Köpçülik tarapyndan oňlanylýan hasaplanýan, ýöne aslynda oňlanylmaýan ylmyň beýany
Bu bapda käbir ylymlaryň oňlanylmaýan ylym bolmagynyň, ylymlaryň atlarynyň üýtgedilmeginiň (olar fykh, towhyt, tezkir (zikr etmek), hikmet ylymlarydyr) sebäplerine, şerigat ylymlaryndan oňlanylýan hem oňlanylmaýanlaryna garalyp geçiler.
Belki, sen: «Ylym bir zadyň nämedigini bilmekdir» diýersiň. Bilmek Beýik Taňrynyň sypatlaryndandyr. Onsoň Taňry nähili zat bolup biler? Zat nähili ylym bolup biler? Eger «Ylmyň hut özi oňlanylmazlyga sebäp bolmaýar» diýseň,onda ol bendeleriň haky nukdaýnazaryndan üç sebäbe görä oňlanylmaýar.
Birinji sebäp, ol ylym eýesine ýa-da başga birine zyýan ýetirýär. Meselem, jadygöýlik we tilsimler ylmy bu sebäpden oňlanylmaýar. Jady ylmy bilen är-aýalyň arasyna jydalyk salynýar. Jady edilýändigi barada Gurhanda hem deliller bardyr. Pygamber alaýhyssalama hem jady edildi. Ol bu sebäpden syrkawlyga duçar boldy. Jebraýyl perişde oňa bu ýagdaý barada habar berdi. Pygamber alaýhyssalam guýynyň düýbündäki daşyň aşagyndan jadyny çykardy. Jady ylmynda daşlaryň häsiýetleri we ýyldyzlaryň dogýan wagtlary baradaky ylmy maglumatlardan peýdalanylýar. Beýle zatlary bilmeklik ylym ýüzünden ýazgarylmaýar. Şol daşlardan jadylanýan adamyň suratynda heýkel ýasalýar. Soňra mahsus ýyldyzyň dogýan wagtyna garaşylýar. Şol wagtda şerigata ters gelýän küpür we gödek sözler aýdylýar. Netijede, şeýtanlaryň goldaw bermegi gazanylýar. Bu zatlaryň jemi bilen jadylanýan adamyň halynda geň zat bolup geçýär. Ýöne ol zatlaryň üsti bilen adamlara zeper ýetirmeklik oňlanylmaýan zatdyr. Şeriň üstüne eltiji zat şerdir. Bu ýerden ol sebäpler oňlanylmaýan ylym bolýar. Welilere eýeren adamlar ol sebäpleri aradan aýyrmaga çalyşdylar we ol sebäpleri halkdan gizlediler. Eger bir kişi olar barada sorasa, duýduryş bermediler. Bu ýerden ýalan sözlemek adaty ýüze çykdy. Ol sebäpleriň nämelerdigini bilmek oňlanylýan,ýöne olary zyýan bermek üçin ulanmak oňlanylmaýan zatdyr.
Ikinji sebäp, köplenç ýagdaýda ol ylym eýesine zyýan beriji bolýar. Meselem, ýyldyzlar ylmy. Onuň özi ylym hökmünde oňlanylmaýan zat däldir. Çünki, bu ylym iki görnüşlidir. Birinji görnüş hasap bilen baglanyşyklydyr. Beýik Taňry günüň we aýyň ýöreýän ýolunyň hasaplydygy barada: «Gün we aý hasap bilen ýöreýär»[1] we «Biz aýyň ýöremegi üçin menzilleri (duralgalary) kesgitledik»[2] diýdi. Hökümler we olaryň netijeleri hadyslaryňüsti bilen delil gözlemäge sezewar edýär. Munuň özi tebibiň gan damarlarynyň basyşyny ölçäp, haýsy keseliň geljekde ýüze çykjakdygyny kesgitleýşi ýalydyr. Munuň özi Taňrynyň öz bendeleri üçin goýan ýoluny we adatyny bilmekdir. Emma şerigat muny oňlamaýar.
Pygamber alaýhyssalam: «Eger takdyrdan bir zat agzalsa, dymyň. Eger ýyldyzlar barada bir zat aýdylsa dymyň. Eger sahabalarym hakynda bir zat aýdylsa dymyň» diýdi. Pygamber alaýhyssalam ýene: «Men özümden soň ymmatym üçin üç sany zatdan gorkýaryn: hökümdarlaryň zulumyndan, ýyldyzlara ynanmakdan we takdyryň ýalan saýylmagyndan» diýdi.
Omar ibn Hattap (goý, Taňry ondan razy bolsun!): «Ýyldyzlary gury ýerde hem deňizde gije ýola gönüger ýaly derejede öwreniň. Ýyldyzlary mundan artykmaç öwrenjek bolmaň» diýdi. Ol bu sözünde üç sany sebäpden ugur alýar:
Birinjiden, ýyldyzlar ylmy adamlaryň köpüsine peýdasyzdyr. Eger olara: «Her bir hadysa ýyldyzlaryň täsiri astynda ýüze çykýar» diýilse, onda olaryň kalplaryna: «Ýyldyzlar hemme zady tertip-nyzama salýarlar» diýen bozuk pikir düşer. Olar: «Ýagşy-ýaman ýyldyzlardan gelip çykýar» diýip bilerler we Taňrydan daş düşerler. Olaryň nazarlary ýyldyzlaryň syrlaryna göz ýetirmekden ejizdir. Düýpli ylmy bar bolan alym günüň, aýyň we ýyldyzlaryň Beýik Taňrynyň erkine tabyndygyny bilýär. Ejiz bendäniň gün şöhlesi baradaky pikiriniň mysaly göýä bir garynjanyň mysaly ýalydyr. Eger garynja akyl berilse, onda ol kagyzyň gyrasynda durup, hata seredip: «Bu hat galamyň işidir» diýer. Onuň nazaryna galamy tutup duran barmaklar we el ilmeýär. Onuň akyly kätibiň galama hereket beriji erkine asla çatmaýar. Güýji we eli ýaradyjy Taňry barada-ha onda asyl pikir hem ýok. Mahlasy, adamlaryň pikirleri hem edil şunuň ýalydyr. Olaryň nazary ýakyn zatlaryň sebäplerine aň ýetirmek bilen ýetmeýär. Munuň özi ýyldyzlar ylmyny içgin öwrenmekligiňi gadagan edilmeginiň sebäpleriniň biridir.
Ikinjiden, ýyldyzlaryň hökümleri takmynan çaklama bilen alynýar. Şonuň üçin ol hökümler bendeleriň hakyna mahsus däldir. Çaklama hökümler anyk bilmezlik sebäpli ýüze çykýar. Ýyldyzlar ylmy köklerini Idris alaýhyssalamyň görkezen mugjyzalaryndan alýar. Ol ylym häzir unudylan ylymdyr. Müneçjimiň aýdýan zatlarynyň onuň bilen baglanyşygy ýokdur we tötänlikdir. Tötänlik bolsa, käbir sebäplere esaslanýar. Käbir sebäpler bilen hakykaty anyk kesgitläp bolmaýar. Taňrynyň ýyldyzlarda goýan syrlaryny kesgitlemek mümkinçiligi ynsanda ýokdur. Eger Taňry galan sebäpleri hem müneçjimiň sözlerine laýyk etse, onda onuň sözi hakykat ýaly bolup görner. Eger Taňry müneçjimiň sözlerini laýyk etmese, onda ol ýalňyşar. Munuň özi ynsanyň «Şu gün ýagmyr ýagarmy?» diýen soragyna jogabynyň çaklama bolşy ýalydyr. Ol buludy görse: «Bu gün ýagyş ýagar» diýýär. Eger asmanda bulut bolmasa: «Bu gün ýagyş ýagmaz» diýýär. Ýöne onuň buluda garap jogap aýtmagy ýeterlik bolmaýar. Çünki, ol başga sebäpleri bilmeýär. Gämiçiniň ýoluň ýagdaýyna salgylanyp: «Gämi howpdan salamat bolar» diýip kesgitlemegi hem edil şunuň ýaly ýagdaýdyr. Çünki, ýeliň sebäpleri oňa mälim däldir. Ol sözüni takmynylyk bilen aýdýar. Şonuň üçin gämiçi ýalňyşyp hem biler, onuň pikiri dogry hem çykyp biler. Bu sebäpden ýyldyzlara görä ynsanyň halyny kesgitlemek ygtybarlyga eýe däldir.
Üçünjiden, ýyldyzlar ylmyndan peýda azdyr. Oňa meşgul bolmak ynsanyň iň gymmatbaha bolan ömrüni zaýa edýär. Pygamber alaýhyssalam bir adamyň daşyna jemagatyň üýşýändigini gördi. Adamlar ony üns berip diňleýärdiler. Pygamber alaýhyssalam: «Bu kişi kim?» diýip sorady. Olar: «Bu adam beýik alym» diýdiler. Pygamber alaýhyssalam: «Ol nämäniň alymy?» diýdi. Olar: «Ol şygyrýetiň inçe syrlaryny we araplaryň nesil şejeresini bilýän alym» diýdiler. Pygamber alaýhyssalam: «Onuň ylmy peýda bermeýän ylymdyr we zyýan etmeýän nadanlykdyr» diýdi. Pygamber alaýhyssalam: «Ylym hökümi bar bolan aýatdyr, ygtybarly hadyslardyr we adyl parzlardyr» diýdi. Diýmek, ýyldyzlara garap ynsanyň täleýini kesgitlemek akylsyzlykdyr we peýdasyz nadanlykdyr. Bu ýerden täleýiň Taňrynyň öňden kesgitlän zadydygy we ondan gaçyp gutulmagyň mümkin däldigi gelip çykýar. Tebipçilik barada aýdylanda, ol munuň tersinedir. Çünki, ynsan oňa mätäçlik çekýär. Onuň köp delilleri ynsanyň hajatyna laýyklykda çykarylýar. Düýşüň ýorgudy hem takmynydyr. Ol pygamberligiň kyrk alty bölüminiň biridir. Onda howp-hatar ýokdur.
Üçünji sebäp, ylma ýaňy giren adama heniz ylymdan peýda ýokdur. Şonuň üçin bu ylym onuň hakyna oňlanylmaýan ylymdyr. Çünki, entek ol ylmyň inçe ýerlerini bilmeýär. Taňryhonlyk (ylahy) ylmynyň syrlaryndan ol pelsepeçi alymlar we mütekellimler[3] ýaly heniz özbaşdak baş çykarmaýar. Ylmyň inçe syrlaryna pygamberler we weliler ýaly çuňňur aralaşmak köpçülige mahsus däldir. Näçe adamlar şeýle niýet bilen wagtlaryny zaýaladylar we maksatlaryna ýetmediler! Olar ylmyň giriş makamynda saklanan bolsalar, ýagşy bolardy. Ylmyň käbir adamlar üçin zyýanlydygy inkär edilmeýär. Munuň emýän çaga guşuň etiniň ýa-da gaty süýji iýmitiň zyýanly bolşy ýalydyr. Nadanlygyň (bilmezligiň) hem käbir işlerde peýdasy bardyr.
Bir hekaýatda şeýle aýdylýar: Bir adam aýalynyň göwreli bolmaýandygyndan tebibe arz etdi. Tebip onuň aýalynyň gan damarlarynyň basyşyny barlap, ol aýala: «Saňa göwreli bolmagyň üçin däri-derman edip oturmagyň asla hajaty ýok. Sen aňyrsy kyrk günden ölersiň» diýdi. Ol aýal bu habary eşidip, hesret laýyna batdy we iýmek-içmekden galdy. Tebibiň aýdan kyrk gün möhleti ötdi. Emma ol aýal ölmän diri galdy. Aýalyň äri tebibiň ýanyna geldi we oňa aýalynyň ölmän diri galandygyny aýtdy. Tebip: «Men onuň ölmejekdigini şol wagt bildim. Ol semizdi we ýatgysynyň agzyny ýag baglapdy. Men ondan semizligi gidirmek üçin şeýle etdim. Indi, sen öýüňe baryp, aýalyňa ýakynlyk et! Hudaý halasa, ol göwreli bolar» diýdi.
Munuň özi käbir zatlary bilmegiň eýesi üçin hatarlydygyny aňladýar. Eger bu hekaýata üns berseň, Pygamber alaýhyssalamyň: «Biz peýda bermeýän ylymdan Taňrynyň öz penasynda saklamagyny dileýäris» diýen sözüniň manysyna düşünersiň. Sen bu hekaýaty ygtybarly hasapla we şerigatyň oňlamaýan ylymlaryny derňeýji bolmakdan saklan! Pygamber alaýhyssalamyň sünnetine uý we sahabalara (goý, Taňry olardan razy bolsun!) eýer! Çünki, olara uýmakda howp-hatardan salamatlyk bardyr. Öz pikiriňden gelip çykýan delilleri köpeltme! Özbaşdak pikir ýöretmekde we syrlary derňemekde howp-hatara düşmek bardyr. «Men zatlaryň hakykatlaryny bilmek üçin derňew geçirýärin» diýip getirýän tutarykdyr tassyknamalaryň ylymda zyýanlydyr.
Ökde tebipler dertleri bejermekde nadan tebiplerden tapawutlanýarlar. Pygamberler bolsa kalplaryň tebipleridir, alymlar bolsa ahyret durmuşynyň sebäplerini bilijilerdir. Olar bu nukdaýnazardan beýleki adamlardan tapawutlanýarlar. Sen öz akylyň bilen olaryň goýan ýollaryna degişli hökümleri çykarma, bolmasa heläk bolarsyň. Çünki, şerigatyň syrlaryny derňemek akylyňa sygmaz. Munuň özi sada adamlaryň magnitiň demri özüne çekmeginiň syrlaryndan baş çykaryp bilmeýişleri ýalydyr.
Şerigatyň täsin hem ajaýyp syrlary bar. Olar Taňrynyň dergähinde adamlaryň kalplarynyň päk bolmagy üçindir. Munuň özi däri-dermanlaryň peýdalaryna köp adamlaryň aň ýetirip bilmeýişleriniň mysalyna meňzeşdir.
Tejribe syrlara aň ýetirmegiň serişdesidir. Ahyretde nepi ýetjek zada aň ýetirmek çäkli bolsa hem, tejribe oňa tarap ýol goýujydyr. Eger ölüler direlip gelýän bolsalar, onda olar bize Taňrynyň dergähine ýakynlaşmagyň peýdaly ýollaryny we Ondan daşlaşdyryjy sebäpleri aýdardylar. Akyda[4] barada aýdylanda hem edil şunuň ýalydyr. Saňa Pygamber alaýhyssalamyň dogruçyllygyna ynanmaga gönükdiriji zatlara aň ýetirmegiň we onuň görkezmelerine düşünmegiň ýeterlikdir.Akylyňy mundan artyk kösençlige sezewar etme! Çünki, Pygamber alaýhyssalam: «Ylymdan hem nadanlyk gelip biler, akyldan hem nadanlyk gelip biler» diýdi. Ylmyň nadanlyk däldigi bellidir. Ýöne nadanlyk ylma täsirini ýetirip biler. Pygamber alaýhyssalam: «Köp ylymdan az üstünlik ýagşydyr» diýdi. Isa alaýhyssalam: «Agaçlar köpdür. Emma olaryň hemmesi miwe getirmeýär. Ylymlar hem köpdür. Ýöne olaryň hemmesi ýagşy hem peýdaly ylym däldir» diýdi.
[1]Gurhanyň 55-nji «Rahman» süresiniň 5-nji aýaty.
[2]Gurhanyň 36-njy «Ýasyn» süresiniň 39-njy aýaty.
[3] Mütekellim– kelamylmynyň alymy.
[4] Akyda– ynanç.