Гайдувсызлыгы ве батыргайлыгы биле мешхур сахаба

МУХАММЕТ ИБНИ МЕСЛЕМЕ

разыяллаху анху

    Мухаммет ибни Меслеме разыяллаху анху батырлыгы, гуҗур-гайраты биле мешхур болан сахаба… Өмри сөвеш мейданларында гечен мүҗəхид  гахрыман... Худайбиеде Бейгаты-рызванда болуп, Аллаху Тагаланың өвги-сенасына мынасып болан ве антлашма шаят хөкмүнде бармак басан  багтыярлардан…

    Ол Мединели мусулманлардандыр. Яш мугаллым Мусаб ибни Умейр разыяллаху анхуның арада дурмагы билен мусулман болды. Ол Ресулаллах саллаллаху алейхи веселлем Серверимизе бүтин дуркы билен багланды. Сөвешлериң əхлисинде Онуң төверегинде первана болуп пырланды. Мүшрүк окларына гаршы дөш герип, Серверимизи горамага чалышды.

    Ол Бедир, Ухуд, Хендек сөвешлерине гатнашды. Мухаммет ибни Меслеме разыяллаху анху гарадан гайтмаз, горкузыз-үркүсиз гахрыманды. Фахры-Каинат саллаллаху алейхи веселлем Серверимизи өлдүрмеги  мейиллешдирен яхуды шахыры Каб ибни Эшрефиң о хакындан гелипди. Каб бай яхудыларданды. Тəсирли шыгырлар айдарды. Курейишлилериң Бедир хем Ухуддакы өлүлери хакында гынанчлы шыгырлар окап, олары  мусулманлара гаршы өҗүкдирерди. Серверимиз онуң шеринден  мусулманлары горамак иследи ве сахабаларындан:

   -Бу иши ким битирер?-дийип сорады. Мухаммет ибни Меслеме разыяллаху анху:

   -Эй, Ресулаллах! Ол иши мениң битирмегими ислəрмисиңиз?-дийди. Серверимиз:

   -Хава, ислейəрин-дийип, разылык беренден соң, Меслеме разыяллаху анху бирнəче гүн бу ишиң үстүнде пикир өвүрди. Серверимизден өзи билен   багланшыклы Кабың гөвнүне хош якар ялы сөзлери айтмага ругсат сорап, гысга вагтың ичинде бойнуна алан ишини ерине етирди.

   Ики жаханың Гүнеши Серверимиз өз юртларына чагырып, җанына каст этмек ислейəн Бени Надр яхудыларына-да оны илчи эдип иберди. Олара шу эмри етирмеги буюрды:

   -Меслеме! Надр огулларының янына гит! Олара Ресулаллахың җанына каст   этмек үчин гуран мейилнама себəпли Мединəни терк этмелидиклерини айт. Сизе он гүн пурыҗа берилйəр-дий. О-да хич хили икирҗиңлəнмəн, горкман-үркмəн, батыргайлык билен Надр огулларының янына гидип, эмри олара етирди.

   Мухаммет ибни Меслеме разыяллаху анху Худайбиеде болан бейгаты-рызвана-да гатнашды. Курайша гаршы өлүнчə сөвешҗекдигине касам этди. Мүшрүклер билен сөвешде асла ызда галмаҗакдыгына, Аллах ве Ресулының  ёлунда малыны-җаныны пида эдип, җихад этҗекдигине сөз берди. Агаҗың  саясында бу шертлери кабул эдип, Ики Җаханың Гүнеши Серверимизе бейгат этди. Ол Аллаху Тагаланың шу аятдакы медху-сенасына (өвгүсине) лайык болды. Манысы:

  «Ант болсун ки, о агаҗың саясында саңа бейгат эдйəркəлер, Аллах о  мөмүнлерден разы боландыр. Калпларында боланы билип, олара  ынанмак дуйгусыны берип, өрəн якындакы еңиш биле (Хайбарың фетхи) сылагландыр».(«Фетх» сүреси; 18-нҗи аят)

   О Худайбие антлашмасына шаят болуп, гол гоймак шерепине етип биленлерденди. Хайбар сөвешинде-де галалара эдилен хүҗүмлерде диңе өңдəки хатарлардады. Хениз Хайбар фетх эдилмəнди! Бир гынанчлы халда Серверимизе:

   -Эй, Ресулаллах! Мен бу гүн гам лайына батдым. Яхудылар доганымы  шехит этди-дийди. Фахры-Каинат саллаллаху алейхи веселлем Серверимиз онуң бу чуңңур хасратыны шу сөзлери билен диңдирмəге чалышды:

   -Душман биле габатлашмагы ислемəң. Габатлашаныңызда-да: «Эй, Аллахым! Бизиң-де, оларың-да Ребби сенсиң! Хеммəмиз сениң гудратың  саясындадырыс. Олары боюн эгдирҗек диңе сенсиң!»-дийип, дога эдиң.

  Эй, Меслеме! Саңа бушлук! Эртир иншəаллах сениң доганыңы өлдүрен  өлдүрилҗекдир ве яхудыларың сөвешиҗилери гачҗакдырлар-дийди. Шейдип онуң көңлүне теселли берип, калбыны рахатлыга говушдырды.

   Мухаммет ибни Меслеме разыяллаху анху хиҗретиң единҗи йылында каза  умрасында Мекгə гиден мусулманларың гизлин кувватларының  гошунбашысы болды. Хунейн сөвешине, Веда (хошлашык) хаҗына-да   гатнашды.

   Ол Хезрети Эбу Бекир разыяллаху анхуның дөврүнде Сирия   тарапларында дининден дөненлер билен сөвешди. Малы хем җаны биле  җихада гатнашды.

   Хезрети Омар разыяллаху анхуның заманында-да зекат алянларың ёлбашчысы болды. Кимседен көп зат алмазды. Мерт хем гайдусызды. Ол  кəвагтлар болса эмирлериң өзүни алып баршыны өвренмек үчин уградыларды. Бир гүн Хезрети Омар разыяллаху анху ондан гүн-гүзераныны нəхили айлаяндыгыны, ырсгыны нəдип тапяндыгыны сорады. О-да:

   -Сени ислейшим ялы тапярын. Зекатың топланмагында ве пайланмагында адалаты эмр эдйəрсиң-диен җогабы берди.

    Ол Хезрети Осамн ве Хезрети Алы разыяллаху анхумларың дөврүнде асудалыкда яшады. Өмрүниң көпүсини сөвеш мейданында гечирендиги үчин өрəн аз санлы хадысы-шериф роваят эдипдир. Олардан  бири-де шудур:

   «Бир кимсе бир мусулманың айбыны өртсе, Алла Тагала-да онуң дүнйəде ве ахыръетде айбыны өртер. Бир аладасындан дындырса, Алла Тагала-да кыямат гүни  онуң аладасыны гидирер. Бир хаҗатыны битирсе, Алла Тагала-да онуң хаҗатыны битирер».

    Мухаммет ибни Меслеме разыяллаху анху Муавия разыяллаху анхуның дөврүнде 77 яшларында Мединейи-Мүневвереде арадан чыкды. Җеннетил-бакы гонамчылыгында депин эдилди. Керемли Хакдан шепагатларыны ныяз эдерис. Әмин.