ГАЙГЫ-ГУССА ВЕ АГЛАМАК ХАКДА
Хасан Басры шейле диййәр: «Пыгамбер алайхыссалам шейле дийди: «Дүнйә мөминиң зынданы, капырың болса җеннетидир».
Хасан Басры муны шейле дүшүндирди: «Валла, мөмин дүнйәде гайгы-гуссалы халда гезер. Ол нәдип гайгылы болмасын, себәби Эзиз ве Җелил Аллатагаладан онуң довзаха гирҗекдиги барада хабар гелендир, эмма ол ерден чыкҗакдыгы барада вели хабар ёкдур. Ол сыркавчылыга, бела ве мүшгил ишлере сезевар болар, оңа зулум эдилер, көмек эдилмез. Шонуң үчинем мөмин Эзиз ве Җелил Алладан согаба гарашар. Ол дүнйәден өтйәнчә мыдама гайгылы ве горкулы халда болар. Ол диңе дүнйәден өтен махалы асудалыга ве хөдүр-кереме етер».
* * *
Салым ибн Абу Җагт шейле диййәр: «Меръем оглы Иса пыгамбер шейле дийди: «Дилине эе болан, өйүни өзүне дар хасапламадык ве кичи гүнәлери үчин аглаян адама бушлуклар болсун!»[1].
* * *
Абдылагла Тейми шейле диййәр: «Киме ылымдан гөзяш дөкмәге себәп болҗак зат берилмедик болса, онда оңа пейда берҗек ылым берлен дәлдир. Чүнки Аллатагала алымларың сыпатларыны беян эдип: «Аслында (Гурхан гелмезден) өң хем өзлерине ылым берлен кишилере (аятлар) окалан махалы сеҗде эдип, йүзлерини ере гоюп: «Бизиң Реббимиз хемме кемчиликден пәкдир. Реббимизиң вадасы хөкман амала ашар» диерлер. Олар аглап, йүзин ятарлар ве (оларың) горкулары артар»[2] дийди».
* * *
Хасан Басры шейле диййәр: «Аллатагала үчин узага чекйән гайгы-гамдан өзге согаплы ыбадат ёкдур».
* * *
Хасан Басры Гурханы Керимиң: «Бу сөзе гең галярсыңыз, гүлйәрсиңиз, йөне агламаярсыңыз?»[3] аятыны окап: «Өңлер акыллы адамлар бу меселеде, ягны Гурхан окалан махалы аглардылар. Инди болса, сиз шу калпларыңыза аглаң, шу амалларыңыза аглаң. Себәби ынсаның гөзлери аглар, эмма йүреги даш ялыдыр» дийди.
* * *
Суфян Сөври шейле диййәр: «Гайгы-гам диңе гөзүң гөрүш мукдарына гөрә болар, ягны хер кимиң гайгы-гамы диңе башына гелен беласына гөрә болар».
* * *
Шугайып Җуббайы шейле диййәр: «Бендәниң гүнәкәрлиги, ягны динден ве онуң дессурларындан даш дүшмеги соңкы чәгине барансоң, ол ики гөзүне эе болар, ягны агламак ислән вагты агламагы башарар».
* * *
Бир адам Ибн Месгуда йүзленип:
— Эй, Абу Абдырахман! Маңа өвүт бер! — дийди.
Ол хем оңа:
— Өйүң саңа дар болмасын, кичиҗик гүнәлериң үчин гөзяш дөк, дилиңи эрбет сөзлерден сакла — дийди.
* * *
Абу Бекр Сыддык шейле диййәр: «Башарсаңыз аглаң. Агламагы башармасаңыз, агламага тагалла эдиң!».
* * *
Омар ибн Хаттап шейле диййәр: «Тоба эденлер билен сөхбет эдип отурың. Себәби оларың йүреклери юкадыр».
* * *
Муҗахыт шейле диййәр: «Езит ибн Шеҗерәниң бизе ятладып, аглап айдан затлары шулардыр: «Эй, ынсанлар! Алланың сизе берен ныгматыны ятлаң. Алланың ныгматының сизде галдыран ызлары, гөр, нәхили оңат! Эгер гызыл, сары, ак, гара реңклериң ве затларың арасындакы мениң гөрйәнлерими гөрседиңиз! Намаз хачанда хемметараплайын долы берҗай эдиленде асманың, җеннетиң ве довзахың гапылары гиңден ачылар.
Ики гошун хатары[4] йүзбе-йүз болансоң асманың, җеннетиң ве довзахың гапылары ачылар. Овадан гөзли хүйр гызлары безенип, ёкардан ашак середерлер. Бир адам душмана тарап йүзүни өвүрсе, олар: «Эй, Аллам! Оңа көмек эт. Эй, Аллам! Оны максадына етир!» диерлер. Ол ызына середенсоң хем ондан гизленип: «Эй, Аллам! Оңа мерхемет эт!» диерлер.
Энем-атам сизе гурбан болсун! Душмана рехимсиз хүҗүм эдиң, овадан гөзли хүйр гызларыны гынандырмаң!
Эгер ол адам өлдүрилип, шехит дүшсе, онуң ганындан акан илкинҗи дамҗа онуң гүнәлерини гөйә япракларың агачлардан дөкүлиши ялы дөкер. Ол хүйр гызларың ики санысы инип, онуң йүзүндәки топрагы сүпүрерлер ве икиси хем оңа: «Мен сениңки» диерлер. Ол хем: «Мен сизиңки» диер. Соң оңа җеннет өсүмликлеринден тикилен йүз саны эшик гейдирилер».
* * *
Укба ибн Амыр Җухени шейле диййәр: «Мен пыгамбер алайхыссаламдан: «Эй, Алланың илчиси! Нәдип халас болалы?» дийип сорадым. Онда Ресулалла маңа: «Өзүңе гаршы болҗак зат үчин дилиңе гайым бол! Өйүң саңа дар болмасын, кичи гүнәлериң үчин агла!» дийди».
* * *
Мәлик ибн Энес шейле диййәр: «Маңа Меръем оглы Исаның ымматына шейле диендиги гелип етди. Ол: «Алланың зикринден башга сөзи көпелтмәң, ёгсам калпларыңыз гатылашар. Гаты калп Алладан даш дүшүрер, йөне сиз муны билмерсиңиз. Сиз гүнәли ынсанлара гөйә хоҗайын ялы серетмәң. Гайта, оларың гүнәлери барада гөйә башгасының орнуна болан гуллар ялы пикир эдиң. Ынсанлар ики хилидир. Сынаг эдилйәнлер ве сынагдан азат боланлар. Сынаг эдилйәнлере мерхемет эдиң. Сынагдан азат болан эгер асудалык ичинде болса-да, Аллатагала хамд-у сена этсин».
* * *
Шагбы шейле диййәр: «Кыямат гүнүнде окан хутбасы өзүне гөркезилмеҗек хич бир вагызчы ёкдур».
* * *
Омар ибн Абдылэзиз шейле диййәр: «Өвги, тарып эдилмек горкусы сөзлеримиң көпүсини айтмагыма пәсгел боляр».
* * *
Хасан Басры шейле диййәр: «Мен шейле бир адамлары гөрдүм. Олар өзлериниң хикметлериниң өзүне ве достуна пейда берҗегини билсе хем, диңе мешхур болмакдан чекинип мундан гача дурардылар. Оларың бири ёлда ынсанлара зыян берҗек бир зады гөрсе, оны айырмага диңе мешхур болмак горкусы пәсгел берйәрди».
[1] «Бушлуклар болсун» сөз дүзүми көрленч халатда хадысларда душ гелип, кимдир бирине шатлыклы хабар берленде айдыляр.
[2] Гурханың 17-нҗи («Исра») сүресиниң 107-109-нҗы аятлары.
[3] Гурханың 53-нҗи («Неҗм») сүресиниң 59-60-нҗы аятлары.
[4] Мусулманлар билен капырларың гошуны.