Çekişmeleriň sahabalaryň nesihatlaryna meňzedilmeginiňwe olar bilen garyşdyrylmagynyň beýany.
Eger biler bolsaň, çekişmeçiler adamlara: «Çekişmelerden biziň maksadymyz hakykaty aýan etmekdir. Çünki hakykat gözlenilýän maksatdyr, ylmyň nazaryýetine ýardam bermekdir.Pikirleriň deň gelmegi peýdaly we täsirli zatdyr. Sahabalar her bir meselelerde geňeşerdiler. Meselem, olar mirasda ata bilen dogan meselesi, şerap içýänlere berilýän jezanyň mukdary, ýalňyşan ylma garamat edilmeginiň wajyplygy, bir aýalyň Omardan (goý, Beýik Taňry ondan razy bolsun!) gorkusyna göwresindäki çagany düşürendigi baradaky meseläniň çözgüdini, şeýle-de paraýyz meseleleri barada geňeşerdiler» diýip, adamlary bulaşdyrýarlar. Şeýle-de olar Şapygy, Ahmet, Muhammet ibn Hysym, Mälik, Abu Ýusup we beýleki alymlardan (goý, Beýik Taňry olardan razy bolsun!) dürli meseleleriň çözgütlerini mysal getirýärler.
Meniň saňa aşakda aýtjak zadym seni olaryň mekirligi bilen tanyşdyrar. Çünki hakykaty gözlemeklige ýardam bermeklik dindendir (dinlilikdir).
Ýöne dinde hakykaty gözlemegiň sekiz sany şerti we alamatlary bar:
Birinji şert.Parzyaýn amallaryny özleşdirmedik kişiniň parzykifaýa amallary bilen meşgul bolmazlygy. Parzyaýny özleşdiren kişi parzykifaýany öwrenmäge başlasa dürsdür. Ýöne onuň: «Meniň maksadym hakykatdyr» diýmegi rowa däldir. Onuň bu ýagdaýdaky haly özi namaz okamagy taşlap, eşiklerini çykaryp: «Meniň maksadym – ýalaňaç adamlary namaz okamakdan halas etmekdir» diýýän adamyň ýagdaýyna meňzeşdir.Meselem, fakyh şerigatda seýrek gabat gelýän meseläniň mejlisinde gürrüňi ediljek zatdygy barada pikirlenmelidir. Bir kişi derrew gaýtaryp bermeli amanaty barka, ony bermän iň uly ybadat bolan namazy okamaga başlasa, onda Allatagalanyň öňünde günäkär bolar.Kişiniň wagtyny, tertibini we şertini berjaý etmezden, ybadata meşgul bolmagy onuň kalbynyň Taňra tabynlyk halyna düşmegi üçin ýeterlik däldir.
Ikinji şert.Parzykifaýany çekişmäniň möhüm serişdesi hökmünde görmezlik. Kim parzykifaýany möhüm zat hasaplasa we ony parzyaýn ýaly berjaý etse, onda beýle hereketi bilen günäkär bolar. Munuň özi suwsan adamlary gören kişiniň olary heläk bolmaga ýakyn hasaplamagynyň mysaly ýalydyr. Olary gören kişi suw berip, heläkçilikden halas edip biler. Gan aldyrmagyň ýagdaýlaryny öwrenmek parzykifaýadyr. Jedelçi adam bolsa: «Gan aldyrmak parzykifaýa däldir, parzyaýndyr» diýip tekrarlaýar. Gan aldyrmagyň ýagdaýlaryny bilmek şäherde diňe birnäçe adama parzyaýndyr.
Parzykifaýa tebipçilik ylmy has ýakyndyr. Köp şäherlerde musulman tebipler azdyr. Şerigat boýunça musulman tebibiň kesgitlemelerine ynam etmek rowadyr. Ýöne fakyhlaryň biri hem tebipçilik ylmy bilen meşgullanmaga höwes etmeýärler. Emri magruf we nehi münker barada aýdylanda, olar hem parzykifaýadyr. Jedelçi çekişme mejlisinde ýüpek eşikleri geýip, parzykifaýa barada ündew edýär we özüniň parzykifaýa bilen Taňra ýakynlyk isleýändigini tekrarlar. Enesden (goý, Taňry ondan razy bolsun!) rowaýat edilen bir hadysda, pygamberlerimizden: «Emri magrufy we nehi münkeri haçan terk etmeli?» diýip soraldy. Pygamber alaýhyssalam: «Siziň ýagşyňyzda gowşaklyk görülse, erbetleriňizde erbet işler köpelse, dolandyryş kiçiňiziň eline geçse, fykh ylmy bozuklaryň elinde bolsa» diýdi.
Üçünji şert. Çekişmä gatnaşýanyň müjtehit alym[1] bolmagy zerur.Ol bir ymamyň mezhebiniň meseleleri boýunça çekişmä gireninde, onuň bir delilini Abu Hanapynyň kesgitlemelerinden, beýleki bir delilini Şapygynyň ýa-da beýleki ymamlaryň kesgitlemelerinden almazlygy gerek. Sahabalaryň we ymamlaryň ijtihady[2] ýaly bolmaly. Bolmasa oli jtihat derejesi bolmadyk kişiniň çykaran hökümi bolar. Ol sowal beren kişiniň özüniň mezhebine salgylanyp, pitwa çykarmalydyr. Özünden netije çykaryp, sowala jogap berip bilmese, onda onuň gurnan çekişmesinden ne peýda bar? Müjtehit bolmandygy sebäpli oňa sowala jogap bermek başartmaýar we: «Men şerigatyň usulyýetinden özbaşdak many çykaryp bilmeýärin» diýmekden başga çäre galmaýar. Eger onuň jogap berýän meselesi iki manydan ýa-da iki sözden ybarat bolsa, onda ol iki sözüň birine meýil eder, iki sözüň birini peýdalanar we pitwa çykarar. Netijede, meseläniň jogaby aýdyňlaşdyrylmaz.
Dördünji şert. Köp gabat gelýän meseleler barada çekişmeler gurnamak. Çünki, sahabalar (goý, Taňry olardan razy bolsun!) täze wakalaryň ýüze çykyşyna görä ýa-da paraýyz ýaly köp gabat gelýän meseleler jähetden geňeşerdiler.
Biz çekişmä gatnaşýanyň pitwalarda giňden ulanylýan meselelere tankydy göz bilen garamaýandygyny görýäris, tersine ol köp gabat gelýän meseleleriň çözgütlerini terk edýär we: «Beýle meseleler çekişme gurnamaga mynasyp däl» diýýär. Biz bu ýerde bu mowzuga degişli sözümizi uzaldyp oturmakçy däl. Çünki, maksat söz uzaltmakda däl-de, eýsem gysga söz bilen hakykaty aýan etmekdedir.
Bäşinji şert. Çekişmäniň hökümdarlaryň, at-abraýly adamlaryň gatnaşmagynda däl-de, eýsem çola ýerde gurnalmagy ýagşydyr. Çola ýer pikirleri jemlemek, aňlary durlamak, hakykata düşünmek üçin oňaýlydyr. Dürli gatlaklaryň wekilleriniň gatnaşmagy çekişmeçä ikiýüzli pikirini öňe sürmäge ýol goýmaýar. Çünki, her kişi hak-nähak pikiriniň dabaralanmagyna meýilli bolýar. Sen olaryň meýliniň Taňrynyň razylygy üçin däldigini ýa-da orta goýlan meseläniň dürs çözgüdiniň kabul edilmegi üçin däldigini bilýänsiň.
Altynjy şert. Hakykaty gözlemegiň ugrunda bolmak, ýoldaşyňa göriplik etmän, ýardamçy bolmak, hataňy ýüze çykarsa, oňa minnetdar bolmak, oňa hakykaty aýan etmek, ýalňyş pikire düşse düzetmek, ony beýle pikir üçin ýazgarmazlyk, tersine, hormatlamak. Sahabalar (goý, Taňry olardan razy bolsun!) özlerini şunuň ýaly alyp barardylar. Bir aýal Omaryň (goý, Taňryň ondan razy bolsun!) sözüni ret edip, ony hakykata meýillendirdi. Hezreti Omar soňra bir hutbasynda adamlara ýüzlenip: «Bir erkek adam ýalňyşdy, bir aýal bolsa dogrusyny tapdy» diýdi. Bir adam Alydan (Goý, Taňry ondan razy bolsun!) bir mesele barada sorady: Aly oňa jogap berdi. Ol adam: «Eý, möminleriň emiri! Beýle däl, şeýle bolmaly» diýip, dogrusyny aýtdy. Aly: «Sen dogrusyny aýtdyň, men bolsa ýalňyşdym. Elbetde, her bir bilijiden ökde ylymdar bardyr» diýdi. Bir adam Abu Musa Aşgarydan[3] (goý,Taňry olardan razy bolsun!) söweşde öldürilen adam barada sorady. Abu Musa: «Ol jennete düşer» diýdi. Muny eşidip, Ibn Mesgut: «Sen bu sowalyňy ondan ýene-de sora. Belki, ol düşünen däldir» diýdi. Ol adam şol sowalyny ýene berdi. Abu Musa öňki jogabyny gaýtalady. Ibn Mesgut ol adamy üç gezek ýollady, soň bolsa: «Eger ol Allanyň ýolunda haky tapyp, öldürilse, jennete girjekdigi hakakytdyr» diýdi. Abu Musa: «Bu sözüň hakdyr. Alym barka menden hiç zat soramaň. Eger bu meseläni bir fakyhdan sorasaň, ibn Mesgudyň sözüni kabul etmez we garşy çykyp, ibn Mesgudyň «Alla ýolunda haky tapyp, öldürilse» diýen sözüniň ret eder. Çekinse-de, «Muňa mätäçlik ýok. Çünki bu hemmeleriň bilýän zadydyr» diýer» diýdi. Sen öz zamanaňyň çekişmeçisini synla,ol kim hakykatyň tarapyny tutsa, göripliginden ýaňa onuň ýüzüni gara etmäge taýýar. Ol onuň üstüne gudratynyň çatyşyna görä hüjüm edýär. Ol ähli ömrüni hakykaty düşnükli etmek üçin geçiren adama aýp ýöňkemäge utanmaýar? Ol özüni sahabalara (goý, Taňry olardan razy bolsun!) meňzedýär.
Ýedinji şert. Çekişmeçiniň delil üstüne delil getirmegini we kyndan kyn sowal bermegini gadagan etmezlik. Sahabalaryň çekişmeleri bu şerti berjaý edip geçerdi. Şeýlelikde, jedeldäki bedgat garaýyşlar ýüze çykarylardy. Meselem çekişmeçiniň: «Seniň bu sözüň birinji sözüňe ters gelýär. Men ony kabul etmeýärin» diýmegi. Eger munazaraçynyň[4] sözi hakykaty ýüze çykarsa, onda bozuk pikir inkär edilýär we hakykat kabul edilýär.
Sen her mejlisiň, çekişmäniň bir garaýşy goramak bilen tamam bolýandygyny görýänsiň. Onda delil getirijileriň pikirleri garaýyşlaryň asly bilen deňeşdirilýär. Oňa: «Seniň bu garaýşyň aslyna bolan deliliň näme?» diýilýär. Ol: «Bu kadadaky hökümiň bu sebäp bilen subut edilýändigine, seniň deliliň näme?» diýýär. Ol onuň getiren delillerinden başga delilleri getirýär. Jedel edýän jedele garşy durýanyň delillerini inkär ediji delilleri aýdýar. Şunuň ýaly usul bilen çekişme mejlisleri sowalyň aslyny aýan etmek maksadyny yzarlaýar. «Men bu sowalyň jogabyny bilýärin» diýip başlan mejlis «Ýok, men bu sowalyň jogabyny bilmeýärin» diýýänçä dowam edýär. Eger ol beýle ýagdaýa düşse, onda özüniň ejiz tarapyny görkezýär. Ol göripliginden boş dawany gurnaýar. Netijede, Taňrynyň öňünde günäkär bolýar. Eger onuň sözi dogry çyksa, bu ýagdaýda şerigatdan bilýän zadyny aýan etmedik kişi hökmünde günäkär bolar. Çünki, onuň musulman dogany ondan bu sowal barada sorady. Eger onuň delilleri güýçli bolsa, onda ol adamlaryň ünsüni özüne çeker. Eger onuň delilleri gowşak bolsa, onda ony nadanlyk garaňkylygyndan ylym nuruna çykararlar. Sowalyň üsti bilen din ylymlarynyň hakykatyny ýüze çykarmak peýdalydyr. Sowalyň hakyky jogabyny ýüze çykarmak üçin delil üstüne delil getirmegi sahabalar hem, ilkinji alymlar hem gadagan etmediler. Munuň üçin kyýasda,[5] hadyslarda we aýatlarda bar bolan deliller ulanylýar.
Sekizinji şert. Eger biler bolsaň, munazaradan yzarlanylýan maksat – garşydaşyňdan üstün bolmakdan, onuň agzyny ýumdurmakdan, artykmaçlygyňy, mertebäňi we dilewarlygyňy ýüze çykarmakdan ybaratdyr. Ylym bilen meşgul bolýanyň dürli garaýyşlary deňeşdirmezden netije çykarmakdan häzir bolmagy gerek. Galapyn mertebeli we at-owazaly alymlar bilen çekişme gurnamakdan olaryň dilinden hakykatyň ýüze çykmagyndan wehm edip saklanýarlar we başgalar bilen bozuk garaýyşlaryny rowaçlandyrmak üçin çekişme gurnamaga meýilli bolýarlar.
Başga ownuk şertler hem köpdür. Ýöne şu sekiz şerti bilmek saňa Taňrynyň razylygy üçin çekişmä gatnaşmaga gollanma bolar.
Kim şeýtan bilen az çekişme guramasa, ol kalbyny şeýtana eýerdýändir. Şeýtan bolsa, onuň iň uly duşmanydyr. Şeýtan ony heläkçilige tarap meýillendirýär we ters meseleler boýunça jedelleşmäge iterýär. Şeýtan onuň we ýagşy adamlaryň üstünden gülýär. Şeýtan onuň beýle betbagtçylyga düşmegine şat bolýar we ony nadanlygyň apatlaryna sezewar edýär. Biz nadanlygyň apatlarynyň görnüşleri barada yzda aýdarys. Häzir bolsa biz Beýik Taňrydan özümize ýardam bermegini dileýäris!
[1]Müjtehit alym– durmuşda ýüze çykýan meseleleriň çözgütlerini özbaşdak çykarmaga hykugy bar bolan alym.
[2]Ijtihad– durmuşda ýüze çykýan meseleleriň çözgütlerini özbaşdak çykarmaga bolan ukyp.
[3]Abu Musa Aşgary – sahabalaryň biri. Ol 672-nji ýylda dünýäden ötýär.
[4]Munazaraçy – edebibäsleşigegatnaşýanadam.
[5]Kyýas– deňeşdirme usulyny ulanmak bilen netije çykarmak.