ХАТАЛАРДАН ВЕ ГҮНӘЛЕРДЕН ДАШ ДУРМАК ХАКДА
Абдылла ибн Омар шейле диййәр: «Адам оглы Эзиз ве Җелил Алланың рехмет этмегинден башга, көп хата эдиҗи хөкмүнде ярадыландыр».
* * *
Асым шейле диййәр: «Шакык ибн Селемәниң сеҗде вагты шейле диендигини эшитдим: «Реббим, мени багышла! Реббим, мени багышла! Эгер багышласаң бу сениң мерхеметиңдир. Эгер маңа азап берсең, маңа зулум этдигиң болмаз».
Соң ол агламага башлады. Хатда метҗидиң дашындан хем хынчгылавугыны эшидйәрдим».
* * *
Макбуры Иса пыгамбериң шейле диендигини айдяр: «Эй, Адам оглы! Бир ягшылык этсең, оны хич кимиң янында айтма. Эгер оны айдып йөрсең, согабы азалар».
Макбуры соң: «Хакыкатдан хем биз, бир иши говы берҗай эдениң сылагыны бидерек этмерис»[1] аяты окап, «Бир эрбетлик эдениңде, оны гөз өңүңден айырма» дийди.
* * *
Сагт ибн Ыбрайым шейле диййәр: «Талк ибн Хабып шейле дийди: «Элбетде, Алланың хакы гулуң оны ерине етирмегинден хас улудыр. Элбетде, Алланың ныгматы билинмекден ве хасапланмакдан хас улудыр. Йөне сиз тоба эдип сәхере ве тоба эдип, агшама етиң!».
* * *
Мугалла ибн Зыят шейле диййәр: «Мугыра ибн Мухадиш бир гезек Хасан Басрыдан:
— Эй, Абу Сагыт! Биз бизе хадыс гүррүң берип, калпларымызы шатландырҗак кишилер билен гатнашалымы? — дийип сорады.
Онда ол:
— Эй, шых! Сен хакыкы рахатлыга етмек үчин вагыз-несихат эдйән кишилер билен гатнашмагың, сен үчин ховплы затлара сезевар болянчаң, бипервай гезениңден говудыр — дийди».
* * *
Ибн Мүбәрек шейле диййәр: «Маңа Ресулалланың шейле диендиги гелип етди: «Мөмин ики горкының арасындадыр:
1. Өзүне гечмишдәки эден гүнәси үчин нәме җеза берилҗекдигини билмейәндигиниң горкусы;
2. Галан өмрүнде хайсы беланың өзүне гелҗекдигини билмезлигиң горкусы».
* * *
Суфян Сөври бир адамдан роваят эдйәр: «Мүслим ибн Есар бир сеҗде этди, ики диши бирден дүшди. Абу Ыяс онуң янына гелип, теселли берип, оны көшешдирди. Мүслим Аллатагаланың белент сарпасыны айдып, шейле дийди: «Ким бир зады ислесе, оны гөзләр. Ким бир затдан горкса, ондан гачар. Мейил эден зады себәпли өзүне бела геленсоң, ол меселеден даш дурмадык адамың, бу акмаклыгына дүшүнип билемок. Шейле хем өзүне гелен бела себәпли горкса-да, оны терк этмейән кишиниң Алладан горкмайшына дүшүнип билемок».
* * *
Мәлик ибн Мигвелиң айтмагына гөрә, Омар ибн Хаттап шейле диййәр: «Хасап соралмаздан өңүрти өзүңизи хасаба чекиң. Себәби бу сизиң хасап гүнүңизде еңиллиги үпҗүн эдер. Гүнәлериңизден хасап соралмаздан өңүрти, өз небислериңизден хасап сораң. Улы душушык гүни[2] үчин азык тайярлаң. «Ол гүн (Алланың) хузурына гелерсиңиз. Хич бир гизлин (задыңыз) галмаз»[3].
* * *
Хасан Басры шейле диййәр: «Мөмин өз-өзүне буйруп билйән кишидир. Ол Эзиз ве Җелил Аллатагала үчин өз небси үчин өзүнден хасап сорар. Кыямат гүни дүнйәде өз небислеринден өзлери хасап соранларың хасабы еңил болар. Кыямат гүни, диңе дүнйәде небсини хасаба чекмейәнлериң хасабы агырдыр.
Мөмин гөвнүне яраян бир зат билен йүзбе-йүз болан махалы: «Мениң йүрегим сени ислейәр. Сен мениң мәтәч затларымдан бирисиң. Йөне мен сени ислемейәрин. Чекил, чекил, сениң билен мениң арама бир пәсгелчилик гоюлды» диер. Ол ялңыш бир зада баш гошса, деррев эркини эле алып: «Мен муны ислемедим. Мунуң маңа хич деркары ёк. Эншалла, инди муңа хич гайдып гелҗек дәл» диер.
Хакыкатдан хем, мөминлер Гурханың дашына җемленен ымматдыр. Гурхан олары хеләк этҗек затлардан халас эдер. Хакыкатдан хем, мөмин дүнйәде боюн багындан сыпмак үчин тагалла эдйән есир мысалыдыр. Ол Алла говушянча хич затдан рахат болмаз. Гулагындакы, гөзүндәки, дилиндәки, элиндәки ве агзаларындакы затларда хасабың бардыгыны, буларың хеммесинде гүнәкәр хасапланып билҗекдигини билер».
* * *
Ата ибн Есар шейле диййәр: «Бир адам соңкы деминде ятырка, онуң гөзүне Иблис гөрүнйәр ве оңа:
— Менден халас болдуң — дийди.
Онда ол адам:
— Хенизем сенден халас боландыгыма ынанмаярын — дийди.
* * *
Бекр ибн Абдылла Музени шейле диййәр: «Сизден довзаха бармаҗак хич ким ёкдур»[4] диен аят иненсоң, Абдылла ибн Раваха өйүне гелип, аглады. Аялы гелди, ол хем аглады. Хызматкәри гелди, ол хем аглады. Машгаланың хеммеси гелип агламага башлады. Аглашып болансоңлар, Абдылла олардан:
— Эй, машгала халкы, сиз нәме үчин аглаярсыңыз? — дийип сорады.
Олар:
— Билмейәрис, йөне сениң аглаяныңы гөрүп агладык — дийдилер.
Онда Абдылла:
— Ресулалла Эзиз ве Җелил Реббимизиң довзаха гирҗекдигимизи хабар берйән, йөне соң ондан чыкҗакдыгымызы хабар бермейән аяты инди. Ине, мени агладан зат шу — дийди».
* * *
Кайс ибн Абу Хазым болса бу барада шейле диййәр: «Ибн Раваха аглады, аялы хем аглады. Абдылла ондан:
— Нәме үчин аглаярсың? — дийип сорады.
Аялы:
— Сениң аглаяндыгыңы гөрүп агладым — дийди.
Абдылла ибн Раваха оңа:
— Довзаха гирҗекдигими эшитдим, йөне ондан чыкарҗакдыгымы я-да онда галҗакдыгымы билмейәрин? — дийди».
* * *
Хасан Басры шейле диййәр: «Бир адам гүлүп дуран достундан:
— Достум, саңа довзаха гирҗекдигиң хабары гелдими? — дийип сорады.
Ол хем:
— Хава — дийип җогап берди.
Ол адам ондан:
— Ондан чыкҗакдыгың барада хабар гелдими? — дийди.
Досты:
— Ёк — дийип җогап берди.
Онда ол:
— Онда нәме үчин гүлйәрсиң? — дийип сорады.
Мундан соң, ол адамың өлйәнчә гүлендигини хич ким гөрмеди».
* * *
Абу Ысхак шейле диййәр: «Абу Мейсере дүшегине гирип:
— Кәшге эҗем мени догурмасады — дийди.
Онда аялы оңа:
— Эй, Абу Мейсере! Алла саңа ыхсан эдип, сени ыслама салды, нәме нәшүкүр болярсың? — дийди.
Онда ол:
— Догры, йөне Алла бизе довзаха гирҗекдигимизи хабар берип, ондан чыкҗакдыгымызы айтмады — дийди».
* * *
Вехп ибн Мунеббех шейле диййәр: «Шулар Давут алайхыссаламың машгаласының хикметлериндендир: «Акыллы болан киши дөрт пурсатдан гапыл болмалы дәлдир:
1. Эзиз ве Җелил Ребби билен геплешмели пурсаты;
2. Өз небсини хасаба чекмели пурсаты;
3. Өз кемчиликлерини айдян, өз небсине гаршы онуң тарапында болан мусулман доганлары билен биле отурмалы пурсаты;
4. Өзи үчин халал ве догры болан бир ишде, небси билен леззетлериниң арасында галмалы пурсаты.
Буларың соңкусы бейлеки пурсатларда көмекчи ве калплара арам бериҗидир. Акыллы кишиниң өз дөврүниң адамларыны танамагы, дилини сакламагы ве амалыны ерине етирмеги борҗудыр. Шейле хем акыллы кишә шу үч себәпден башга бир себәп болмаса гөчмезлик, еринден гымылдамазлык хем борчдур:
1. Ахыретиниң гамыны ийип, оңа азык тайярламак;
2. Гүн-гүзераныны дүзетмек;
3. Харам болмадык затдан леззет алмак».
* * *
Салых ибн Мисмар шейле диййәр: «Пыгамбер алайхыссалам Харыс ибн Мәликден:
— Эй, Харыс, нәхили халдасың? — дийип сорады.
Онда ол:
— Мөминдирин, эй, Алланың илчиси — дийип җогап берди.
Пыгамберимиз ондан:
— Хакыкатдан мөминми? — дийип сорады.
Онда ол:
— Хакыкатдан мөмин — дийди.
Пыгамберимиз:
— Хер задың бир хакыкаты бардыр. Мунуң хакыкаты нәме? — дийип сорады.
Харыс Ибн Мәлик:
— Небсим дүнйәден узаклашды. Мен гиҗелери укусыз, гүндизлери агыз бекләп, сувсуз гечирдим. Гөйә, Эзиз ве Җелил Реббимиң аршына середйәрин. Гөйә, мен җеннетдәкилере, олар ол ерде гезип йөренлере середйәрин. Гөйә, довзахыларың увлайышларыны эшидйәрин — дийди.
Онда пыгамберимиз:
— Ине, Алланың калбыны нурландыран мөмини — дийди.
* * *
Абу Җапар роваят эдйәр: «Пыгамбер алайхыссалам: «Алла кимиң гурсагыны (йүрегини) ыслама ачса, ол Реббинден бир нура эе болмазмы? Калплары Алланы ятламакда гатылашанлара хайп болсун! Ине, олар, әшгәр ёлдан чыканлардыр»[5] аятыны окап: «Нур гурсага инсе, калп ачылар ве гиңелер» дийди.
Ондан:
— Муны билер ялы бир аламаты бармы? — дийип сорадылар.
Онда пыгамберимиз:
— Хава, алдав өйүнден узаклашмак, эбеди өе йөнелмек, аҗалдан өңүрти өлүме тайярланмак — дийди».
* * *
Урва ибн Зүбейр какасындан роваят эдйәр: «Абу Бекр Сыддык хутбада мусулманлара йүзленип: «Эй, мусулман җемагаты! Алладан хая эдиң. Җаным гудрат элинде болан Алладан ант ичйәрин, мен хич ким болмадык ерде хаҗата гиденимде хем Эзиз ве Җелил Алладан хая эдип, геймиме бүренйәрин» дийди».
* * *
Хасан Басры шейле диййәр: «Пыгамбер алайхыссалам бир гезек:
— Сиз җеннете гирмек ислейәрмисиңиз? — дийип сорады.
Онда оңа:
— Хава, эй, Алланың илчиси — дийип җогап бердилер.
Онда пыгамберимиз:
— Онда дүнйә ишлерини гысың. Аҗалларыңызы ядыңыздан чыкармаң. Алладан долы маныда хая эдиң — дийди.
Олар:
— Эй, Алланың илчиси! Хеммәмиз Алладан хая эдйәрис — дийдилер.
Онда пыгамберимиз:
— Алладан хая этмек бу гөрнүшде дәлдир. Алладан хая этмек мазарлары ве онда чүйремеги унутмазлыгыңыздыр, гарныңы ве онуң ичиндәкилери, келләңи ве онуң ичиндәкилери унутмазлыгыңыздыр. Ким ахыретиң дереҗелерини ислейән болса, дүнйәниң зынатыны терк эдер. Ине, шол махал гул долы маныда Алладан хая эдер. Ине, шол махал, Эзиз ве Җелил Алланың достлугына етер — дийди».
* * *
Вехп ибн Мунеббех шейле диййәр: «Мукаддес китапларың биринде гөрдүм. Аллатагала шейле диййәр: «Хакыкатдан хем, гулум маңа табын болса, менден дилег этмесе хем, оңа дилегини берерин. Менден ислемесе хем, оңа берерин. Хакыкатдан-да, гулум маңа табын болса, асман ве ер яшайҗылары онуң гаршысына чыкса хем, оңа халас болҗак ер тайярларын. Эгер гулум маңа табын болмаса, элбетде онуң эллерини асман гапысындан кесерин.[6] Оны бош бир ерде, ялңыз гойярын. Ярадан хич бир задым оны халас эдип билмез».
* * *
Абу Зер шейле диййәр: «Ягшылык этмек билен билеликде дилег этмек хем нахара етҗек дуз ялы болса етерликдир».
* * *
Ибн Мүбәрек шейле диййәр: «Алы ибн Салых Аллатагаланың: «Эгер маңа шүкүр этсеңиз, элбетде, сизе сылагы артдырарын»[7] аятыны: «Эгер сиз шүкүр этсеңиз, маңа болан табынлыгыңыз себәпли, сылагыңызы артдырарын» дийип дүшүндирди».
* * *
Укбе ибн Мүслим шейле диййәр: «Бир адам эгер Аллатагала гаршы чыкса я-да Аллатагала гаршы болан гүнәлери этсе, Аллатагала хем муңа гарамаздан, оңа онуң гөвүн ислән ве арзувлан задыны берсе, билип гойсун, ол Алла тарапындан юваш-ювашдан бела сезевар эдилмеги үчин ныгмат берилйәндир».
* * *
Вехп ибн Мунеббех шейле диййәр: «Амалы болмаздан дилег эдйән киши киришсиз яйдан ок атян мергене меңзәр».
* * *
Ибн Абу Нуҗейх какасының шейле диендигини роваят эдйәр: «Мөмин Аллатагала гаршы чыкмаса, соң хем өзи үчин дагы еринден сүйшүрмеги Эзиз ве Җелил Алланың адындан касам этсе, элбетде, Алла оны еринден сүйшүрер».
[1] Гурханың 18-нҗи («Кехф») сүресиниң 30-нҗы аяты.
[2] Ягны кыямат гүни.
[3] Гурханың 69-нҗы («Хакка») сүресиниң 18-нҗи аяты.
[4] Гурханың 19-нҗы («Меръем») сүресиниң 71-нҗи аяты.
[5] Гурханың 39-нҗы («Зумер») сүресиниң 22-нҗи аяты.
[6] Онуң хаҗатларын кабул этмерин.
[7] Гурханың 14-нҗи («Ыбрайым») сүресиниң 7-нҗи аяты.