ОМАР ИБН АБДЫЛЭЗИЗ БАРАДАКЫ ХАБАРЛАР
Мугыра ибн Хеким шейле диййәр: «Халыпа Абдылмәлигиң гызы (ягны Омар ибн Абдылэзизиң аялы) Патма маңа: «Эй, Мугыра! Элбетде, ынсанларың арасында Омар ибн Абдылэзизден хас көп намаз окаян ве ораза тутян киши болуп билер. Йөне ынсанларың арасында мен Омар ибн Абдылэзизден хас көп Алладан горкяны гөрмедим. Өйүне гирен махалы намаз җайына гирип, тә гөзлери юмулянча аглаярды ве дилег эдйәрди. Соң ене оянып, бүтин гиҗесини шейле ягдайда гечирйәрди» дийди».
* * *
Ыбрайым ибн Убейт ибн Рыфага шейле диййәр: «Мен Омар ибн Абдылэзизи Мухаммет ибн Кайс оңа хадыс гүррүң берйәркә гөрдүм. Гөрсем, Омар гапырга сүңклери бири-биринден айрылҗак дереҗеде аглаярды».
* * *
Сүлейман ибн Хамыт шейле диййәр: «Омар ибн Абдылэзиз оглы Абдылмәлиге шейле хат язды: «Мениң үчин бир кишиң кәмиллиги ве халас болмагы сениң кәмиллигиңден ве халас болмагыңдан говы дәлдир. Йөне муңа мусулманлара я-да зиммилере[1] ёлбашчы болан дегишли дәлдир. Чүнки, оларың догры ёлда йөремегинде бейлекилериңкиде болмадык тәсир бардыр. Шейле хем халк үчин оларың азмагында башгаларыңкыда болмадык тәсир бардыр».
* * *
Мугыра ибн Хеким шейле диййәр: «Абдылмәлигиң гызы Патма маңа шейле гүррүң берди: «Омар ибн Абдылэзизиң өлүм дүшегинде ятырка: «Эй, Аллам! Өлүмим гүндиз болса оны ынсанлардан гизле!» диендигини эшитдим. Бу хассалык махалы бир гүн оңа:
— Эй, мөминлериң эмири, яныңыздан чыкайынмы? Белки, бираз ятарсыңыз, себәби сиз гиҗе ятмадыңыз — дийдим ве чыкып, башга бир отага гитдим. Онуң: «Шу ахырет өйүни ер йүзүнде бейиклик ве писат ислемедиклере берерис. Нетиҗе такваларыңкыдыр»[2] аятыны окаяндыгыны эшитдим. Ол муны бирнәче гезек гайталады. Соң дымды ве эп-эсли вагт сеси чыкмады. Онуң сесини эшитмейәрдим. Оңа середйән хызматкәре: «Хайп саңа! Серетсене!» дийдим. Ол янына гиренден чиркин гыгырды. Деррев янына бардым, гөрсем ол җан берипдир. Йүзүни кыбла өврүп, бир элини агзының, бирини хем гөзлериниң үстүне гоюпдыр».
* * *
Меймун ибн Михрап шейле диййәр: «Омар ибн Абдылэзиз бир гезек менден оглы Абдылмәлигиң янына барып-бармандыгымы сорады. Мен хем бир гүн онуң гапысына гелдим. Хызматкәрине:
— Онуң янына гирмекчи болян — дийдим.
Ол хем:
— Гирәйиң, янында адамлар бар. Ол нәме эмирми? — дийди.
Мен онуң янына бардым. Менден:
— Сен ким? — дийип сорады.
Мен:
— Меймун ибн Михрап — диенимден соң танады. Соң нахар вагты гелди. Сачага этли медине чорбасы гетирилди. Соң хем чөрек ве ичяг догралан дограма, хурма ве гаймак гетирилди.
Оңа:
— Мөминлериң эмирине айтсаңыз, ол хем саңа айлык беллесе — дийдим.
Онда ол:
— Алладан гелен рысгалың кем болмасын. Мен онсузам дөвлетден айлык алян ики мүң кишиниң ичинде. Сүлейман мени ики мүң кишиниң арасына гошды. Какама галсады, ол муны этмезди. Тайыфда[3] бир экинчилик еримиз бар. Эгер маңа берилсе, мүң дирхемлик гирдеҗи гетирерди. Ондан артыкмаҗыны нәме эдейин? — дийди.
Мен ичимден оңа: «Сен какаң хакыкы оглусың» — дийдим».
* * *
Омар ибн Абдылэзизиң гулы Сехил ибн Садака шейле диййәр: «Омар ибн Абдылэзизиң якынларының бири маңа шейле гүррүң берди: «Ол халыпа болансоң, өйүнден гаты сесли агы эшидилди. Себәбини соранымызда шейле дийдилер: «Омар ибн Абдылэзиз гырнакларыны өз ыгтыярына гоюп, шейле дийди: «Мениң башыма сизиң билен мешгул болмагыма пәсгел этҗек бир иш гелди. Ким ислесе, оны азат эдейин. Ким галмак ислейән болса, оны галдырайын. Мениң олар билен хич хили арабагланышыгым ёк» дийди. Олар ондан умытларыны үзүп аглашдылар».
* * *
Бир гезек Абу Убейда ибн Укба ибн Нафыг Курейши Омар ибн Абдылэзизиң аялы Патма бинти Абдылмәлигиң янына гелди. Оңа:
— Маңа Омар ибн Абдылэзиз хакда гүррүң бер! — дийди.
Онда ол:
— Алла оны халыпа эденсоң, тә рухуны алянча, онуң җүнүпден[4] я-да ыхтыламдан соң[5], ювнандыгыны билмейәрин[6] — дийди.
* * *
Мухаммет ибн Ысхак шейле диййәр: «Достларымың бири гүррүң берди: «Омар ибн Хаттап Сагыт ибн Амыр ибн Хузейми Шам велаятының бир этрабына хәким белләпди. Йөне ол адамларың арасындака кәвагтлар өзүнден гидйәрди. Хезрети Омара хат язып:
— Бу адам кесел — дийдилер.
Хезрети Омар хем бир душушыкда оңа:
— Эй, Сагыт! Саңа нәме боляр? — дийип сорады.
Ол хем:
— Эй, мөминлериң эмири, менде горкулы зат ёк. Йөне мен Худейп ибн Ады өлдүрилен махалы, ол ердедим ве онуң дилегини эшитдим. Валла, хачанда көпчүликде ол ядыма дүшсе, өзүмден гидйәрин — дийип җогап берди.
Бу ягдай хезрети Омарың янында онуң абрайыны хас хем артдырды.
[1] Зимми – мусулман болмадыклар.
[2] Гурханың 28-нҗи («Касас») сүресиниң 84-нҗи аяты.
[3] Тайыф — Сауд Арабыстанында бир ериң ады.
[4] Җүнүп — җынсы гатнашык зерарлы эркеклик сувуның гелмеги.
[5] Ыхтылам — дүйшде шейтаны болмаклык.
[6] Бу ерде Омар ибн Абдылэзиз халыпа болансоң, халыпаның халкың гараматына җогапкәрлиги үчин, бу гайгы-алада оны аяла ислегден, шөхветден даш эдендиги беян эдилйәр.