Бу мазмунда айдылан хадыслардан:
Пыгамбер алайхыссалам Мугазы Емене иберенде: «Сениң үчин бир адамы Таңрының ёлуна гөнүкдирмек шу дүнйәден ве ондакы затлардан ягшыракдыр» дийди. Пыгамбер алайхыссалам: «Ким адамлара ылымдан бир бабы өвретсе, Аллатагала оңа етмиш сыддыга берен согабы берер» дийди. Иса алайхыссалам: «Ким ылым өвренсе, ылмына амал этсе ве ылмыны адамлара өвретсе, Асманларың перишдеси Таңрыдан оңа бейик дереҗәни диләрлер» дийди. Пыгамбер алайхыссалам: «Кыямат гүни боланда Бейик Таңры ыбадатхонлара: «Сиз җеннете гириң!» диер. Алымлар: «Эй Таңрымыз! Олар бизиң ылмымыз билен ыбадата ыхлас этдилер» диер. Бейик ве Пәк Таңры: «Эй алымлар! Сиз мениң дергәхимде кәбир перишделерим ялысыңыз. Киме ислесеңиз, шоңа хем шепагат эдиң!» диер. Олар шепагат эдерлер, соңра җеннете гирерлер» дийди. Бейле улы дереҗе олара зерур болан ылмы ыхлас билен өвредендиклери үчин берилйәр. Пыгамбер алайхыссалам: «Бейик Таңры ылмы адамлара алымларың үсти билен етирйәр. Ылым алымларың дүнйәден өтмеги билен гидйәр. Алым өленде билйән затларыны өзи билен әкидйәр. Шонуң үчин алымлардан сорап дуруң, ёгса сиз азашарсыңыз ве азашдырарсыңыз» дийди. Пыгамбер алайхыссалам: «Ким ылым өвренип, оны адамлардан яшырса, Аллатагала бейле адамы кыямат гүни отдан болан җылав билен агыздырыклар» дийди. Пыгамбер алайхыссалам: «Дана сөз ягшы пешгешдир. Сен оны мусулман доганыңа өвредендигиң себәпли мүң йыл ыбадатың согабына барабар болан согап газанарсың» дийди. Пыгамбер алайхыссалам: «Бу дүнйә ве ондакы Бейик Таңрыны ятлаянлардан, ылым өвредйәнлерден ве ылым өвренйәнлерден башга затлар нәлетленендир» дийди. Пыгамбер алайхыссалам: «Бейик Таңры, Онуң перишделери Асманлардакы ве Ердәки ярадан затлары, хат-да хининдәки гарынҗа хем, деңиздәки балык хем адамлара ылым өвредене Таңрыдан ягшылык диләрлер» дийди. Пыгамбер алайхыссалам: «Мусулман доганына хайрыны етирен адама согап ызлы-ызына гелер дурар» дийди. Пыгамбер алайхыссалам: «Ягшы сөзи эшиден мөмин оны адамлара өвретсе ве өзи оңа амал этсе, бейле иш онуң үчин бир йылың ыбадатындан согаплыракдыр» дийди. Пыгамбер алайхыссалам бир гүн сапара чыканда ики саны меҗлиси гөрди. Оларың биринде Бейик Таңрыдан дилег эдйәр ве дилеглериниң Таңрының дергәхинде кабул болмагындан умыт эдйәрлер, бейлекисинде болса ылым өвредйәрлер. Пыгамбер алайхыссалам: «Аллатагала бу дилег эдйәнлериң дилегини ислесе кабул эдер, ислесе хем кабул этмез. Эмма бу адамлара ылым өвредйәнлер барада айдыланда болса, онда мениң өзүм хем мугаллым эдилип иберилдим» дийди. Соңра Пыгамбер алайхыссалам оларың янына барып, гошулып отурды. Пыгамбер алайхыссалам: «Бейик Таңрының маңа берен ылмы ве парасаты гөйә асмандан ере инен ягмыр ялыдыр. Ягмырың көп яган еринде көп отлар өсйәр. Ол ягмырың дүшмедик еринде отлар өсмән гураяр» дийди. Биринҗи ягдайда ылмы билен адамлара пейда берйән алым, икинҗи ягдайда ылмы билен адамлара пейда бермейән алым гөз өңүнде тутуляр. Пыгамбер алайхыссалам: «Адам оглы өленде онуң ылмы дийәймесең, амалы үзүлйәр» дийди. Пыгамбер алайхыссалам: «Ягшылыга ёл гөркезиҗи ягшылык эден адам ялыдыр» дийди. Пыгамбер алайхыссалам: «Ики ерден башга ягдайда гөриплик этмек ёкдур: Бир адама Бейик Таңры парасат берсе, ол парасат билен меселелериң чөзгүтлерини айтса ве адамлара парасаты өвретсе; бир адама Аллатагала байлык берсе, ол оны ягшы ишлере сарп этсе» дийди. Пыгамбер алайхыссалам: «Сениң ызыңа довам этдирҗеклер кимлер болар?» дийип сорадылар. Пыгамбер алайхыссалам: «Олар мениң сүннетими[1] довам этдирҗеклер ве адамлара оны өвретҗеклер болар» дийип җогап берди.
Мертебели адамларың ве алымларың ылым өвретмек барадакы айдан сөзлеринден:
Омар (гой, Бейик Таңры ондан разы болсун!): «Ким адамлара хадыслары өвретсе, адамлар олара амал этселер, онуң согабы амал эденлериң алҗак согабына барабар болар» дийди. Ибн Апбас (гой, Бейик Таңры ондан разы болсун!): «Адамлара ягшылык этмеги өвредйән кишиниң гүнәсини гечмеклиги хемме зат, хат-да сувдакы балыга ченли Аллатагаладан сорар» дийди. Алымларың бири: «Алым Аллатагала билен онуң халкының арасында дурар» дийипдир. Суфян Сөври (гой, Бейик Таңры оңа рехимдарлык этсин!) Аскалан шәхерине гелди. Ондан бу ерде хич ким хич зат барада сорамады. Ол: «Эгер мен бу ерден чыкып гитсем, онда шәхерде ылым хөкман өлер» дийди. Ол бейле сөзи ылым өвретмеклигиң согаплы ишдигини ве ылмың бу шәхерде ровачландырмагы исләп айдан болса герек. Ата (гой, Бейик Таңры ондан разы болсун!): «Мен Сагыт бин Мусеййебиң янына бардым. Ол аглап отуран экен. Ата оңа: «Сени нәме зат аглатды?» дийди. Сагыт: «Менден хич ким хич зат сорамаяр» дийди. Алымларың бири: «Хер замананың бир шамчырагы болар. Ол дөврүниң адамларына шөхле сачар» дийипдир. Хасан (гой, Бейик Таңры оңа рехимдарлык этсин!): «Эгер алымлар болмадык болсалар, онда адамлар хайванлар ялы болардылар» дийди. Бейле сөзүң үсти билен алымларың адамлара ылым өвретмек билен олары хайванлыгың чәгинден ынсанлыгың чәгине чыкаряндыкларыны айтмак иследи. Акрама: «Ылым бир харытдыр» дийди. Оңа: «Ол нәхили харыт?» дийдилер. Ол: «Оны бирине берсең, ол оны уланса, шонда хем бахасы дүшмән, терсине артян харытдыр» дийди. Яхя бин Мугаз: «Мухаммет алайхыссаламың умматының алымлары адамлара ата-энелеринден хас рехимлирәкдир» дийди. Ондан: «Бу ягдай нәхили бейле боляр?» дийип сорадылар. Ол: «Чүнки олары ата-энелери дүнйәниң одундан горап саклаярлар, алымлар болса олары ахыръет одундан горап саклаярлар» дийди.
Айдылышына гөрә ылмың башы дыммакдыр, соң диңлемекдир, соң ятламакдыр, соң амал этмекдир, соңра оны яйратмакдыр. Айдылыпдыр: «Ылмыңы билмейән адама өврет ве билмейән задыңы өврен. Эгер шейле этсең онда сен билмейән задыңы өвренерсиң, билйән задыңы болса ят бекләрсиң» дийди. Мугаз бин Җебел ылым өвренмек ве оны өвретмек барада: «Ылмы өврениң: Ылмы өвренмек ыбадатдыр, оны өвретмек болса Таңрыдан горкмакдыр; ылмы окатмак тесбихдир (Таңрыны тарыпламакдыр), ылмы дерңемек җихатдыр (дин үчин ыхлас этмекдир), билмейән адама ылым өвретмек садакадыр, оңа ыхлас этмек габырда хемрадыр, екеликде ёлдашдыр, гайга дүшсең хем, шатлансаң хем сабырлылыкдыр, ят юртларда болсаң якын достуңдыр ве җеннетиң ёлуны салгы бериҗи шамчырагдыр. Аллатагала ылым билен адамларың дереҗесини ёкары гөтерйәр, олары догры ёла гөнүкдирйәр ве ягшы ишлери этмеклиге үндейәр. Алымларың ишлерине перишделер назарларыны салярлар ве ганатлары билен оларың айыпларының үстүни япярлар. Хер бир зат, хат-да деңиздәки балык хем, гуры ериң вагшы хайванлары хем, мөр-мөҗеклери хем, Асман хем, ондакы йылдызлар хем алымларың гүнәлерини гечмегини Таңрыдан сораярлар» дийди. Чүнки, ылым калплардакы наданлыгы ёк эдиҗи дириликдир, гөречлере гараңкылыгы ягталдып гөркезйән нурдыр, беденлери эҗизликден халас эдйән гүйчдүр. Бенде ылым билен ягшызадаларың дереҗесине етйәр. Ылым барада пикирленмек согабы боюнча оразаның согабына барабардыр, ылмы өвретмеклик намазың согабына деңдир. Ылым билен ыбадат эдилйәр, вада берилйәр, Таңры тарыпланыляр, таквалыга етилйәр, гарындашлык гатнашыгы, халал-харамы билинйәр. Ылым өңбашчыдыр, амал болса онуң ызына дүшүҗидир. Ылым багтыярлыга элтйәр ве мушакгатлы гүнлери арадан айыряр. Биз Бейик Таңрыдан өзүмизе ягшы ярдам бермеклигини сораярыс.