БӘШИНҖИ БӨЛҮМ КАНАГАТЛЫЛЫК ХАКДА
* * *
Ибн Апбас шейле диййәр: «Элбетде, ынсанлара шейле бир дөвүр гелер, ол дөвүрде яшаянларың бар аладасы гарны, дини хем небсиниң арзувлары болар. Ол хай-хөвесине гөйә дини ялы гарашлы болар».
* * *
Ресулалланың сахабаларындан Абдылла ибн Харыс ибн Җезиз Зебидиниң янына ики саны адам гелди. Ол олара: «Икиңиз хем хош гелдиңиз» дийип, яссанып отуран яссыгыны берди. Олар хем:
— Биз мунуң үчин гелмедик. Биз пейдаланар ялы бир затлар диңлемек үчин гелдик — дийдилер.
Ол хем:
— Мыхманына хөдүр-керем этмейән не Мухаммет алайхыссаламың, не-де Ыбрайым алайхыссаламың ымматындандыр. Атының уянындан тутуп, Алланың ёлунда гиҗәни гечирен, аз-овлак зат ве совук сув билен агзыны ачан адам, гөр, нәхили багтлы! «Шуны гой, муны айыр, эй, чага!» дийип чагаларына буйрук берип, өкүз ялы ийип, бу ныгматларың ичинде Аллатагаланы яда салмаянлара хайплар болсун!» — дийди».
* * *
Абуд-Дерда шейле диййәр: «Бириңизиң хемме вагт өз машгаласына мыхман болмагы нәхили эрбет зат! Хабардар болуң, тапаныңызы ийиң!»[2].
* * *
Энес ибн Мәлик шейле диййәр: «Он йыллап пыгамбер алайхыссалама хызмат этдим. Хич ким хер нәче ислесе хем пыгамберимиз ялы болуп билмез. Ол маңа екеҗе гезек хем «уф» я-да «муны нәме үчин этдиң?» диймеди».
* * *
Харун ибн Ыбрайым шейле диййәр: «Хасан Басрының: «Агзыңы бекле, йөне оразаңда чәкден гечме!» диендигини эшитдим. Ондан:
— Оразада чәкден ашмак нәме боляр? — дийип соралды.
Ол:
— «Мениң үчин шу затлары саклаң, оны эртир агыз бекләнимде ийҗек» диймегидир — дийди».
* * *
Сабыт шейле диййәр: «Бир гезек хезрети Омар сув ичмек иследи. Оңа бир булгур бал гарылан шербет гетирилди. Ол шербети элине алып: «Мен муны ичерин, тагамы деррев гидер, йөне хасабы галар!» дийди. Муны үч гезек айтды. Соң оны ичмән, ол ердәкилериң бирине хөдүрледи. Ол хем ичди».
* * *
Абу Рабыг шейле диййәр: «Мен Абу Хурейраның бир зибилхана середип: «Шу сизиң дүнйәңизиң хем, ахыретиңизиң хем гидйән еридир» диендигини эшитдим».
* * *
Хасан Басры шейле диййәр: «Ресулалла бир гезек ызлы-ызына үч саны хадыс айтды. Ол Медине ёлларындан барярка бир зибилхананы гөрүп: «Ким дүнйә хемметараплайын серетмек ислесе, шу зибилхана серетсин» дийди. Соң: «Эгер дүнйәниң Алланың янында бир сиңегиң ганаты ялы әхмиетли болсады, капыра ондан хич зат бермезди» дийди. Соң өлүми, онуң хасратыны, кынчылыгыны ве адамы эҗизледйәндигини агзап: «Өлүм — урлан үч йүз гылыч зарбасы ялыдыр» дийди».
* * *
Ата Хорасаны шейле диййәр: «Пыгамберлериң бири бир кенардан гечип барярка, бир адамың балык тутуп отурандыгыны гөрди. Ол адам «Алланың ады билен» дийип торуны зыңды. Йөне тора екеҗе балык хем дүшмеди. Соң башга бир балыкча душ гелди. Ол: «Шейтаның ады билен» дийип торуны ташлады велин, торы балыкдан долды. Ол адам муңа хонданбәрси болды. Онда яңкы пыгамбер: «Эй, Реббим! Сенден дилег эдениң ве Саңа хич зады шәрик гошмаяның торуна хич зат дүшүрмезлик билен сынаг этдиң. Эмма Сенден өзгеден дилег эдени хем сынаг этдиң. Онуң торуна гурсагыны какып, гомпарҗак дереҗеде балык дүшүртдиң. Мунуң хеммесиниң хем Сениң элиңдедигиңи билйәрин. Йөне себәби нәме?» дийип сорады. Хактагала онуң бу сорагына: «Гулума ол ики балыкчының хем барҗак ерлерини гөркезиң!» дийип буйрук берди. Ол серетсе, Алла оларың биринҗисиниң ериниң назы-ныгматдан, бейлекиниң хем биабрайчылыкдан тайярландыгыны гөрүп: «Разы болдум, эй, Реббим!» дийди».
* * *
Энес ибн Мәлик шейле диййәр: «Кыямат гүнүнде дүнйәде иң көп ныгмат ичинде болан капыр гетирилер. Аллатагала: «Оны довзаха бир гезек салып чыкарың» диер. Оны довзаха сокуп чыкарарлар. Соң ол капырдан:
— Сен хей, ныгмат гөрдүңми? — дийип сорар.
Ол:
— Ёк — дийип җогап берер.
Соң иң көп кынчылык чекен мөмини гетирилер. Аллатагала: «Оны җеннете бир гезек салың» диер.
Соң ондан:
— Сен хей кынчылык гөрүпмидиң я-да саңа хайсыдыр бир бела гелдими? — дийип сорар.
Ол хем:
— Ёк — дийип җогап берер».
Гараз, ахыретде паны дүнйәдәки ныгматларың ве чекилен кынчылыкларың хеммеси унудылар.
* * *
Абу Хурейра шейле диййәр: «Сиз харамзада берлен ныгмат себәпли оңа хөвес этмәң. Себәби онуң ызында бир ызарлайҗы хусыт бардыр. Довзах онуң ызындадыр. «Биз ол довзах одуның хер песелишинде, онуң одуны галдырарыс»[3].
* * *
Вехп ибн Мунеббех шейле диййәр: «Мен Алланың индерен китапларының ичинде гөрүпдим. Аллатагала шейле диййәр: «Ган дөкйән эли узын кишә хөвес этмегин! Чүнки, онуң үчин Алланың янында өлмейән бир ганхор довзах бар. Халал болмадык ёлдан мал-мүлк йыгнаны хем сөймегин! Себәби ондан онуң хайыр-сахаватына берекет берилмез. Халал болмадык затдан берлен садаканы Аллатагала кабул этмез. Оны ода тарап алып гидйән бир азык эдип гояндыр. Хич бир ныгмат эесине, ныгматы себәпли мейил этмегин, онуң өлүминден соң, онуң нирә гитҗекдигини билмерсиң».
* * *
Касым ибн Мухаммет шейле диййәр: «Ресулалла шейле дийди: «Ким халал болмадык ерден бир зат эдинсе, соң оны бир доган-гарындашына пешгеш этсе я-да оңа садака берсе, я-да оны Алланың ёлунда харчласа, буларың хеммеси йыгналып, соң онуң билен билеликде довзаха ташланар».
* * *
Яхя ибн Җабыр шейле диййәр: «Абуд-Дерда шейле дийди: «Хабардар бол! Өзүне зепер етирсе-де, небсине ниҗеме ныгматлар берен бардыр. Хабардар бол! Динини хапалатса-да, ниҗеме эшигини арассалаян бардыр».
* * *
Ибн Мүбәрек хабар берйәр: «Меръем оглы Иса алайхыссаламдан бизе гелип етмегине гөрә, ол шейле дийипдир: «Беланың сабырлыны болелинлиге чыкарҗак вагты хем-де болелинлигиң гүнәкәри бела етирҗек вагты өрән якындыр».
* * *
Сагт ибн Месгут Теҗиби шейле диййәр: «Бир кишиниң дүнйәлик иши көпелип, ахырет иши азалян болса, өзи хем өз халындан разы болса, ине, ол адам өзүни танамаян ойнатгыдыр».
* * *
Вухейп шейле диййәр: «Меръем оглы Иса пыгамбер шейле дийди: «Дөрт саны айратынлык бир адамда җемленсе, бу ягдай бейлекилериң я-да өзүниң гөвнүне ярар:
1. Дыммак, ол ыбадатың башлангыҗыдыр;
2. Алла үчин песпәл болмак;
3. Дүнйәде аз зат билен чәкленмек;
4. Аз зада эе болмак.
* * *
Муҗахыт шейле диййәр: «Омар ибн Хаттап шейле дийди: «Биз яшайшымызың иң хайырлысыны сабыр дийип тапдык».
* * *
Урва шейле диййәр: «Омар ибн Хаттап бир хутбасында шейле дийди: «Тамакинчилик гарыплыкдыр, адамлардан бир зада хантама болмазлык хем байлыкдыр. Себәби адамларың элиндәки затдан умыдыны кесен киши олара мәтәч болмаз».
* * *
Абу Хазым шейле диййәр: «Мениң пикириме гөрә әхли затлар ики хилидир: бири мениңки, бири мениңки дәл. Мениңки болана елиң гуйругында болса хем, элбетде, етип аларын. Мениңки болмадык зат болса, әхли ярадылан затлар оны маңа бермек үчин йыгнанышса хем, муңа гүйчлери етмез. Эгер бейле болса бу меселеде нәме үчин гайгы-гама батмалы?».
* * *
Абдылла ибн Месгут шейле диййәр: «Кимиң хазынасыны асманда сакламага гүйҗи етсе, сакласын[4]. Себәби, ол ер шейле бир ер велин, оны не гүе иер, не-де оңа огрының эли етер. Элбетде, хер кимиң калбы хазынасының янындадыр».
* * *
Абдылла ибн Убейт шейле диййәр: «Энсарыдан бир адам Ресулалланың янына гелип:
— Эй, Алланың илчиси! Маңа нәме боляр, өлүми сөймейәрин? — дийди.
Ресулалла оңа:
— Мал-мүлкүң бармы? — дийди.
Ол адам:
— Хава, эй, Ресулалла! — дийди.
Пыгамберимиз оңа:
— Мал-мүлкиңи өз өңүңе гечир! — дийди.
Ол адам:
— Муңа гүйҗүм етмез, эй, Ресулалла! — дийди.
Пыгамберимиз хем оңа:
— Киши малы билен биледир. Оны өзүнден өңүрти иберсе, оңа говушмак исләр. Ызында гойса, онуң билен биле ызда галмак исләр — дийди».
* * *
Билал ибн Сагт шейле диййәр: «Абуд-Дерда:
— Калбың бөлүнмегинден Алла сыгынярын — дийди.
Ондан:
— Калбың бөлүнмеги нәме? — дийип сорадылар.
Ол хем:
— Мениң үчин хемме ерде задың болмагыдыр — дийди».
* * *
Энес ибн Мәлик шейле диййәр: «Ресулалла шейле дийди: «Үч зат мерхумың ызындан гидер. Икиси ыза гайдар, бири болса онуң билен галар. Онуң машгаласы, эмләги, амалы ызы билен йөрәр. Машгаласы билен эмләги ызына гайдар, диңе амалы галар».
* * *
Хабып ибн Абу Сабыт шейле диййәр: «Абуд-Дерда хараба өврүлен бир ере баранда: «Эй, оба! Ханы, яшайҗыларың ниреде?» дийип сорарды. Соң хем: «Гитдилер, диңе амаллары галды» дийип, өзи җогап берерди».
* * *
Муҗахыт шейле диййәр: «Абдылла ибн Омар билен бир харабачылыгың үстүнден бардым. Ол маңа: «Эй, Муҗахыт! Эй, харабачылык, яшайҗыларың ниреде?» дийип сеслен дийди. Мен онуң айдышы ялы сесленемсоң, Ибн Омар маңа: «Гитдилер, инди диңе амаллары галды» дийди».
* * *
Мәлик ибн Мигвел шейле диййәр: «Эшидишиме гөрә, Меръем оглы Иса пыгамбер бир гезек бир харабачылыгың үстүнден барып:
— Эй, вейран болан харабачылык! Яшайҗыларың ниреде? — дийип сорапдыр.
Ол ерден бир сес чыкып:
— Эй, Алланың рухы![5] Олар харап болдулар. Сен гайрат эт! — дийип, җогап берипдир».
[1] Шөхвет - җынсы ислег.
[2] Бу ерде өз өйлериңизде гиҗе-гүндиз ийип-ичип, машгалаңыза кынчылык дөретмәң диймек исленилйәр.
[3] Гурханың 17-нҗи («Исра») сүресиниң 97-нҗи аяты.
[4] Ягны «садака бериң» диен маныда.
[5] Алланың рухы — Иса пыгамбериң лакамы.