Хадыслардан мысаллар
Пыгамбер алайхыссалам: «Алымлар пыгамберлериң мирасдүшерлеридир» дийди. Пыгамберликден бейик дереҗәниң ёклугы аяндыр ве шу дереҗәниң мирасдүшери болмаклыкдан ёкары хорматың ёклугы аныкдыр. Пыгамбер алайхыссалам: «Ердәки ве Асмандакы хемме затлар алымың гүнәсиниң гечилмегини Таңрыдан диләрлер» дийди. Хайсы бир дереҗе Асмандакы ве Ердәки перишделериң гүнәсиниң гечмегини сораян адамсыныңкыдан ёкары болуп билер? Алым өз иши, җаны билен мешгул болса-да, перишделер Таңрыдан онуң гүнәсиниң гечилмегини дилейәрлер. Пыгамбер алайхыссалам: «Ылым хорматы артдыряр ве бендәниң рухы кувватыны патышаның дереҗесине гөтерйәр» дийди. Шейлеликде, ынсан бу дүнйәниң мивелерине эе боляр. Йөне алымың ахыръетде алҗак мивелери мундан хас ягшыдыр ве бакыдыр. Пыгамбер алайхыссалам: «Мунапыкда[1] ики саны хәсиет болмаз: ягшы ниет ве дин ылымларына» дийди. Бу ерде Пыгамбер алайхыссалам хер дөвүрде кәбир алымларың дин ылымларына дүшүнмезден ве делил гетирип билмезден бош давалары тутҗакдыкларыны гөз өңүнде тутяр. Ол бу ерде мениң ойланян фыкх ылмым[2] барада айдяр. Фыкх ылмының беяны барада «Фыкхың манысы» диен бөлүмде айдыляр. Факых үчин иң говы дереҗе онуң ахыръетиң дүнйәден ягшыдыгыны билмегидир. Бу ылмы ыхлас билен өвренен адам давадан ве икийүзлүликден халас болар. Пыгамбер алайхыссалам: «Адамларың ягшысы иманлы алымдыр. Эгер оңа хаҗатың дүшсе непи етер. Эгер ол баяса, өзи үчин баямаз» дийди. Пыгамбер алайхыссалам: «Иман ялаңачдыр. Онуң лыбасы таквалыкдыр, безеги хая-шеримдир, мивеси ылымдыр» дийди. Пыгамбер алайхыссалам: «Алымлар дереҗеси боюнча пыгамберлере иң якын адамлардыр» дийди. Пыгамбер алайхыссалам: «Алымың өлүминден бир тайпаның өлүми ягшыракдыр» дийди. Пыгамбер алайхыссалам: «Адамлар гөйә магданлар ялыдыр. Оларың ягшысы җахыллык дөврүнде[3] хем, ыслам дөврүнде хем ылым өврененлеридир» дийди. Пыгамбер алайхыссалам: «Кыямат гүни алымларың сыясы шехитлериң ганы билен дең өлчелер» дийди. Пыгамбер алайхыссалам: «Умматымдан ким мениң сүннетимиң кырк хадысыны адамлара етирмек үчин ятласа, мен оңа кыямат гүни шепагатчы ве шаят боларын» дийди. Пыгамбер алайхыссалам: «Умматымдан ким кырк хадысы адамларың аңына етирсе, Аллатагала оны кыямат гүни факых[4] алым ялы гаршылар» дийди. Пыгамбер алайхыссалам: «Ким Алланың динине өкделесе, бейик Таңры оны өзүниң мөхүм адамларының бири хасаплар ве оңа ойламаян еринден рысгал етирер» дийди. Аллатагала Ыбрайым алайхыссалама: «Эй Ыбрайым! Мен алымдырын ве хер бир алымы сөййәндирин» диен оваз иберди» дийди. Пыгамбер алайхыссалам: «Алымлар пәк Таңрының Ердәки ынамлы адамларыдыр» дийди. Пыгамбер алайхыссалам: «Мениң умматымдан ики хили адам ягшы ахлаклы болсалар адамлары ягшы ахлаклы эдерлер ве бозук ахлаклы болсалар, адамлары бозук ахлаклы эдер. Олар эмирлер ве факыхлардыр» дийди. Пыгамбер алайхыссалам: «Бир киши мениң яныма ылмыны зыяда этмек үчин бир гүн гелсе, ол мени Аллатагала хас якынлашдырар. Мениң үчин шол гүн ялы багтлы гүн ёкдур» дийди. Пыгамбер алайхыссалам ылмың ыбадатдан ве шехитликден артыкмачлыгы барада: «Алымың ыбадатхон бендеден артыклыгы сахабаларың маңа якынлыгы ялыдыр» дийди. Пикир назарыны салып гөр! Аллатагала ылмы пыгамберлиге деңеди, ылымсыз амалы согапдан бош эдип гойды. Эгер ыбадатхон ызыгидерли ерине етирйән ыбадатыны ылым билен берҗай этмейән болса, бу иш онуң үчин ыбадат болмаз. Пыгамбер алайхыссалам: «Алымың ыбадатхондан артыклыгы Айың шөхлесиниң хемме йылдызларың шөхлесинден артык болшы ялыдыр» дийди. Пыгамбер алайхыссалам: «Кыямат гүни үч хили адам бейлеки адамлара бейик Таңрыдан шепагат диләр, илки пыгамберлер, соңра алымлар, соңра шехитлер» дийди. Алымың мертебеси пыгамберликден пес, шехитликден бейик хасапланяр. Пыгамбер алайхыссалам: «Аллатагала үчин динине өкде бендеден ягшы бенде ёкдур. Бир факых шейтаның гаршысына мүң ыбадатхондан гүйчлүдир. Хер бир задың сүтүни бардыр, диниң сүтүни фыкх ылмыдыр» дийди. Пыгамбер алайхыссалам: «Сизиң диниңизиң ягшысы онуң еңил берҗай эдилйәнидир, ыбадатың ягшысы фыкх ылмыдыр» дийди. Пыгамбер алайхыссалам: «Иманлы алымың иманлы ыбадатхондан артыклыгы етмиш эсседир» дийди. Пыгамбер алайхыссалам: «Сиз хәзир факыхларың көп, карыларың аз, дилеварларың аз ве сорайҗыларың аз заманына габат гелдиңиз. Бу заманда амал эдиҗилериң көп болмагы ылымдан ягшыракдыр. Ене адамлара бир заман гелер. Онда факыхлар аз, дилеварлар көп, амал эдиҗилер аз болар. Ол вагтда ылым амалдан ягшырак болар» дийди. Пыгамбер алайхыссалам: «Алым билен ыбадатхон бендәниң арасында йүз дереҗе бардыр. Хер бир ики дереҗәниң арасы чапыксуварың ат билен етмиш йылда гечҗек ёлы ялы аралыкдыр» дийди. Пыгамбер алайхыссаламдан: «Хайсы амал ягшы?» дийип соралды. Пыгамбер алайхыссалам: «Ылмы Бейик Таңры үчин өвренмек» дийип җогап берди. Ондан ене: «Сениң өзүң хайсы ылмы ислейәрсиңиз?» дийип соралды. Пыгамбер алайхыссаламдан: «Таңра ярамлы ылмы ислейәрин» дийди. Ондан ене: «Биз сенден амал барада сораярыс. Сен болса бизе нәме үчин ылым хакында җогап берйәрсиң?» дийип соралды. Пыгамбер алайхыссаламдан: «Аз амал Таңра ярамлы ылмы билмек билен пейдалы боляр, көп амал Таңра ярамлы ылмы билмезлик билен пейда бермейәр» дийди. Пыгамбер алайхыссалам: «Аллатагала Кыямат гүни хемме бенделерини дирелдер ве ол алымлара: «Мен өз ылмымы сизиң ол ерде хормат газанмагыңыз үчин дәл-де, эйсем өзүм үчин сизде гойдум. Шонуң үчин мен сизи ялкадым» диер. Биз хем Аллатагаладан ахырымызың ягшы болмагыны сораярыс!» дийди.
Инди өтен заманлар яшан мертебели шахсларың ве алымларың ылым барада айдан сөзлеринден мысаллары гетирелиң:
Алы бин Абу Талып (гой, Бейик Таңры ондан разы болсун!) Кумейле йүзленип: «Эй Кумейл! Ылым байлыкдан хайырлыракдыр. Чүнки ылым сени горар, сен болса байлыгы горарсың. Ылым хәкимдир, байлык болса онуң хөкүм эдйән раятыдыр. Байлык харч эдилмек билен кемелер, ылым харч эдилмек билен көпелер» дийди. Алы бин Абу Талып (гой, Бейик Таңры ондан разы болсун!) ене: «Алым ыхлас билен намаз окаян хем ораза тутян бендеден хайырлыракдыр. Алым өлсе ыслам дешилер. Ол дешиги диңе ызында галан шәгиртлери япар» дийди. Алы ибн Абу Талып (гой, Бейик Таңры ондан разы болсун!) ене шыгыр билен шейле айтды:
Гөз гуванҗы алымдыр җаханда бу ынсаның,
Чүнки салгысын берер бозук ёлда энтәниң.
Мертебеси дең дәлдир ылым билен дүнйәниң,
Бу себәпден душманы алым болар наданың.
Бакы дирилик болар музды алым бендәниң,
Өлүдир дири вагты, өмри надан яшаның.
Абылэсвет: «Ылымдан хорматлы зат ёкдур. Чүнки патышалар адамлара хөкүмдардыр, алымлар болса патышалара хөкүмдардыр» дийди.
Ибн Апбас (гой, Бейик Таңры ондан разы болсун!): «Давут пыгамбер, (гой, Пәк Таңрының оңа ялкавлыгы болсун!) ылым, байлык, хөкүмдарлык үчүсиниң арасында бир салым хайран болуп дурды. Соңра ол ылмы сайлап алды. Аллатагала бу себәпден оңа байлыгы хөкүмдарлыгы билен биле берди» дийди.
Ибн Мүбәрекден: «Адамларың хорматлысы кимдир?» дийип соралды. Ол: «Элбетде алымдыр» дийди. Оңа: «Хөкүмдарларың хорматлысы кимдир?» дийип совал берилди. Ол: «Элбетде, оларың таквасыдыр» дийди. Ондан ене: «Ким пес адамдыр?» дийип соралды. Ол: «Пес адам дүнйәни говы гөрйән адамдыр. Алымлар бейле адамларың хасабына гирмейәрлер. Чүнки, ынсаны хайвандан тапавутландырыҗы зат ылымдыр. Ынсан ылым билен ынсандыр. Ол ылым билен өз хорматына эе боляр. Эгер ылым болмаса, онда ынсан кувватлы болмазды. Элбетде, дүе сүңклери билен, пил гөвресиниң улулыгы билен, йыртыҗы хайван хайбаты билен, өкүз көп зат иййәнлиги билен, серче кичи хем болса дуйгурлыгы билен ынсандан кувватлыдыр. Йөне ынсаның кувваты ылым билен оларың хеммесиниңкиден артыкдыр» дийди.
Алымларың бири: «Бир гүнүни ылымсыз гечирен кишә гынанҗымың нәхили боландыгыны ве бир гүнүни ылым билен гечирен кишә бегенҗимиң нәхили боландыгыны билен болсаң, онда сен өмрүңи хөкман ылым билен өтүрердиң!» дийипдир.
Пыгамбер алайхыссалам: «Гурхана дүшүнмеклик берлен киши өзүни бир адамдан улы тутса, Аллатагала оны бу себәпли ахыръетде хор тутар» дийди.
Фатх Мосулы (гой, Бейик Таңры оңа рехимдарлык этсин!): «Хасса сув, тагам ве дерман берилмесе, онда ол өлерми?» дийди. Адамлар: «Хава, ол өлер» дийдилер. Мосулы: «Калп хем эдил шунуң мысалы ялыдыр. Калбың иймити ылым ве хикметдир. Онуң дирилиги бу ики зат билендир. Эгер калба үч гүн ылым ве хикмет бармаса, онда ол өлйәр» дийди.
Бу сөз җайдар айдылан сөздүр. Ылмы ёк калп хассадыр, онуң калбы өлүдир. Эгер ол Дүнйәни сөйсе, онда бу ягдайы дуймаяр. Онуң дүнйә билен мешгулланмагы дуйгуларыны бош эдйәр. Мунуң өзи горкының гүйчли болмагы билен адамың яраның агырысыны дуймайшы ялыдыр. Эгер адам өлүм халына дүшсе, хеләк болмак дуйгусы оңа дүнйәниң йүкүни унутдыряр. Ол көп өкүнйәр, йөне оңа бу өкүнҗиң непи етмейәр. Онуң бу дуйгусы ховпдан аман болмак дуйгусы ялыдыр. Гой, Бейик Таңры бизи айыпларының ачылҗак гүни болан кыямат гүнүниң ховпундан өз пенасында аман сакласын!
Хасан (гой, Бейик Таңры оңа рехимдарлык этсин!): «Алымларың сыясының аграмы шехитлериң ганы билен биле өлчелер. Йөне алымларың сыясының аграмы шехитлериң ганындан агыр гелер» дийди. Ибн Месгут (гой, Бейик Таңры ондан разы болсун!): «Хич бир киши алым болуп догулмаяр. Ылма өвренмек билен етилйәр» дийди. Ибн Апбас (Бейик Таңры ондан разы болсун!): «Бир гиҗе ылмы гайталамак мениң үчин шол гиҗәниң дирилигинден ягшыракдыр» дийди. Бейле сөзи Абу Хурейра (гой, Аллатагала ондан разы болсун!) хем, Ахмет бин Ханбал (гой, Бейик Таңры оңа рехимдарлык этсин!) хем айтды.
Хасан Аллатагаланың: «Эй Таңрымыз! Бизе шу дүнйәде ягшылык, ахыръетде хем ягшылык бер!»[5] диен сөзи җәхтинден: «Шу дүнйәдәки ягшылык ылым ве ыбадатдыр, ахыръетдәки ягшылык болса җеннетдир» дийди.
Дана адамларың бирине бир киши: «Маңа хайсы зады өвренмек пейдалы болар?» дийип совал берипдир. Ол дана: «Эгер сениң гәмиң гарк болса, сениң билен ылым йүзер» дийип җогап берипдир. Айдылышына гөрә, ол дана «гәминиң гарк болмагы» дийип ол кишиниң гөвресиниң аҗал етмеги билен өлмегини гөз өңүнде тутупдыр.
Алымларың бири: «Ким хикметиң җылавыны тутса, ол адамларың ёлбашчысы болар ве ким-де ким хикмет билен таналса, гөзлер оңа хормат билен гарар» дийипдир.
Шапыгы (гой, Бейик Таңры оңа рехимдарлык этсин!): «Ким ылмың хорматына дүшүнсе, ол сәхел зада хем шат болар ве ондан гусса гөтерилер» дийди.
Омар (гой, Бейик Таңры ондан разы болсун!): «Эй адамлар! Сизе ылым өвренмек герек. Чүнки, Аллатагаланың ылымдан бир бөлүми өвренен кишә берйән хорматлы халаты бардыр. Аллатагала оңа бу халаты гейдирер. Эгер ол бир гүнә иш этсе, бу халат Аллатагаладан бу бендәни язгарып, ондан өзүни алмазлыгыны үч гезек хайыш эдер. Эгер ол тә өлйәнчә гүнә этсе хем халат бу хайышыны довам этдирер» дийди.
Ахнаф (гой, Аллатагала оңа рехимдарлык этсин!): «Ылым билен беркидилмедик хер бир задың ахыры хорлуга элтер» дийди.
Салым бин Абу Җагд: «Хоҗам мени үч дирхеме сатын алды ве гулчулыкдан бошатды. Мен оңа: «Мен нәме иш эдейин?» дийдим. Ол: «Сен ылым өвренмек билен мешгул бол!» дийди. Мен ыхлас билен ылым өврендим. Онсоң мени Мединәниң эмири хормат билен хузурына чагырды» диййәр.
Зубейр бин Абу Бекр: «Какам маңа Ыракдан: «Эй, оглум, сен ылым өврен! Эгер мәтәч болсаң ол саңа ярдам берер. Эгер баясаң, ол саңа гораг болар» дийип хат язды» диййәр. Шу мазмундакы сөзлер Лукманың оглуна берен весъетлеринде хем гетирилйәр. Лукман: «Сен алымлары дост тутуп, оларың меҗлислерине гатнаш! Чүнки, асманың ягмырларының ери җанландырышы ялы ылым калбы җанландыряр» дийди.
Даналарың бири: «Бир алым дүнйәден гайтса, онуң өлүмине сувдакы балык хем, асмандакы гуш хем аглар. Онуң өзи дүнйәден гитсе хем, ады унудылмаз» дийипдир.
Зухры (гой, Бейик Таңры оңа рехимдарлык этсин!): «Ылым ядыгәрликдир. Ылмы диңе ядыгәрлик галдырмагы говы гөрйән адамлар халаяр» [6] дийди.
[1]Мунапык - икийүзли адам.
[2]Фыкх ылмы - шеригат меселелерини өвренйән ылым.
[3]Җахыллык дөври - ысламдан өңки дөвүр.
[4] Факых - фыкх ылмы боюнча алым.
[5]«Бакара» сүресиниң 201-нҗи аяты.
[6]«Тоба» сүресиниң 122-нҗи аяты.