серверимиз билен билеликде хиҗрет этмек мертебесине етен багтыяр… Ыслама гөвүн берип, онуң яйрамагы үчин җебри-җепалара дөш герен бир гахрыман… Ыслам чакылыгыны илкинҗи дуян ве оңа илкинҗи көңүл беренлерден...

     Өзи Аслен Эзд кабыласындан болуп бени Тейм кабыласындан Туфейл ибни Абдуллахың гулы хөкмүнде таналяндыр. Ол бир гарын дояр ялы пула чопанчылык эдерди. Гарны азда-кәнде дойса-да, рухы ачды. Онуң көңли доймаярды. Рухуна хөрек болҗак, оны рахатлыга говушдырҗак бир затлар гөзлейәрди. Ол тәзе диниң гелендигини, Ыслам гүнешиниң көңүллери айдыңладяндыгыны эшитди.

     Ол Ресулаллах саллаллаху алейхи веселлем Серверимизи сорады ве тапды. Оны гөрүп-гөрмән көңлүне йылылык гитди-де, деррев келимейи-шехадет гетирип, Ыслама гирди. Онуң гарав гайдар ялы хоссары болмандыгы үчин мүшриклер оңа азар-яманыны бердилер. Довамлы эдилйән зулумлар онуң  үчин хич зат дәлди.

    Чүнки ол иң улы байлыга говшупды. Зулум астында болса-да, көңли рахатды.  Ол өзүне әхли эдилен сүтемлере сабыр этди. Онуң пикириче, беден чүйреҗекди. Җебир-сүтемлериң-де соңы гелҗекди. Чүнки хемме зат гелди-гечерди. Эмма рух бакыды ве довамлыды. Онуң хөреги болса иманды. Ине, шу дүшүнҗелери калбында саклаян Амир ибни Фухейре разыяллаху анху иманыны ыраң атдырмады. Бүтин ыхласы хем дурнуклылыгы билен Ресулаллах саллаллаху алейхи веселлеме табын болды. Ыхласы хем табынлыгы оңа ниҗе гапылары ачды. Хезрети Эбу Бекир разыяллаху анху оны сатын алды. Сүтемден гутулып, азатлыга чыкды.

     Ол дүнйә тәзеден инен ялыды. Хезрети Эбу Бекир разыяллаху анхуның гоюнларының чопанчылыгыны эдйәр. Ол шейтмек билен хем гүзераныны долаяр хем-де Аллаха ыбадат этмегиң леззетини датяр. Шу арада мүшриклер-де мусулманлара гаршы эдибилен яманлыкларыны эдйәрдилер. Сөйгүли Пыгамберимиз Аллаха дога-дилег этмегини довам эдйәрди. Сахабалара хиҗрете ругсат берлипди. Бир мүддет соңра-да Ики Җаханың Гүнеши Серверимиз хиҗрет этҗекди. Ёла чыканда досты Хезрети Эбу Бекир разыяллаху анху билен чыкҗакды. Амир ибни Фухейре разыяллаху анху-да бу ики садык достуң хызматында болҗакды.

     Ресулы-Экрем Серверимиз бир гиҗәниң ярысы Хезрети Эбу Бекир разыяллаху анхуның өйүне барды. Хиҗрете илахи изин (ругсат) берлипди. Хиҗрет эдилҗекди. Эбу Бекир Сыддык разыяллаху анху-да ёлдаш болмалыды. Тайярлыклар гөрлүп, гиҗәң ярысы өйден чыкылды. Севр говагында ызларыны йитирдип, эртеси гиҗе ёлларыны довам этҗекдилер. Амир ибни Фухейре разыяллаху анху-да ол ики сөйгүлиниң иер-ичер ялы затларыны тайынлап, ягдайдан олары хабардар этмелиди.

    Бу кын ишди. Пидакәрлик ислейән хызматды. Хат-да җан ховп астына дүшйәрди. Эмма җанлар ол ики сөйгүлиниң ёлунда пида болсун. Амир ибни Фухейре эртеси ирден шоларың гиден ёлундан гоюнларыны сүрди. Даш-төверегине серенҗам берип, говага якынлашып, ол ики сөйгүлә сүйт ве иер-ичер ялы зат элтип берди. Олар шол ерден гидйәнчәлер, Амир разыяллаху анху бу мертебели хызматы ерине етирмелиди. Керемли Хак онуң бу хызматларына гаршылык хөкмүнде ол сөйгүлилер билен билеликде хиҗрет этмек багтыны миессер этди.

     Нәхили улы багтыярлык… Нәхили мертебе… Аллахың Ресулы, Хабыбы ве Сыддыкы Экбер биле бирликде хиҗрет этмек… Ол аҗайып ынсанпервер хызматлары үчин шейле гөзел ныгматлара говушып, сабырлылыгының саясында бейик мертебелере улашды… Реббимиз бизлери-де өзүне гуллук этмекде, дине хызматда дурнуклы, пидакәр хем этҗегини билйән йигитлерден эйлесин. Әмин.

     Ики Җаханың Гүнеши Серверимиз Мединейи-Мүневверә хиҗрет эденде Энсар билен Мухаҗириң арасында доганлык гурупды. Амир ибни  Фухейре разыяллаху анху биле Харис ибни Эвс ибни Муазы доган дийип ыглан этди.

    Бедир ве Ухуд сөвешлерине гатнашан Амир ибни Фухейре разыяллаху анху Ыслама көңүл берен бир гахрыманды. Ол Ресулаллах Серверимизиң ынамыны газанан йигитди. Амир разыяллаху анху Неҗдлилере иберилен топарың ичиндеди.

    Неҗд шейхи Эбу Бера Мединә гелип, Ресулы-Экрем саллаллаху алейхи веселлем Серверимизден Ысламы өвредер ялы мугаллым иследи. Сөйгүли Пыгамберимиз-де етмиш кишилик топар дүзди. Амир ибни Фухейре разыяллаху анху-да бу сайлама топарың арасындады.

    Хиҗретиң дөрдүнҗи йылыды. Бу топар Биъри Мауне диен ере геленде дузага дүшүрилди. Умеййе оглы Амирден башга бүтин сахабалар шехит эдилди. Бу гошуның дүшен ягдайы мусулманларың арасында ятдан чыкмаҗак хасрат болды. Хениз кырк яшларындака Амир ибни Фухейре разыяллаху анху-да бу ерде шехит эдилди. Онуң шехитлик вакасы шейледир:

    Азгын мүшрик Җеббар ибни Сүлмәниң зыңан найзасы Амир разыяллаху анхуның аркасындан гирип, дөшүни ярып чыкды. Ол дөшүнден ганы чогярка: «Газандым!... Халас болдум… Валлахи (Аллаха касам болсун!)…» дийип, бегенч билен гыгырярды.

    Гең галып, оңа середйән мүшрик Җеббар онуң айдян сөзлериниң манысына  дүшүнмейәрди.     

    О нәмәни газаныпды? Бегенҗинден гыгырмагының себәби нәмеди? Йөне онуң бу сөзлери Җеббара гүйчли тәсир эдипди. Үстесине-де Амир ибни Фухейре разыяллаху анху шехит боланда перишделер оны гөтерип, асмана галдырып, ене ере дүшүрип, депин этдилер. Җеббар гең галмакдан яңа гөзлерине ынанмаярды. Өз-өзүне: «Муны башга-да гөрен бармыка?» дийип, төверекдәкилерден сорамага башлады.

    Гөренлерини айтса-да оңа ким ынанҗак? Онуң төверегиндәкилер өз гөзлериниң гөрен задындан башга кишиниң гөренине ынанмаярдылар. Олар рухы әлеми билмейәндиклери үчин имандан несибелери ёкды.

    Киме гүррүң бермели? Гөзлери билен гөрени хакды. Йөне бейле халлар нәдип йүзе чыкярка?

    Бу дүшүнҗелер диңе иманда чөзүлйәрди. Нетиҗеде бу гең-энайы халлар Җеббарың догры ёла дүшмегине себәп болды. Мүшриклериң ичинден диңе Җеббар Ыслам билен шерепленди. Амир ибни Фухейре разыяллаху анху-да Җеннете учды.

   Керемли Хак шепагатларыны хак эйлесин. Әмин.