Совукганлы, батыр хем гайратлы йигит

КАТАДЕ ИБНИ НУГМАН

разыяллаху анху

   Катаде ибни Нугман разыяллаху анху Ухуд гахрыманларындан… Мүшрик окларына гаршы Ресулаллах саллаллаху алейхи веселлем Серверимизи горамага дөш герен пəлван… 

   Ол Ухуд гүни гөзүне гүйчли бир ок дегмеги билен дашына чыкан гөзүни элине алып, Серверимизиң хузурына гелен гөзи көр мүҗəхид… Совукганлы,  батыр, гуҗур-гайратлы гахрыман…

   Катаде разыяллаху анху энсар сахабаларың абрайлы кимселеринден болуп, Эвс кабыласының Зафер шахасына дегишлидир. Ол Акабеде ыслам билен  шерепленендир. Эҗеси Энисе бинти Кайс эн-Неҗҗарыдыр.

   Катеде разыяллаху анху Бедир, Ухуд ве бейлеки əхли сөвешлере  гатнашды. Мекгəниң фетхинде Эвс кабыласының Зафер шахасының  байдагыны гөтерди.

    О  хас-да Ухуд гүни гөркезен гахрыманчылыгы билен мешхур болды. О гүн җаныны орта гоюп, мүшрүк окларындан Ики Җаханың Гүнеши Серверимизи горамага чалышды. Онуң шол гүнки гөркезен   гахрыманчылыкларыны ве башындан  гечирен  халларыны эсхабы-кирамдан Җабир ибни Абдуллах разыяллаху анху бизе шейле накыл эдипдир:

   «Ухуд сөвеши Ресулаллах саллаллаху алейхи веселлемиң иң кын гүнүди. О гүн төверегине җемленен эсхабы-кирам мүшрүк окларына ве гылычларына гаршы дөш герип, Серверимизи горамага чалышярдылар. Катаде разыяллаху анху хем шу муҗахидлерденди. Чарпышяркалар бир мүшрүгиң атан окы онуң гөзүне дегди. Гөзи дашына чыкды. Ол гөзүни аясына алып, Ресулаллах саллаллаху алейхи веселлеме тарап голайлашды. Оны бу халда гөрен Ики Җаханың Гүнеши Серверимиз элиндəки чыкан гөзүни алып, мүбəрек эллери билен гөзүң чыкан чукурына ерлешдирди. Ерине гоюлан гөз эдил өңкүси ялы  сагалып, гөрмəге башлады».

   О гүн Ресулы-Экрем саллаллаху алейхи веселлем Серверимизиң бир мугҗызасы Катаде разыяллаху анху себəпли гөрүлди. Ымам Агзам хезретлери бу мугҗызайы-небевини, ягны Пыгамберимизиң мугҗызасыны өз язан наты-шерифиниң (Пыгамберимизиң сыпатлары барадакы китабының) бир сетиринде «Мугҗызаң биле ызына гетирдиң Катадəниң гөзлерини» дийип, диле гетирипдир.

    Катаде разыяллаху анху табынлыгы, мухаббети, хызматы ве садакаты биле  Фахры-Каинат саллаллаху алейхи веселлем Серверимизе өзүни сөйдүрипди. Катаде разыяллаху анху үчин Серверимизиң хузурында, хызматында онуң билен биле болмак, онуң сөйгүсини ювдумламак иң улы багтды. Ресулы Экрем саллаллаху алейхи веселлем оңа айратын хеззет эдип, совгатлар берерди, несихатлар эдерди.

   Бир гиҗе Катаде разыяллаху анху яссы намазына гидип барярка,  гараңкылыкда Ресулы-Экрем Серверимиз билен габатлашды. Серверимиз оңа:

   -Катаде сенмисиң?-дийди. О-да:

   -Хава, эй, Ресулаллах!-диенде, Серверимиз:

   -Гайдышын яныма гел-дийди.

   Катаде разыяллаху анху намаздан соң Серверимизиң янына гелди. Ики Җаханың Гүнеши оңа бир хурма чыбыгыны берди. Катаде разыяллаху анху шол гүнден соң гиҗе дашары чыканда төвереги ягтылдян шол хурма шахасыны янындан хич айырмады. Месҗиде гидип-гелмеги хас-да   аңсатлашды.

   Серверимиз бир гүн шейле несихат этди: «Сизиң дердиңизе эм болҗак зат Куръаны-Керимдир. Хассалыгыңызың себəби өз эллериңиз биле эден гүнəлериңиздир. Беҗергиси тоба ве истигфапрдыр».

   «Габыр азабы үч зат себəпдендир: гыбат, геп гатнатмак ве сийдикден бедени горамазлык». 

   «Эгин-эшик, мал-дүнйə, гөзеллик ве ылым ялы ныгматлар өзүне берлип-де,  песпəллик этмеги билмейəнлериң бу эе болан ныгматлары, кыямат гүни олар үчин бир беладыр».

    Катаде ибни Нугман разыяллаху анху милады йыл хасабының 644-нҗи йылында 65 яшларындака арадан чыкды. Намазыны Хезрети Омар разыяллаху анху кылдырды. Керемли Хакдан шепагатларыны ныяз эдерис. Әмин.