АЛЛАТАГАЛАНЫҢ БЕЙИКЛИГИНИ ЯДА САЛМАК ХАКДА
Җебеле ибн Сахым шейле диййәр: «Зыят ибн Худейр Эседи билен бир ерден гайдып гелйәрдим. Сөзүмиң арасында: «Ёк, аманатдан ант ичйәрин» дийдим. Зыят муны эшидип аглады. Мен улы хата гойберендирин өйдүп: «Бу сөзлер эрбетми?» дийип сорадым. Онда ол: «Хава, хезрети Омар аманата ант ичмеги дүйбүнден гадаган эдерди» дийди».
* * *
Мутаррыф шейле диййәр: «Алланың бейиклигини яда салың. Сиз онуң адыны гапыдакы малларыңыза гыгыран махалыңыз ятламаң»[1].
* * *
Җабыр шейле диййәр: «Ата Аллатагаланың: «Ким Алланың гадаган дийип хөкүм эден затларына әхмиет берсе, билип гойсун, бу Алланың янында өз бәхбиди үчиндир»[2] аяты хакда: «Бу гадаганлыклар Аллатагала гаршы чыкылан затлардыр» дийди».
* * *
Муса алайхыссалам: «Эй, Реббим! Маңа өз якын достларың кимлердигини айт!» дийди. Аллатагала хем оңа: «Олар бири-бирлерини мениң үчин сөенлер, сәхер чаглары менден өзлериниң багышланмакларыны ислейәнлер, мен ятланыланда мениң билен биле ятланылян, олар ятланыланда олар билен билеликде мен хем ятланылян кишилердир. Олар маңа табынлыкда болуп, бүргүтлериң хөвүртгелерине гайдып гелишлерине меңзейәр. Шейле хем, олар мениң харам эден затларым халал хасап эдиленде, гаплаңларың гахарланышлары ялы гахарланян кишилердир» дийди.
* * *
Сагыт ибн Җубейр шейле диййәр: «Ресулалладан: «Алланың достлары кимлер?» дийлип соралды. Онда ол: «Гөрненлеринде Эзиз ве Җелил Аллатагала яда дүшйән кишилердир» дийди».
* * *
Вехп ибн Мунеббех шейле диййәр: «Хикметли кишилериң бири: «Мен Эзиз ве Җелил Реббиме җеннетиң согабыны умыт эдип ыбадат этмекден, берен махалы ишлейән, бермедик махалы хем ишлемейән хакына тутма гул ялы болмакдан утанярын. Шейле хем, Эзиз ве Җелил Реббиме довзах горкусы билен ыбадат этмекден, нетиҗеде, горкса ишләп, горкмаса ишлемейән эрбет гул ялы болмакдан утанярын. Мен Алла диңе ыбадат этмәге мынасыпдыгы үчин ыбадат эдйәрин» дийди».
* * *
Вехп ибн Мунеббех ене-де шулары айтды: «Эзиз ве Җелил Реббиме болан сөйгүм менде ыхлас билен ыбадат этмәге улы хөвес дөредйәр».
* * *
Мухаммет ибн Умейр ибн Утарут ибн Хаҗып шейле диййәр: «Пыгамбер алайхыссаламың сахабаларының арасында отырдык. Онуң янына Җебрайыл алайхыссалам гелип, аркасына эл дегирди. Мундан соңуны пыгамберимиз шейле гүррүң берди: «Җебрайыл мени ичинде ики саны гушуң хөвүртгесине меңзеш бир зат болан бир агаҗың янына алып гитди. Биринде ол, бейлекисинде хем мен отурдым. Ол агач бизи гөзъетим йитйәнчә бейгелтди. Эгер узатсам, гөйә элим асмана дегҗекди. Соң бир улаг салладылар ве нур инди. Җебрайыл өзүнден гидип, ере йыкылды. Онуң горкусының мениңкиден улудыгыны гөрдүм. Вахый[3] гелди: «Эй, Җебрайыл! Сен гул пыгамберими я-да хөкүмдар пыгамберими, җеннетими? Хайсыны ислейәрсиң?! Җебрайыл ятан еринден: «Гул пыгамбери» дийип, мени гөркезди».
* * *
Ибн Шыхап шейле диййәр: «Пыгамбер алайхыссалам Җебрайылдан онуң өзүни асыл ярадылан суратында гөркезмегини иследи. Ол хем:
— Муңа чыдап билмерсиң — дийди.
Пыгамбер алайхыссалам:
— Муны гөркезмегиңи ислейәрин — дийди.
Җебрайыл разы болды. Пыгамбер алайхыссалам Ай айдың бир гиҗеде намаз окалян ере чыкды. Җебрайыл оңа асыл гөрнүшинде гелди. Пыгамбер алайхыссалам оны гөрүп, өзүнден гитди. Соң өзүне гелди. Җебрайыла сөенди, бир эли гурсагында, бири болса аркасындады. Пыгамбер алайхыссалам:
— Субханалла[4]! Ярадылан затларың хич бириниң бейле боляндыгыны гөз өңүне гетирип билмездим — дийди.
Онда Җебрайыл:
— Сен Ысрапылы[5] гөрседиң, онуң он ики ганаты бар. Бир ганаты гүндогарда, бири гүнбатарда. Арш онуң гершинде. Ол хем кәмахал Аллатагаланың бейиклиги себәпли кичелйәр. Хатда серчеден хем кичиҗик гуша өврүлйәр. Ине, шол вагт аршы Алланың бейиклиги саклаяр — дийип җогап берди».
* * *
Ата шейле диййәр: «Муса алайхыссалам Аллатагаладан: «Эй, Реббим! Хайсы гулуң сенден көп горкар?» дийип сорады. Аллатагала хем оңа: «Мени иң говы танаян гулум» дийип җогап берди».
* * *
Абдылэзиз ибн Абу Рувват шейле диййәр: «Перишделериң дилеглериниң бири шейледир: «Эй, Аллам! Душманларыңдан ар алҗак гүнүңде[6] эмеле гелҗек горкыңы, шу вагт калпларымызың дуймаяндыгы үчин бизи багышла!».
* * *
Ысмайыл ибн Абу Халыт гоҗа Абу Исаның шейле диендигини роваят эдйәр: «Бир перишде Аллатагала күрсүсинден әлем-җаханы йөредип башлан махалы оңа сеҗде этди, башыны галдырмады. Тә кыямат гопянча хем галдырмаз. Кыямат гүни ол: «Эй, Реббим! Саңа лайык дереҗеде ыбадат этмедим. Йөне саңа хич зады шәрик хем этмедим. Сенден башга ишими табшырар ялы бир эеде эдинмедим» диер».
* * *
Омар ибн Хаттап бир гезек Кагба йүзленип:
— Эй, Кагп! Бизи Алланың бейиклиги билен горкуз! — дийди.
Онда Кагп оңа:
— Валла, Алланың ярадан гүнүнден бәри кыямда[7] дуран перишделери бардыр. Олар хенизем биллерини ашак эген дәлдирлер. Кәбирлери рукугдадыр[8], биллерини догрулан дәлдир. Кәбирлери сеҗдедедир, башларыны галдыран дәлдирлер. Ахыры сура[9] соңкы гезек үфленер. Оларың хеммеси билеликде: «Сени бейгелдйәрис, саңа хамд-у сена айдярыс. Саңа лайык ыбадат эдип билмедик» диерлер — дийди.
Мундан соң гүррүңини шейле довам этди: «Ол гүн бир адамың етмиш пыгамбериңки ялы ягшы амалы болса хем, ол гүнүң элхенчлигинден яңа амалыны аз хасаплар. Довзахыларың беденинден чыкан затлар билен долдурылан бир бедре Гүнүң догян тарапына дөкүлсе, гүнбатардакы яшаянларың онуң эрбет ысындан яңа келлечанагы ярыларды. Довзах сес эдип бир дем алса, не Алла якын перишделер, не-де бейлекилер галар. Хеммеси хем ики дызларына чөкүп: «Өз җаным, өз җаным!» диерлер. Хатда пыгамберимиз Ыбрайым алайхыссалам хем оглы Ысхак пыгамбери унудып: «Реббим! Мен сениң достуң Ыбрайым» диер».
Кагбың бу сөзлери отуранлары аглатды. Хатда олар хамсыгып башладылар. Хезрети Омар муны гөрүп:
— Эй, Кагп! Бизе сөйүнҗи бер! — дийди.
Ол хем:
— Сөйүнҗи болсун! Аллатагаланың үч йүз он дөрт саны шеригаты[10] бар. Оларың бири билен гелен кишини, ыхлас сөзи[11] шерти билен рехметиниң боллугы себәпли, Аллатагала хөкман җеннете салар. Валла, эгер Аллатагаланың рехметиниң нәхилидигини билседиңиз, хайырлы иш этмекде ялтанмаздыңыз. Эгер җеннет хүйрлериниң бири түм гараңкы бир гиҗеде дүнйә асманындан гөрүнседи, ер йүзи он дөрди гиҗәниң айдыңлыгындан хем айдың боларды. Ериң яшайҗылары онуң якымлы ысыны аларды. Җеннет әхлиниң лыбасларындан бир лыбас бу гүн дүнйә ачылса, элбетде, оңа середен өзүнден гидерди ве гөзлери муңа чыдап билмезди — дийди.
* * *
Ибн Мүбәрек шейле диййәр: «Суфян Сөври Аллатагаланың: «Мусаның Ребби дага теҗелли эденсоң[12], оны сарсылып, ёк болуҗы этди»[13] аяты хакда: «Даг ере гөмүлди, хатда деңзе чүмүп гитди. Ондан соң хем ашак гитмегини довам этди» дийди».
* * *
Шагбы шейле диййәр: «Җебрайыл перишде Меръем оглы Иса пыгамбер билен душушды. Җебрайыл оңа: «Эсселаму алейке, я, Рухалла[14]!» дийди. Ол хем: «Ве алейкессалам, я Рухалла!» дийип җогап берди, соң хем: «Эй, Җебрайыл! Хачан кыямат гопар?» дийип сорады. Җебрайыл ганатларының арасында титреди ве: «Соралян сораяндан хас говы билмейәр» дийип: «Асманларың ве ериң гөтерип билмеҗек дереҗесинде агыр болан ол сагат, сизе диңе дуйдансыз гелер. Кыяматың вагтыны ондан башга хич ким билмез»[15] диен аяты окады».
* * *
Шагбы шейле диййәр: «Меръем оглы Иса пыгамбериң янында кыямат агзалан махалы, сесини гаталдып: «Меръем оглуның янында кыямат агзалан махалы дыммагы оңа гелишмез» дийди».
* * *
Алы ибн Алы Рыфагы шейле диййәр: «Хасан Басры: «Элбетде, биз ынсаны мушакгатда яратдык»[16] аятыны окап: «Шу ынсаның дөз гелҗек задына, дөз гелип билҗек башга ярадылан зады билмейәрин» дийди».
* * *
Ене Алы ибн Алы Рыфагы шейле диййәр: «Сагыт ибн Абулхасан бир гүн ёкардакы аяты[17] окады ве мундан соң: «Ынсан дүнйәниң кынчылыкларына ве ахыретиң эйменчликлерине дөз гелер» дийип дүшүндирди».
* * *
Харун ибн Рыгап шейле диййәр: «Асгас ибн Салама достларына: «Сизе бир бейт окап берҗек» дийди. Онда достлары: «Сен гошгыны нәме этҗек?» дийдилер. Ол:
Кыяматдан халас болсаң мегер сен,
Элхенч ёвуз гүнден халас боларсың.
Айтмасам, арамызда аңладар бизиң,
Хич хачанам болмандыгын достлугың
диен сетирлери окады. Диңлейҗилер шейле бир агладылар вели, оларың башга бир зат үчин шу гүнки ялы агландыкларыны гөрмәндим».
* * *
Ымран ибн Худейр шу җүмләни анезелилерден[18] бир адамдан роваят эдйәр: «Биз муңа меңзеш зады гөрмедик. Бизден биримиз гөз үчин болар горкусы билен хич хачан башга бириниң халына агламады».
* * *
Абдылла ибн Амыр ибн Рабыга шейле диййәр: «Омар ибн Хаттабы гөрдүм. Ол ерден бир саманың чөпүни алып: «Кәшге, шу саманча болсадым. Кәшге, хич зат болмасадым. Кәшге, эҗем мени догурмасады. Кәшге, бүтинлей унудылан, хич зат болсадым» дийди».
* * *
Омар ибн Хаттап бир адамың: «Анык ки, ынсаның үстүне замандан хич зат болмадык бир вагт-мүддет гечмедими?»[19] аятыны окаяндыгыны эшидип: «Кәшге, ол дөвүр гутарсады» дийди.
* * *
Эбан ибн Осман ибн Аффан шейле диййәр: «Хезрети Омар соңкы деминде ятырка: «Эгер гүнәм гечилмесе, маңа ве эҗеме хайп» дийди».
* * *
Хумейт ибн Хылал шейле диййәр: «Херем ибн Хайян ве Абдылла ибн Амыр ёлда дүелери билен баряркалар өңлеринден бир яндак чыкды. Дүелериң икиси хем оңа тарап ылгады, оларың бири яндагы ийди. Херем достундан:
— Сен өзүңиз яндак болуп, дүйәниң ийип гитмегини исләрмидиң? — дийип сорады.
Ибн Амыр:
— Мен муны ислемездим. Мен чын йүрекден Эзиз ве Җелил Алланың җеннете салмагыны ислейәрин — дийди.
Херем болса оңа:
— Мен небсимиң ислеглерине табын этдирилҗекдигими билседим, элбетде шу яндак болуп, мени шу дүйәниң ийип гитмегини исләрдим — дийди».
* * *
Абуд-Дерда шейле диййәр: «Мен машгаламың гечиси болуп, олара бир мыхман геленде, мениң дамагымы чалмакларыны, өзлери ийип, бейлекилере хем ийдирмеклерини исләрдим».
* * *
Хаммат бизе Ыбрайымдан шейле роваят эдйәр: «Хезрети Әше бир агаҗың янындан гечип барярка: «Кәшге, шу агаҗың япрагы болсадым» дийди».
* * *
Хасан Басры шейле диййәр: «Абу Бекр Сыддык агаҗың үстүнде бир гуш гөрүп: «Эй, гушҗагаз, сен нәхили багтлы! Миве иййәрсиң, агаҗың үстүне гонярсың. Мен хем гушларың иен мивеси болмак ислейәрин» дийди».
* * *
Катада шейле диййәр: «Абу Убейда ибн Җеррах: «Мен бир гечи болуп, машгаламың мени өлдүрип, этими иймегини ве чорбамы чемчеләп ичмегини ислейәрин» дийди».
* * *
Ымран ибн Хусайн шейле диййәр: «Мен гүйчли түвелейиң мени гум ялы тозатмагыны арзув эдйәрин!».
* * *
Ибн Мүбәрек бизе Хасан Басрының тоба эденлер барада шейле диендигини роваят эдйәр: «Арзув этдилер, хыял деңзине чүмдүлер, эмма, ислег-арзувларына говушмадылар. Йөне соң өзлерини ыбадата чын йүрекден бердилер».
[1] «Алланың адыны йөнекей гүнделик ишлериңизде дәл-де, йөрите отурып зикр эдиң» диен маныда.
[2] Гурханың 22-нҗи («Хаҗ») сүресиниң 30-нҗы аяты.
[3] Вахый – Алладан гелйән сөз. Вахый диңе пыгамберлере гелйәр.
[4] Субханалла – манысы «Алла әхли кемчиликлерден пәкдир» диймек.
[5] Ысрапыл — кыяматың болҗакдыгыны хабар берҗек перишде.
[6] Ягны кыямат гүнүнде.
[7] Кыям — намазда дик дурмак.
[8] Рукуг — намазда эгилмек.
[9] Сур — кыямат магшар гопанда чалынҗак ак сурнай, түйдүк.
[10] Ягны җеннете гелйән ёлы.
[11] Ыхлас сөзи (асыл нусгада «Келимети ыхлас») – 1. Алланың бирлигини ыкрар этмек. 2. Алла шәрик гошмазлык.
[12] Теҗелли этмек — нур салмак, серетмек.
[13] Гурханың 7-нҗи («Аграф») сүресиниң 142-нҗи аяты.
[14] Иса пыгамбериңем, Җебрайыл перишдәниңем Рухалла (Алланың рухы) лакамлары бардыр.
[15] Гурханың 7-нҗи («Аграф») сүресиниң 187-нҗи аяты.
[16] Гурханың 90-нҗы («Белет») сүресиниң 4-нҗи аяты.
[17] Гурханың 90-нҗы («Белет») сүресиниң 4-нҗи аяты.
[18] Анезе – бир арап тайпасы.
[19] Гурханың 76-нҗы («Ынсан») сүресиниң 1-нҗи аяты.