Ýol salgy beriji mugallymyň (piriň) wezipeleriniň beýany.
Biler bolsaň, ynsanyň mal gazanmakda bolşy ýaly, ylym öwrenmekde hem dört sany haly bolýar. Mal eýesiniň peýda almak haly bar. Ol bu haly bilen baýlyk gazanýar. Onuň gazanan malyny saklamak haly bar. Ol bu baýlygyny saklamak bilen baý bolýar. Onuň baýlygyny özüne sarp etmek haly bar. Bu ýagdaýda ol baýlygyndan peýdalanyjy bolýar. Onuň baýlygyny başgalara harç etmek haly bar. Bu ýagdaýda ol sahy we sogap eýesi bolýar. Bu hal onuň hallarynyň iň hormatlysydyr. Ylym barada aýdylanda hem ynsanyň hallary edil şunuň ýalydyr. Ylym hem mal gazanylyşy ýaly gazanylýar. Ylmy gözlemek we gazanmak haly bar. Ylma eýe bolmak haly bar. Bu halda ol başgalara sowal bermekden özüni dyndyrýar. Onuň aýdyňlaşma haly bar. Bu halda ol öwrenen zatlaryna düşünýär we olardan özi peýdalanýar. Onuň özgelere öwretmek haly bar. Bu hal onuň hallarynyň iň hormatlysydyr. Kim öwrense, öwrenen zadyna amal etse we öwrenen zadyny başgalara öwretse, ol many äleminde beýik adam saýylýar. Onuň mysaly gün ýalydyr. Günüň özi ýagtydyr we başgalara ýagtylyk berýändir. Onuň mysaly hoşboý ysly müşk ýalydyr. Müşküň özüniň hoşboý ysy bar we ol özgelere-deýakymly ys ýaýradýar. Bilýän zadyna amal etmeýän kişi sahypalary ylymdan doly depder ýalydyr. Ondan başgalar peýdalansa hem, onuň özüne peýdasy ýokdur. Ýa-da ol çalgy daşynyň mysaly ýalydyr. Çalgy daşy pyçagy ýiteldýär, özi bolsa ýitelmeýär. Ýa-da ol iňňäniň mysaly ýalydyr. Iňňe özgeleri geýindirýär, özi bolsa çyplaklygyna galýar. Ýa-da şemiň mysaly ýalydyr. Şem özgelere ýagtylyk berýär, özi bolsa ýanyp gutarýar. Öz ylmyndan özi peýdalanman, başga kişiler peýdalanan kişi barada şahyrlaryň biri şeýle aýdypdyr:
Ol kişiniň mysaly göýä bir şem ýalydyr,
Özgä berer ýagtysyn, ýanmak oň ykbalydyr.
Özi kämillige ýetişen adam ylym öwretmek işine başlamak bilenuly bir işi boýnuna alýandygyny we hormatly işe girişýändigini bilmelidir. Bu jähetden mugallymyň berjaý etmeli sekiz wezipesi bardyr.
Birinji wezipe.Ol mugallymçylygyň edeplerini, şägirtlere mähribanlygy saklamalydyr we olara öz çagalary ýaly garamalydyr. Pygamber alaýhyssam: «Meniň size garaýşym kakasynyň ogluna bolan garaýşy ýalydyr» diýdi. Kakasy ogluny dünýäniň odundan goraýşy ýaly Pygamber alaýhyssalam hem ymmatyny dowzah odundan goraýar. Dowzahyň odundan goramak dünýäniň odundan goramakdan has möhümdir. Bu sebäpden mugallymyň haky ata-enäniň hakyndan beýikdir. Ata-ene çaganyň pany dünýä gelmegine, mugallym bolsa, onuň ebedi bagtyýar bolmagyna sebäpkärdir. Eger mugallym bolmasa çaganyň kakasyndan alan endigi ony heläkçilige we bagtsyzlyga eltmegi mümkin. Ahyretde oňa ebedi bagtyýarlyk gazandyrjak mugallymdyr. Men bu ýerde «mugallym» diýmek bilen ahyret alymlaryny we ahyret ylymlaryna ýetişdiriji dünýewi ylymlary öwredýän mugallymlary göz öňünde tutýaryn. Emmadiňe dünýewi maksatlar üçin ylymlary öwretmekden, özüňi hem, şägirdiňi hem heläkçilige düşürmekden Taňrynyň özi bizi penasynda saklasyn!
Atasynyň çagalarynyň hemmesini gowy görşi, olary maksada gönükdirişi ýaly, mugallymyň hem hemme şägirtlerini gowy görmegi, olary maksada gönükdirmegi wajypdyr. Eger olaryň maksatlary ahyret bagtyýarlygy bolsa, onda olar maksatlaryna ýeterler. Eger olaryň maksatlary dünýälik bolsa, onda olar maksatlaryna ýetmezler. Tersine, aralarynda göriplik, duşmançylyk ýaly ahlaklar peýda bolar. Çünki, ahyret maksadyny tutan alymlar we şägirtler Taňrynyň razylygy üçin ýola çykan ýolagçylardyr we dünýäden ahyrete tarap aýlap, ýyllap dürs ýol ýöreýjilerdir. Olaryň arasynda duşmançylyk, göriplik ýaly ahlaklar ýüze çykmaýar, tersine, olary biri-birine mähriban bolmak, gowy görüşmek ýaly ahlaklar gurşap alýar. Onsoň Firdöws jennetine ýol tutanlaryň arasyndaky mähribanlygyň nähili uly boljakdygyny oýlap görüber! Çünki, ahyret bagtyýarlygynda darlyk ýokdur. Şonuň üçin ahyret ýolagçylarynyň arasynda dawa-jenjel bolmaýar. Olaryň arasyna dünýewi bagtyýarlykda hem göriplik aralaşmaýar. Olar duşmançylyk sebäpli gysylmakdan halasdyrlar we ylym öwrenmekde biri-birlerine adalatlydyrlar. Beýik Taňry: «Möminler biri-birlerine dogandyrlar»[1] diýdi.
Beýik Taňry ýene: «Ol günde dostlar biri-birine duşmandyr, meger, diňe (Alla ýolunda dostlaşan) takwalar (baky dostluga ýetýändir)»[2] diýdi.
Ikinji wezipe– ylym öwretmekde şerigata Pygamber alaýhyssalama uýmalydyr. Ylym öwretmekden hak talap etmeli däldir. Mugallym bu işde talypdan minnetdarlyk hantama bolmaly däldir, eýsem maksady Taňrynyň razylygyny gazanmak, oňa ýakynlyk tapmak bolmalydyr. Ol özüniň bu işini talyplara ýagşylyk edýän hökmünde görmän, belki olar üçin sogap diýip bilmelidir. Çünki, talyplar ylym öwrenmek bilen kalplaryny terbiýeleýärler. Şeýlelikde Taňra ýakynlyk gazanmakda mugallym mellegini ekin ekmäge kireýine beren kişiniň mysaly ýaly bolar. Ýöne mugallymyň ylym tohumyny ekip aljak peýdasy ýer eýesiniň aljak peýdasyndan köpdür. Onuň Taňrynyň dergähinden ylym öwretmek işinden aljak sogaby talybyňkydan köp bolsa, onsoň ol nähili minnet etjekmiş? Eger talyp bolmadyk bolsa, onda ol beýle sogap almazdy. Goý, ol Taňrydan başga birinden muzd gözlemesin! Beýik Taňry bu jähetden: «Men[3] bu iş, (ýagny pygamberligi size ýetirmek) üçin sizden muzd soramaýaryn. Meniň muzdumy bermek Taňrynyň boýnundadyr»[4] diýdi. Çünki, mal we dünýä barlyklary bedeniň hyzmatyny edýär. Beden bolsa ruhuň ulagydyr. Bu ýerde ylmyň hyzmaty edilýär. Ruh bolsa ylym bilen hormatly bolýar. Kim ylym bilen mal talap etse, onda onuň mysaly köwşüniň aşagyny arassalamak üçin ony ýüzi bilen süpürýän adam ýaly bolar. Bu ýerde hyzmat edýän hyzmat edilýäniň, hyzmat edilýän hyzmat edýäniň ornuna bolar. Ylym bilen mal talap edýäniň kyýamat güni Taňrynyň dergähinde başy aşak bolar. Hususan aýdylanda, sogap hem, ýagşylyk hem mugallym üçindir.
Indi seret, din edarasy nähili adamlaryň ellerine geçdi. Olar fykh, kelam ylymlaryndan, ylym öwretmekden maksatlarynyň Taňra ýakynlyk gazanmakdygyny nygtaýarlar. Özleri bolsa mal, mertebe gazanmak bilen başagaý bolýarlar. Mugallym talypdan muzd talap edýär, ondan hakly-haksyz öz duşmanyna duşman, dostuna dost bolmagyny isleýär, her bir işde öz emrine boýun bolmagy buýurýar. Talyp onuň hyzmatyna durup, mal harç edýär, kemsitmelere sezewar bolýar. Eger talyp onuň talaplarynyň birini berjaý etmese, ony özüne duşman hasaplaýar. Mundan soň hem ol: «Meniň okatmakdan maksadym ylmy adamlaryň arasyna ýaýmakdyr, dine ýardam bermekdir, Taňra ýakynlyk gazanmakdyr» diýýär. Özüniň bu halyna utanmaýar, tersine öwünýär. Sen şunuň ýaly ýoldan çykmalara delil bolýan alamatlara bak we pent al!
Üçünji wezipe– mugallym talyba nesihat berip, her bir zatdan ýeterlik mukdarda öwretmelidir. Ol ony halypa laýyk bolmadyk zatlary öwrenmekden, zahyr manylary öwrenmezden batyn manylary öwrenmäge girişmekden saklamalydyr, ýagny ony aýan ylymlary öwrenmezden ýaşyryn ylymlara meşgul bolmakdan saklamalydyr. Mugallym talyba ylym öwrenmekden maksadyň bäsleşmek, jedelleşmek däldigini, eýsem Taňra ýakynlyk gazanmakdygyny düşündirmelidir. Bozuk alymyň talybyň kalbynyň düzelmeginden bozulmagyna ýetirýän täsiri köpdür. Eger talybyň maksady dünýä üçin fykh ylmyndan gapma-garşy garaýyşlary, kelam ylmyndaky jedelli meseleleri, dawalar baradaky pitwalary we hökümleri öwrenmek bolsa, mugallym ony beýle maksatdan saklamalydyr. Beýle ylymlar ahyret ylymlaryndan däldir we olar Taňrynyň razylygy üçin öwrenilen ylymlardan bolmaz. Taňrynyň razylygy üçin öwrenilýän ylymlar fykh we hadys ylymlarydyr, sahabalaryň öwrenen ahyret ylmydyr, ahlak bilen tanyşdyryjy we nebsi düzediji ylymlardyr. Talyp bu ylymlary dünýä maksady üçin öwrenýän bolsa, onda oňa sapak bermegi goýbolsun etmegiň zyýany ýokdur. Çünki, ol adamlardan zat hantama bolup ýa-da olary özüniň yzyna eýertjek bolup ylym öwrenýär. Mugallym başdan talybyň beýle maksada uýmaly däldigini duýdurmalydyr we dünýäni ahyretden öňe tutmagyň Taňrynyň azabyna sezewar boljakdygyny tabşyrmalydyr. Şeýle bolanda talybyň niýetini düzeltmek ähtimallygy bardyr. Ol adamlara wagyz edende özi hem sapak alyp biler. Onuň edýän wagzy guş üçin gurlan duzagyň töwereginde sepilen däne ýalydyr. Ol bolsa guşy tutjak bolup duzagyň ýanyna barýar.
Allatagala ynsana neslini dowam etdirmek üçin jyns hyjuwyny berdi. Şeýle hem ol ynsanda ylmy janlandyrmaga sebäp bolýan mertebe söýgüsini ýaratdy. Mertebe söýgüsi gapma-garşy garaýyşlarda, kelam ylmy barada jedeller we seýrek meseleleri bilmekde üstün bolmaga çalyşmak meýli görnüşinde ýüze çykýar. Ýöne meýil kalbyň gatylygyna, Taňrydan gapyl bolmaga, ýoldan azaşmaklyga, Taňrynyň rehmetinden daşlaşmaga, dünýewi ylymlara köp meşgul bolmaga alyp barar. Saňa beýle ýagdaýa düşmezligiň üçin Taňry ýardamçy bolsun!
Sufýan Söwrini (goý, Taňry oňa rehimdarlyk etsin!) ýaranlary gamgyn halda görüp, ondan: «Saňa näme boldy?» diýip soradylar. Ol: «Biz dünýäni söýen adamlar üçin söwda serişdesi bolduk. Bizde biri okap gidenden soň ýa-ha kazy, ýa-da häkim, ýa-da söwdagär bolýar. Meniň gamgyn hala düşmegimiň sebäbi, ine, şudur» diýip jogap berdi.
Dördünji wezipe– mugallymçylyk käriniň inçe hususyýetleriniň biri-de talyby ýaramaz ahlaklaryň täsirine düşmekden saklamagydyr. Mugallym bu wezipäni gödeklik bilen däl-de, eýsem mylaýymlyk bilen berjaý etmelidir. Çünki, gödeklik bilen hereket etmek haýa perdesini ýyrtýar, talypda mugallyma gaýtawul bermek duýgusyny döredýär, hötjetlik oýarýar. Hemme mugallymlaryň ussady bolan Pygamber alaýhyssalam: «Eger adamlara düýäniň gumalagyny owratmaklyk gadagan edilse, munda hökman bir zat bar diýip, hemmeler ony owratmaga synanyşardylar» diýdi. Adam atanyň we How enäniň kyssasy munuň anyk delilidir. Bu ýerde ol ikisi baradaky kyssany ýatlamakdan maksat-kyssany beýan etmek däl-de, eýsem onuň mazmunyndan pent almakdyr. Ýazgarmak adamlary ýagşylyga, zehinlileri many çykarmaga iterýär. Mana düşünmek şatlygy, ylma bolan höwesi oýarýar.
Bäşinji wezipe– talyba bir ylmy öwredýän mugallym başga bir ylmy öz öwredýän ylmyndan pes derejeli diýip ündemeli däldir. Meselem arap dili mugallymynyň hadys ýa-da fykh ylymlaryndan öz sapagynyň artykmaçdygyny ündemezligi gerek.
Çünki, dil mugallymynyň adaty fykh ylmyny, fykh ylmynyň mugallymynyň adaty bolsa hadys we tefsir ylymlaryny asylly ylymlar däl hasaplamakdyr. Munuň özi aýallaryň gürrüňine meňzeş bir zatdyr. Akylly adam beýle düşünjede bolmaz. Sebäbi her bir ylmyň öz hormaty, öz orny bolýar. Şeýle hem bolsa, kelam ylmynyň mugallymy: «Fykh pudaklaýyn, kelam bolsa asyl ylymdyr. Fykh ylmy aýallaryň aýbaşysyny öwredýän ylym. Eýse, ol Taňrynyň sypatlaryny öwredýän kelam ylmy bilen deň bolarmy?» diýmek bilen, talyby ondan daşlaşdyrmaga çalyşýar. Beýle häsiýet mugallym üçin oňlanylmaýan ahlakdyr. Mugallym diňe beýle ahlakdan çetde durmak bilen çäklenmän, eýsem talyby beýleki ylymlara hem höweslendirmelidir, ugrukdyrmalydyr, ylymlary tertip boýunça öz halyna görä, yzly-yzyna öwrenmelidigini düşündirmelidir.
Altynjy wezipe– mugallym talybyň akylynyň sapagy özleşdirip biljek mukdaryna görä ders bermek bilen çäklenmelidir we onuň akylynyň çatmajak zatlaryny sapaga girizmekden saklanmalydyr. Adamzadyň serweri Pygamber alaýhyssalam bu jähetden: «Biz pygamberlere adamlaryň mertebesine görä hormat goýmak we akyllaryna görä geplemek buýruldy» diýdi. Eger talybyň aýdylan zadyň manysyna akyly çatsa, onda onuň özbaşdak düşünmäge hem ukyby bardyr. Pygamber alaýhyssalam: «Adamlaryň akyl ýetirip bilmejek her hadysyny düşündirmek käbirleri üçin pitne bolar» diýdi. Aly (goý, Taňry ondan razy bolsun!) öz ýüregini görkezip: «Bu ýerde isledigiňçe ylymlar bardyr. Ýöne olara düşünip biljek adam tapylsa ýagşy?!» diýdi. Beýle diýmek bilen ol müň kerem mamla. Çünki, ýürekler gizlin syrlaryň gabyrlarydyr. Alymyň her bir bilýän zadyny her bir adama açyklaşdyrmagy rowa däldir. Eger bu kesgitnama alymyň sözleýän zadyna düşünýän, ýöne ondan peýda alyp bilmeýän talyp hakynda bolsa, onda oňa düşünmeýän adam barada näme söz aýdyp bolar? Isa alaýhyssalam: «Göwher ýaly gymmatly zatlary doňuzlaryň boýunlaryna dakmaň» diýip tabşyrypdyr. Hikmet göwherden haýyrlyrakdyr. Kim hikmeti halamasa, onda ol doňuzdan hem ýaramazrakdyr. Aýdylypdyr: «Her bendäniň akylynyň ölçegi bardyr. Sen ony akylynyň terezisi bilen ölçe. Şonda sen ondan salamat bolarsyň. Ol hem senden peýdalanar. Eger sen şeýle hereket etmeseň (ýagny, her kimiň akylynyň ölçegine görä hereket etmeseň), olaryň özüňi inkär etmegine duçar bolarsyň. Çünki, her adamyň akyllarynyň ölçegleri dürli bolýandyr» .
Bir adam alymlaryň birinden bir sowal sorady. Alym dymyp, sowala jogap bermedi. Ol adam: «Eýsem, sen Pygamber alaýhyssalamyň: «Kim peýdaly ylmy aýtman gizlese, ol kyýamat güni ot bilen jylawlanyp, magşar meýdanyna geler» diýen sözüni bilmeýärsiňmi?» diýdi. Alym: «Sen jylawly gürrüňi goý we bu ýerden git. Eger düşünýän adam sowal berse, men hem oňa jogap bermesem, meni şol wagt jylawlaýsynlar» diýdi. Beýik Taňry: «Akyly bolmadyklara malyňyzy bermäň»[5] diýdi. Akyly bolmadyk adamlara mal berilmejek bolsa, ylmyň hem ony bozjak we zaýalajak adamlaryna berilmejekdigine güman bolup bilmez. Ylmy höwes bildirmeýän adama bermek we ony höwes bildirýän adama bermezlik zulumdyr, ýagny her kimiň haky başga birine däl-de, eýsem onuň özüne berilmelidir. Şahyrlaryň biri şeýle aýdypdyr:
Näme üçin dakaýyn, ite gymmat göwheri,
Item, göwherem aglap, döker gözden dürleri.
Bolmasa ýüreginde eger ylym eseri,
Ol adama öwretmen, hikmetleri, syrlary.
Gelip birden Taňrynyň bu işime gahary,
Gyş aňzagy dek eder, köňlümdäki bahary.
Ylym almakda bolsa eger höwesi-seri,
Gaýgyrman onuň üçin, gündiz-gije, säheri.
Köpdür höwessiz kişä öwretmegiň zeperi,
Ylym zer-zaýa bolar, alym görer azary.
Ýedinji wezipe– gowşak talyba aňyna laýyk bolan aňsat sapak berilmelidir we: «Seniň aňlap bilmejek kyn meseleleriň hem bardyr» diýip, ony howpa düşürmekden saklamalydyr. Beýle etmek onuň ylma bolan höwesini oýandyrar, zehiniňi janlandyrar. Çünki, her kişi Taňrynyň özüne beren akyl paýyndan razydyr. Iň bir akmak kişi hem özüniň akylyny kämil we inçe ýerlerine düşünmäge ukyply hasaplap, ylym öwrenmek üçin mugallymyň ýanyna gelýär. Şeýle usul bilen aam adamlar şerigat duzagyna düşürilýär we ol şerigata öňküsinden-de içgin girişýär. Bu sebäpden onuň dogry ýoldan gyşarmazlygyna ýardam bermek gerek. Oňa düşnükli dil we mysallaryň üsti bilen kada-düzgünler öwredilse, onda ol nadanlyk duzagyndan boşar we batyn ylymlaryň duzagyna düşmez. Onuň bilen hakykatyň arasyndaky perde aýrylar. Bolmasa, ol näletsiňen şeýtanyň alyna düşer we özüni heläkçilige sezewar eder. Muňa görä, aam adamlary inçe ylymlaryň syrlaryna aralaşdyrmak bolmaz. Olara ybadatlaryň görnüşlerini bildirmek, kalplarynda Gurhanda aýdylyşyna laýyklykda, jennete höwes, dowzahdan wehim etmek duýgusyny döretmek ýeterlikdir. Olara şübhe oýarjak zatlary aýtmaly däldir. Şübhe kalbyna ornaşyp, ony heläkçilige elter. Umuman aýdylanda, aam adamlara derňew gapysyny açyp bermek bolmaz. Çünki, batyn ylymlar adamlary güzeran aladasyndan gapdala sowýar. Batyn ylymlaryň ýoluna düşen adamlaryň güzerany bolsa örän muşakgatlydyr.
Sekizinji wezipe– mugallym öz ylmyna amal ediji bolmalydyr. Ol ýalan sözlemeli däldir. Onuň işinde hem ýalançylyk bolmaly däldir. Amal göze görünýän zat bolandygy sebäpli adamlaryň gözüne ilýär. Gözler bolsa köpdür. Ylma ters amal edilse, onda aradan parasat göteriler. Bir zady iýen kişi: «Siz muny iýmäň! Ol ölüm howply awudyr» diýse, onuň üstünden gülerler, adamlaryň ol zada höwesleri artar we olar: «Bu zat datly bolmasa, onda ol ony iýmezdi» diýerler. Zatlaryň iň lezzetlisi täsir ediji zatdyr. Ussat nagyşdyr, şägirt bolsa nagyş öwrenijidir. Başga bir meňzetmä görä, ussat agaçdyr, şägirt bolsa onuň kölegesidir. Egri ösen agajyň dogry kölegesi bolmaz. Bu manyda şahyrlaryň biri şeýle diýipdir:
Eden işiňe görä, bil netije aljagyň,
Oýlamagynnetijäň başga hili boljagyň.
Beýik Taňry: «Özüňiz ýagşy iş etmegi unudyp, özgelere ýagşy iş etmegi buýurýarsyňyzmy?»[6] diýdi. Bu sebäpden alymlaryň günä iş üçin çekýän jezasy nadanlaryň günä iş üçin çekýän jezasyndan has agyrrakdyr. Çünki, alymyň günä laýynda taýmagy bilen köp adamlar taýar. Çünki, oňa köp adam uýýar. Günä üçin azap ýüki günä işi eden kişiniň öz boýnuna ýüklener. Bu sebäpden Aly (goý, Taňry ondan razy bolsun!): «Meniň bilimi iki hili adam bükdi. Olaryň biri günä iş edýän alymdyr, beýlekisi bolsa, nadan ybadathondyr. Günä iş edýän alym adamlary günä işleri bilen, nadan ybadathon ybadaty bilen adamlary ýoldan azaşdyrýandyr» diýdi. Elbetde, her bir işi Beýik Taňrynyň özi ýagşy bilýändir!
[1]Gurhanyň 49-njy «Hujurat»süresiniň 10-njy aýaty.
[2]Gurhanyň 43-nji «Zuhruf» süresiniň 67-nji aýaty.
[3]Bu ýerde Muhammet pygamber göz öňünde tutulýar.
[4]Gurhanyň10-njy«Hud» süresiniň 29-njy aýaty.
[5]Gurhanyň 4-nji «Nisa» süresiniň 5-nji aýaty.
[6]Gurhanyň 2-nji «Bakara» süresiniň 44-nji aýaty.