Кəбəниң хызматчысы ве ачарларының эеси

ОСМАН ИБНИ ТАЛХА

разыяллаху анху

    Осман ибин Талха разыяллаху анху ягшылык сөер мерт йигит… Мекгəниң  фетхинден бир-аз вагт өң мусулман боланлардан… Умми Селеме разыяллаху анха Энемизе хиҗретде ёлбелетлик эден гахрыман… Кəбəниң гапысының ачарыны өзүнде сакламак везипеси билен шерепленен бир хызмат    ынсаны… Машгала болуп, Кəбəниң хызматыны йөреден мерт ынсанлар…

    Ол Мекгеде Кусай кабыласына дегишлидир. Несеб-гелип чыкышы боюнча  Кусайда Ресулаллах саллаллаху алейхи веселлем веселлем биле бирлешйəр. Какасы Талха, эҗеси-де Сүлафе бинти Сад болуп, Бени Амр  кабыласындандыр.

   Какасы Ухуд газадында мүшрүклер билен биле мусулманлара гаршы   сөвешди. Хезрети Алы  керремаллаху веҗхе Серверимиз биле баша-баш сөвеше чыкды. Өрəн гысга мөхлетиң ичинде Хезрети Алы разыяллаху анху онуң ишини битирди. Олар машгала болуп, Кəбəниң гапысының ачарыны  гөтермек хызматыны йөредйəрдилер. Какасы Ухудда өлдүриленден соң, бу везипе Османа галды. Ол Кəбəниң пердедарлык хызматыны этди.

   Ики Җаханың Гүнеши Серверимиз хиҗретден өң Османы имана чагырды. Эмма ол бу чакылыгы кабул этмеди. Мүшрүклериң басгыларындан халас болуп билмəн, оларың тарапында дурды. Серверимиз оңа гүлүмсирəп  херекетлериниң манысызлыгыны оңа дуйдурды. Сабыр-канагатлылык билен  бир гүн онуң Ыслама гелҗекдигини умыт эдйəрди. Оңа пикир эдер ялы,  ойланар ялы əхең билен:

   -Эй, Осман! Умыт эдйəрин ки, бир гүн сен мени: «Бу ачары ниреде ислесеңиз гоярсыңыз. Киме ислесеңиз берерсиңиз» дийҗек бир ериңде гөрерсиң-дийди.

    Осман бин Талха разыяллаху анхуның Ыслам билен шереплениши бираз гич болды. О Худайбиеде эсхабы-кирамың Ресулаллах саллаллаху алейхи веселлем Серверимизе болан мухаббетини, табынлыгыны ве ышгыны гөрүп, хайран галды. О сөйги топлумына дахылллы болмак иследи. Көңлүнде Ысламың нуры парламага башлады.

    Ол  хиҗретиң 8-нҗи йылы Мекге фетхиниң өң яны Халид ибни Вели ве Амр ибни Ас биле бирликде Мединə гелди. Ресулаллах саллаллаху алейхи веселлемиң хузурында келимейи-шехадет гетирди. Шейлеликде, фетхден өң ыслам билен шерепленен мухаҗирлериң дереҗесине эе болды. Мекгəниң фетхинде ики Җаханың Гүнеши Серверимизиң янындан айрылмады.

    Мекге фетх эдилип, Кəбə гириленде, Ресулы-Экрем саллаллаху алейхи веселлем Серверимиз Османдан Кəбəниң ачарларыны иследи. О-да  ачарларың эҗесиндедигини айдып, ылгап онуң янына барды-да, ачарлары  бермегини сорады. Энтек мусулман болмадык эҗеси ачарлары бермек ислемеди. Эмма инди хəкимиет мусулманларың элине гечипди. Бермезлик өз  элиңде дəлди. Осман разыяллаху анху эйдип-бейдип эҗесинден ачарлары алып, Ресулаллах саллаллаху алейхи веселлем Серверимизе гетирип табшырды.

    Кəбəниң гапысыны ачып, бирликде Бейти-Шерифиң ичине гирдилер.  Шүкүр сеҗдесини этдилер ве дашары чыканларында Рахмет Пыгамбери Серверимиз: «Аллах сизе аманатлары əхлине (эелерине) бермеги эмр эдер…» («Ниса» сүреси; 58-нҗи аят) аяты-җелилесини окап, Кəбəниң ачарларыны текрар Осман ибни Талха разыяллаху анхуве берди-де:

   -Эй, Эбу Талханың өвлады! Ата-бабаларыңыздан галан аманады сизде гоймак ислейəрин. Муны залым болмаса, башга хич ким сизден алмаз-дийди. Ол хем:

   -Сениң Аллахың гулы ве Ресулыдыгыңа хич бир шүбхесиз шаятлык эдйəрин-дийип, табынлыгыны мəлим этди. Җахылыет дөврүндəки эден ишлерине пушман эдйəнлигини дуйдурды.

   Фахры-Каинат саллаллаху алейхи веселлем Серверимиз онуң шол  везипəни довам этдирмесини иследи. О-да Кəбəниң ачарчысы болуп, хызмат этмеги өзүне шереп хасаплады.

    Шол гүнден башлап, хиҗабет ягны пердедарлык везипеси, Османлының соңкы дөвүрлерине ченли Осман ибни Талха разыяллаху анхуның неслинде галды. Кəбəниң бу шерепли хызматыны олар ерине етирдилер.

   Осман ибни Талха разыяллаху анху Серверимиз билен билеликде Хунейн  газадына гатнашды. Онуң янындан асла айрылмады. Билеликде Мединə гитди. Ол Серверимиз дары-бакыя гөчйəнчə, Мединене галды. Соңра Мекгə дөнүп, Кəбеде хызматыны довам этди. Дөрт халыпаның дөврүнде болан  сөвешлере гатнашды.

    Ол ярадылышы тайдан мерт ынсанды. Хер кесе көмек этмек ислəрди. Хениз мусулман болманка, Умми Селеме разыяллаху анха Энемизе хызмат этди. Мүшрүклер оны əринден хем чагасындан айырыпдылар. Эбу Селеме   хиҗрет этди. О болса Мекгеде бир йыл айра галды. Эртир-агшам гөз яш дөкүп, Керемли Хакдан оглуна, əрине говушдырмагы үчин дога-дилег  эдерди.

    Соңра Умми Селеме разыяллаху анха Энемизе кабыласының рехими инип, Мединə гитмесине ругсат берди. Чагасыны-да гайтардылар. Мекгеден чыкып, Тениме геленлеринде Осман ибни Талха билен габатлашдылар.

    Осман олардан нирə баряндыкларыны сорады. Умми Селеме Энемиз:

   -Мединə-дийди. Бу җогабы эшиден Осман разыяллаху анху:

   -Аллахдан ант ичйəн, сен еке гойберилмерсиң-дийип, дүесини чөкерип, олары мүндирди.

   Дүйəни ийдип, тə  Куба обасына ченли олара ёлбелетлик этди. Куба   геленлеринде:

   -Әриң, ине шу обададыр-дийип,, Умми Селеме Энемиз билен чагасыны о ерде гоюп, өзем Мекгə гайтды.

    Умми Селеме разыяллаху анха Энемиз Осман ибни Талха разыяллаху анхуның бу херекетлеринден өрəн хошал болупды. Ол Османы бүтин  өмрүне диңе өвги билен ятларды. Ондан башга ягшылык сөер адам  гөрмедим диерди.

    Осман ибни Талха разыяллаху анху Муавияның дөврүне ченли яшады. Ол  хиҗретиң 42-нҗи йылында (милады йыл хасабының 622-нҗи йылында) Мекгейи-Мүкерремеде арадан чыкды. Керемли Хакдан шепагатларыны ныяз эдерис. Әмин.