ХАРСЫДҮНЙӘЛИК ХАКДА
Хасан Басры бир гезек: «Валла, хич бир ыммат бу ымматың харсыдүнйәлиги ялы харсыдүнйәлиге дучар болмады. Ене хич бир ыммата бу ыммата эдилен несихат ялы несихат эдилмеди» дийди ве оларың бири-бирлерине эе чыкҗакдыкларыны, хормат-сылагларыны, гатнашыкларыны ве мерхеметлерини агзап: «Хич бир ыммата бу ыммата эдилен вагыз ялы харсыдүнйәлиге вагыз эдилмеди. Хич бир ыммат бу ымматың харсыдүнйәлиги ялы харсыдүнйәлиге дучар болмады. Хатда кәбирлери шейле дереҗе аздылар велин, оларың бири доганының сүңклерини бөлек-бөлек эдип: «Ханы бир дирхем гетир! Ханы бир дирхем гетир!» диер. Бу иши хем, ол оңа диш гыҗап хем-де залымлык билен ерине етирер» дийди.
* * *
Хасан Басры ене шейле диййәр: «Ыслам! Ыслам нәме? Ол калбың Аллатагаланың янында пәк болмагы ве хер бир мусулманың сенден аркайын болмагыдыр».
* * *
Хасан Басры ене шейле диййәр: «Өңлер бир адам башга бир мусулман доганы ёгалансоң, онуң машгаласының гүн-гүзераныны доландырмакда кырк йыл ярдам эдерди».
* * *
Хасан Басры ене-де шейле диййәр: «Сахабаларың бири башга бир сахаба билен душушан махалы, ичинден шейле дийип дилег эдер экен: «Эй, Аллам! Бизи хем, оны хем магпырат[1] эйле. Бизи хем, оны хем җеннете сал». Эмма инди пула гул болнансоң, хейхат!».
* * *
Абдырахман ибн Җубейр шейле диййәр: «Абуд-Дерда шейле дийди: «Бай доганларымыз, гөр, нәхили ынсаплы! Дин ишлеринде бизи сөййәрлер, дүнйә ишлеринде болса бизден айрылярлар. Олар билен йүзбе-йүз боланымда: «Эй, Абуд-Дерда! Сени Алла үчин сөййәрин» диййәр. Бир ишде оңа мәтәч боланымда болса, маңа көмек этмекден даш дуряр».
* * *
Ене Абуд-Дерда шейле диййәр: «Аҗаллары геленде байлары бизе сыгындыран Аллатагала хамду-сена болсун! Эмма биз өлүмимиз геленде олара сыгынмак ислемейәрис. Элбетде, ол байлар кыямат-магшарда: «Кәшге, мен хем мухаҗырларың[2] гарыпларындан бир гарып болсадым!» диер».
* * *
Хасан Басры шейле диййәр: «Мөмин мөминиң бир бөлегидир, оларың мәтәчлиги ве дерди умумыдыр. Бири бейлекисиниң йүкүни чекер, шатлыгына шатланар, гынанҗына гынанар. Олар бири-бирлериниң айнасыдыр. Онда халамаян зады гөрсе, оңа пәсгел болар, оны дүзедер, Хак ёлуна гөнүкдирер. Гизлинликде ве әшгәрликде хемме ерде оны горар.
Хакыкатдан хем, саңа достуң себәпли бир язгыт берлер. Сөен кишиңи яда саландыгың үчин хем саңа бир язгыт берлер. Онуң ялы болян болса, достларыңы, доганларыңы ве отурҗак ерлериңи говы сайла!».
* * *
Хасан Басры шейле диййәр: «Эсвет ибн Серич метҗитде[3] гүррүң берйәнлериң бириди. Ол метҗидиң арка тарапында кысса гүррүң берерди. Бир гүн оларың сеслери гаталды, метҗидиң өңүнде отуранлар оларың үстүне гыгырдылар. Муҗахыт ибн Месгут Сулеми оларың янына барды. Оңа ер бердилер. Ол:
— Мен отурмак үчин гелмедим. Эгер мазалыҗа отурҗак болсаңыз отурың. Сизиң сеслериңиз гаты чыкяр, метҗит җемагаты сизи язгарды. Мусулманларың халамаян задындан даш дуруң! Алла сизе мерхемет этсин! — дийди.
Олар хем:
— Алла сизе хем мерхемет этсин, сениң несихатыңы кабул эдйәрис — дийдилер».
* * *
Селман ибн Рабыга казы Шурейхден өң казы болупды. Ондан бир меселе барада сорадылар, ол хем ялңыш җогап берди. Онда Амр ибн Шурахбил: «Бу меселедәки хөкүм шейле-шейледир» дийип, догры җогабы айтды.
Селманың муңа гахары гелди ве ягдайы Куфәниң хәкими Абу Муса Эшгара шикаят этди. Ол хем: «Эй, Селман! Саңа лайык зат, сениң гахарланмазлыгыңды. Эй, Амр! Саңа лайык зат хем, муны онуң гулагына айтмагыңды» дийди.
* * *
Хасан Басры шейле диййәр: «Аша гитмән сөйүң ве аша гитмән гахарланың. Кәбир адамлар кәбир кишилериң сөйгүлеринде аша гитдилер ве хеләк болдулар. Кәбир кишилер хем кәбир кишилере душманчылыкда аша гитдилер ве хеләк болдулар. Сөйгүңде ченден гечме! Өйке-кинеде хем чәкден чыкма!
Ким доганының өңүнде оны өртйән бир перде гөрсе, оны ачмасын! Доганыңы шугуллама! Себәби саңа оны шугулламак гадаган эдилендир. Оны ичгин билҗек болуп, ичине аралашма! Ондан дашлашма!».
* * *
Ысхак ибн Решит шейле диййәр: «Хезрети Омар шейле дийди: «Өзүниң гизлин эдйән задыны башга адамларың әшгәр этмегини ислемеги, өзүниң эдйән ишини башгалар эденде гахарланмагы, өзи билен бир меҗлисде отуран достуны я-да өзүне дегишли болмадык меселеде кимдир бирини ынҗытмагы шол ынсана кемчилик хөкмүнде етер».
* * *
Мухаммет ибн Аббат ибн Җапар шейле диййәр: «Ибн Апбас шейле дийди: «Улы хорматыма лайык киши мениң билен гатнашян кишидир».
* * *
Сүлейман ибн Муса шу хадысы гүррүң берди: «Эрбет достлук — сөгүнч гүрлемек, харсыдүнйәлик, эрбет ахлакдыр».
* * *
Хаҗҗач ибн Фурафиса шейле диййәр: «Китапларың биринде бизе шу маглумат гелип говушды: «Ким маслахатлашман бир иш этсе, бу оны кынчылыга элтер. Ким өзүне зулум эденден эли, дили билен ар алмаса ве оңа өйке-кине этмесе, ине, ол киши анык ылым эесидир. Ким өзүне зулум эден киши үчин Алланың багышламагыны дилесе, ине, ол шейтаны еңендир».
* * *
Абу Разин шейле диййәр: «Бир адам Фудайыл ибн Безваның янына гелип:
— Пылан адам сени яманлады — дийди.
Ол хем:
— Мен оңа эмр эдене гахарланярын. Алла мени хем, оны хем багышласын! — дийди.
Ондан:
— Оңа эмр эден ким? — дийдилер.
Ол:
— Шейтан — дийип җогап берди».
* * *
Суфян Сөври шейле диййәр: «Хаҗҗач хачанда Фудайыл ибн Безваны өлдүрмекчи боланда, ондан:
— Мен сени ёкары везипә беллемедимми? — дийип сорады.
Ол:
— Ёк, терсине, сен мени гул эдипдиң — дийди.
Хаҗҗач:
— Саңа хормат-сылаг этмедимми? — дийип сорады.
Ол:
— Ёк, терсине, мени песелтдиң — дийди.
Хаҗҗач:
— Сени хөкман өлдүрҗек — дийди.
Ол:
— Хич хили гүнәсиз ере ве хич хили этмишим болмаса хем шейдермиң? — дийип сорады.
Хаҗҗач:
— Сени хөкман өлдүрерин — дийди.
Ол:
— Онда мен саңа давагәр боларын — дийди.
Хаҗҗач:
— Ол ягдайда мен сени еңерин — дийди.
Онда ол:
— Ол гүн сенден башгасы эмин болар — дийди.
Хаҗҗач:
— Сен хич сув датман өлерсиң! — дийди.
Ол хем:
— Онда мен оңа сенден өңүрти барарын — дийди.
* * *
Хасан Басры шейле диййәр: «Пыгамбер алайхыссалам айтды: «Алланың янында бир кишиниң ювдан өйке-кинесинден я-да бир бела үчин эдилен сабыр ювдумындан хас говы хич бир ювдум ёкдур. Алланың янында хич бир дамҗа Алланың горкусы билен дөкүлен бир дамҗа гөзяшдан я-да Алла ёлунда дөкүлен бир дамҗа гандан хас говы дәлдир».
* * *
Абдылла ибн Мүбәрек шейле диййәр: «Бир адам Мекхула: «Пыланы сени яманлады» дийди. Ол хем: «Алла оңа мерхемет этсин! Ол шейтаның хилесине гидип алданыпдыр» дийип җогап берди».
* * *
Рафыг Хайыр Тайы шейле диййәр: «Мен Абу Бекр Сыддык билен бир газавата биле гатнашдым» дийди ве шейле роваят этди: «Абу Бекр Сыддык шейле дийди: «Ким мөминлере зулум этсе, Алланың өңүнде нәхак иш этдиги болар. Себәби мөминлер Алланың гоңшулары ялы оңа якындырлар. Аллатагала гулларының гачыбаталгасыдыр.
Алланың адындан ант ичйәрин, мөмин киши гоңшусының гойны я-да дүеси бир бела учраса, муңа гынанып, узын гиҗәни гынанҗы зерарлы эндам-җаны чишен ягдайда гечирер. Аллатагала өз гоңшусына дегени үчин, элбетде, газапланар».
* * *
Езит ибн Мейсере шейле диййәр: «Мөминиң ахы-наласы сени якмасын! Чүнки, онуң саг эли Алланың элидир. Хер гүн еди гезек бүдрәп йыкылса-да, оны тутуп галдырар».
* * *
Абу Сагыт Худры шейле диййәр: «Ресулалла өйден хем чыкмаян гыздан хем хас утанҗаңды. Халамаян бир задыны гөренде, онуң халамаяндыгыны йүз-кешбинден аңярдык».
* * *
Энес ибн Мәлик шейле диййәр: «Пыгамбер алайхыссалам айтды: «Сиз өзүңиз үчин сөййән задыңызы, доганыңыз үчин сөймесеңиз, иман этдигиңиз болмаз, иманыңыз кәмил болмаз».
* * *
Атыйе Куфы Аллатагаланың: «Гүррүңсиз, сен (эй, Мухаммет) кәмил ахлага эесиң»[4] диен аят барада «Сен Гурханың эдебине эесиң» дийди.
* * *
Абу Селеме ибн Абдырахман шейле диййәр: «Ресулалла шейле дийди: «Мөмин хормата лайык, йүзи нурлы, юмшак хәсиетли, ягшы ахлаклы болмалыдыр. Гүнәкәр болса зандыямандыр, алдавчыдыр».
* * *
Катада шейле диййәр: «Ибн Омар шейле дийди: «Алланың янында газаба иң көп лайык гул — көп айыплаян ве нәлетлейән кишидир».
* * *
Рыях ибн Убейда гүррүң берйәр: «Мен бир гезек Омар ибн Абдылэзизиң янында отырдым. Хаҗҗаҗың ады агзалды. Оңа сөгдүм ве гаргадым. Онда Омар: «Гараш эй, Рыях! Мениң эшидишиме гөрә, бир адам зулум этсе, мазлум[5] хем залыма сөгүп, гаргынып, яманлап аша гитсе, ондан хаклы киши ялы залымың хем онда хакы болар» дийди».
* * *
Хеким ибн Җабыр шейле диййәр: «Абуд-Дерда бир гезек достларының арасында йүзүни япып, гышарып ятырды. Оларың янындан бир насраны[6] руханысы гечип гитди. Руханының гарынлакдыгы олары хайран галдырды. Олар:
— Эй, Аллам! Сен оңа нәлет эт. Ол нәхили гарынлак ве семиз — дийдилер.
Абуд-Дерда йүзүни ачып:
— Яңы сизиң яныныңыздан гечен ким? — дийип сорады.
Оңа:
— Насраны руханысы — дийдилер.
Онда Абуд-Дерда:
— Хич кими нәлетлемәң, себәби нәлет эден киши кыямат гүнүнде Алланың янында догручыл болуп билмез — дийди».
* * *
Абу Меръем Гассаны шейле гүррүң берйәр: «Бир гезек гошунымыздан бир топар адам яй атмак үчин ярыша чыкдылар. Оларың бири хем Сагыт ибн Амырды. Ярыш махалы хова гызды. Сагыт селлесини башына орады. Онуң сачлары дүшүпди. Сагыт хер гезек ок атанда, атан зады барада оңа бир затлар айдян эмин оны танамаяндыгы үчин:
— Эй, кел! — дийип йүзленйәрди.
Сагыт оңа:
— Эгер перишделериң саңа нәлет этмегинден горкмаян болсаң, онда айдыбер — дийди.
Ярышянларың бири:
— Перишделер нәме үчин оңа нәлет этсин? — дийип сорады.
Сагыт хем:
— Ким бир адамы өз адындан башга бир ат билен чагырса, перишделер оңа нәлет эдерлер — дийди».
* * *
Абу Шурейк шейле диййәр: «Ресулалла шейле дийди: «Бир мусулманы шатландырмак, онуң бир кынчылыгыны деп этмек, бергисини үзмек я-да ач болса доюрмак Алла үчин амалларың иң говусыдыр».
* * *
Убейдылла ибн Захр бир достундан роваят эдйәр: «Ресулалла шейле дийди: «Ким бир мөминиң гөзүни айдың этсе, бегендирсе, Алла хем кыямат гүни онуң гөзүни айдың эдер».
* * *
Сехл ибн Мугаз ибн Энес Җухени какасындан гүррүң берйәр: «Ресулалла шейле дийди: «Ким бир мөмини оны айыплаян бир мынапыкдан гораса, кыямат гүнүнде Аллатагала оны довзах одундан гораҗак бир перишде иберер. Ким бир мусулмана төхмет япып, айыпласа, айдян задының җезасыны чекйәнчә, Аллатагала оны довзахың көпрүсиниң үстүнде саклар».
* * *
Шехр ибн Хушып бизе Эсма бинти Езидиң шу хадысы эшидендигини роваят эдйәр: «Ресулалла шейле дийди: «Ким ёк махалы доганының намысыны гораса, оны отдан азат этмек Аллатагала үчин ваҗып болар».
* * *
Абу Хурейра шейле диййәр: «Ресулалла шейле дийди: «Бир мусулманың башга бир мусулманың көңлүне горкы салмагы халал дәлдир».
* * *
Хемзе ибн Абде шейле диййәр: «Ресулалла шейле дийди: «Бир мөминиң доганына ёвузлык гөркезмеги я-да оңа доганының эзъет берҗек назар билен серетмеги халал дәлдир».
* * *
Алкама бизе Абдылладан шейле роваят эдйәр: «Бир гезек бир адам гелип:
— Пылан киши мениң эҗем барада шейле-шейле затлар айтды — дийип шикаят этди.
Абдылла сесини чыкарман дымды. Ол адам ене-де:
— Ол эҗем барада шейле-шейле затлар айтды — дийип айтды.
Онда Абдылла оңа:
— Сен оны эййәм ики гезек айтдың — дийди».
* * *
Абу Бекр ибн Хазм шейле диййәр: «Ресулалла шейле дийди: «Ики дост диңе Алланың оларың арасында гоян бир ынамы билен гатнашар. Шонуң үчин оларың бири-бирлерине халамаян затларыны айтмагы халал дәл».
* * *
Ыкрыма ибн Халыт шейле диййәр: «Ресулалла шейле дийди: «Ики киши үчүнҗиниң янында ювашҗадан хүмүрдешип гүрлешмесин. Себәби бу үчүнҗә ёкуш дегер. Алла болса, мөминиң гөвнүне дегилмегини халамаз».
* * *
Сехл ибн Сагт шейле диййәр: «Пыгамбер алайхыссалам айтды: «Мөмин мөминиң янында тениндәки яра ялыдыр. Ярасы себәпли беден нәхили эҗир чекйән болса, мөмин хем мөмин үчин шейле эҗир чекер».
* * *
Энес ибн Мәлик шейле гүррүң берйәр: «Биз Ресулалланың янында отыркак, ол бизе:
— Хәзир сизе җеннет әхлинден бири гелер — дийди. Шол махал энсарыдан бир адам сакгалындан тәрет сувуны дамдырып, чеп элине сандалларыны[7] алып гелди. Эртеси гүн Ресулалла бизе ене:
— Хәзир сизе җеннет әхлинден бир адам гелер — дийди. Ол адам ене дүйнки ялы гөрнүшде чыкып гелди. Биригүн ене Ресулалла бизе:
— Хәзир сизе җеннет әхлинден бир адам гелер — дийди. Ол адам ене-де шол өңки ягдайында гелди. Ресулалла туруп гиденсоң, Амр ибн Асың оглы Абдылла ол адамың ызына дүшди ве оңа:
— Какам билен гыгырышдым. Үч гиҗе өе гелмеҗекдигиме ант ичдим. Эгер ругсат берсең, антымың вагты гечйәнчә, мени яныңда сакласаңыз — дийди.
Ол хем:
— Боляр — дийип җогап берди.
Энес айдяр: «Мундан соң Абдылла үч гүнләп онуң янында болды. Онуң гиҗе еринден туряндыгыны гөрмеди. Диңе дүшегинде ятырка Алланы ятлаярды ве оңа текбир гетирйәрди[8]. Соң эртир намазы үчин турярды ве говы тәрет алярды».
Абдылла айдяр: «Шейле хем мен онуң хайырдан башга зат айдандыгыны эшитмейәрдим. Үч гиҗе гечип, онуң эдйән ишлерини аз гөрүп башланымдан соң, өй эесине:
— Эй, Алланың гулы! Какам билен арамызда хич хили дава-җенҗел ёк. Йөне мен Ресулалланың үч гезек сен барада: «Хәзир сизе җеннет әхлинден бири гелер» диендигини эшитдим. Үч гезек хем сен чыкдың. Сениң нәме эдйәндигиңи гөрейин ве саңа уяйын дийип, өйүңе гирмек иследим. Сениң улы, артыкмач бир зат эдйәндигиңи гөрмедим. Сени Ресулалланың айдан задына етирен зат нәме? — дийип сорадым.
Онда ол маңа:
— Сениң гөрен затларың — дийди. Мен онуң янындан гайтмакчы боланымда, ол мени чагырып ене-де:
— Диңе сениң гөрен затларың. Йөне мен шугулларың хич хайсына өйке-кине этмейәрин. Хич бир мусулмана Аллатагаланың оңа берен хайры себәпли гөрипчилик этмейәрин — дийди.
Онда Абдылла ибн Амр оңа:
— Ине сени етирен шудур! Ол хем бизиң гүйҗүмизиң етмедик задыдыр — дийди».
* * *
Омар ибн Хаттап хутбада шейле диерди: «Бир кишиниң ат-абрайы билен өвүнмеги сизи гең галдырмасын. Ким аманаты ерине етирип, адамларың мал-мүлкүнден ве намысындан эл чексе, ол хакыкы кәмил адамдыр!».
* * *
Энсарылардан болан Җабыр ибн Абдылла ве Абу Талха ибн Сехл роваят эдйәрлер: «Ресулалла шейле дийди: «Бир мусулманың ат-абрайының басаланан еринде я-да ар-намысына деглен еринде, оны көмексиз гоян кишини Аллатагала хем ол мәтәч болан махалы көмексиз ве бичәре ягдайда гояр. Шейле хем, ар-намысына деглен я-да ат-абрайының депгиленен, хорланан еринде бир мусулмана көмек эдене Аллатагала хем хөкман ол мәтәч махалы оңа көмек эдер».
* * *
Хасан Басры шейле диййәр: «Ресулалла шейле дийди: «Иса алайхыссалам бир адамы (шәгиртлериниң бири болмалы) алтын огурлаяндыр өйтди ве ондан:
— Эй, пылан! Зат огурладыңмы? — дийип сорады.
Ол хем:
— Өзүнден башга ылах болмаяндан ант ичйәрин, огурламадым — дийип җогап берди.
Хезрети Иса хем:
— Алла догрудыр! Гөзүм ялан сөзледи? — дийди».
* * *
Омар ибн Абдылэзиз шейле диерди: «Эгер саңа аша агыр дүшмесе, достуң хакдакы пикириң ягшы болсун!».
* * *
Абу Бекр Сыддык оглы Абдырахмана гоңшусы билен гыгыршып дурка габат гелди. Оңа: «Гоңшың билен давалашма! Себәби адамлар гидер, гоңшың галар!» дийди.
* * *
Хасан Басры шейле диййәр: «Мусулманың ахлагының иң говусы багышламакдыр».
* * *
Абу Хурейра шейле диййәр: «Ресулалла шейле дийди: «Җебрайыл маңа гоңшы барада шейле бир маслахатлары берди вели, гоңшым маңа мирасдүшер болар өйтдүм».
* * *
Абу Хурейра шейле диййәр: «Ресулалла шейле дийди: «Гоңшусы зулумындан аманда болмадык бенде хич хачан кәмил имана етип билмез».
* * *
Хузейфа шейле диййәр: «Көп ялан сөзлейән ве гыбат эдйән адам җеннете гирмез».
* * *
Мутталып ибн Хинтап шейле диййәр: «Бир адам Ресулалладан:
— Гыбат нәме? — дийип сорады.
Ол хем:
— Бир адамың ислемейән ягдайыны айтмагыңдыр — дийди.
Ол адам:
— Бу ягдай хакыкат болсадамы? — дийип сорады.
Пыгамберимиз хем:
— Эгер ол хакыкат болса гыбатдыр, хакыкат болмаса төхметдир — дийди».
* * *
Амр ибн Шугайп какасындан, ол хем атасындан роваят эдйәр: «Бир адамы Ресулалланың янында агзап:
— Ол бермесең иймез, мүндүрилмесе мүнмез — дийдилер.
Пыгамберимиз:
— Сиз онуң бар болан зады билен гыбатыны этдиңиз — дийди».
* * *
Абдылла ибн Месгут шейле диййәр: «Гыбат сениң доганың онда бар болан задыны айтмагыңдыр. Онда болмадык зат билен оны ятласаң, ине, ол төхметдир».
* * *
Хасан Басры шейле диййәр: «Ресулалла шейле дийди: «Ким бир мусулманың гыбат билен этини ийсе[9], Аллатагала оңа отдан бир лукма берер. Ким мусулман доганына төхмет лыбасыны гейдирсе, Аллатагала хем оңа отдан бир лыбас гейдирер. Ким бир мусулманың айбыны ачса, Аллатагала хем оңа шол айбы берер. Ким бир мусулмана рыягәрлик[10] этсе, Аллатагала хем оңа эдил шонуң ялы херекет эдер».
* * *
Абу Хурейра шейле диййәр: «Ресулалла шейле дийди: «Ким хасса болан мусулман доганының хал-ягдайыны сораса, Аллатагала хем: «Өрән говы этдиң! Саг-аман гит! Җеннетде өзүңе бир ер тайярладың» диер».
* * *
Сагт Тайы шейле диййәр: «Бир адам Алла ёлундакы доганыны говы гөрүп, онуң билен душушмага хөвес билдирип, онуң билен душушмакдан хош болуп, хал-ягдайыны сораса хөкман бир перишде онуң ызындан шейле диер: «Өрән говы этдиң! Җеннет саңа несип этди!».
* * *
Абу Хурейра шейле диййәр: «Бир адам башга бир юртдакы доганының янына зыярата чыкды. Аллатагала онуң ёлунда бир перишдәни гөзегчи эдип гойды. Ол адам яңкы перишдәниң дуран ерине геленде, перишде оңа:
— Нирә гитмек ислейәрсиң? — дийип сорады.
Онда ол адам:
— Бу шәхердәки бир дин доганыма зыярат этмек ислейәрин — дийди.
Перишде:
— Ондан бир зада гарашярмың? — дийип сорады.
Онда ол адам:
— Ёк, диңе мен оны Эзиз ве Җелил Алла үчин сөйдүм — дийди.
Онда перишде:
— Мен Алланың саңа иберен илчиси, сен нәдип оны Алланың ёлунда сөййән болсаң, Алла хем сени сөйди — дийди».
* * *
Абу Хурейра пыгамберимизиң: «Аллатагала кыямат гүнүнде айдар: «Мениң бейиклигим үчин бири-бирлерини сөенлер ниреде? Өз көлегәмден башга көлегәниң болмадык бу гүнүнде, олары өз көлегәмде отурдарын!» дийип айдандыгыны роваят этди».
* * *
Абу Салым Җейшаны өйүнде вагты Абу Умейяның янына гелди. Ол: «Мен Абу Зерден Ресулалланың: «Сизиң бириңиз достуны сөйсе, онуң өйүне гелсин ве оны Алла үчин сөййәндигини айтсын» диендигини эшитдим». Шонуң үчин хем мен мунуң үчин сениң өйүңе гелдим» дийди.
[1] Магпырат – багышлама, гүнә гечме, язык гечме.
[2] Мухаҗыр — Мекгели мусулман.
[3] Басра метҗидинде.
[4] Гурханың 68-нҗи («Галам») сүресиниң 4-нҗи аяты.
[5] Мазлум – зулум эдилен.
[6] Насраны – христиан, исайы.
[7] Сандал – ашагы агачдан, үсти гайышдан эдилен еңилҗек чепек, оны тәрет кыланларында гейипдирлер.
[8] Текбир гетирмек – Аллаху экбер диймек.
[9] Ысламда гыбат этмек доганың этини иймек билен дең хасапланяр.
[10] Рыягәрлик — гөз үчин этмеклик.