ПЕСПӘЛЛИК ВЕ КИЧИГӨВҮНЛИЛИК ХАКДА
Вукейр ибн Эшеҗ гүррүң берйәр: «Абдылла ибн Салам өз экининден аркасы бир йүк одунлы чыкды. Адамлар оны гөрүп:
— Эй, Абу Юсуп! Перзентлериң ве хызматкәрлериң арасында муны саңа дерек ерине етирҗек бар ахыры — дийдилер.
Ол хем:
— Мен «Ханы гөрейин, бу агыр дегйәрми?» дийип, калбымы сынаг этмек иследим — дийди».
* * *
Асым шейле диййәр: «Абу Убейда ибн Җеррах бир гезек намазда-да җемагата ымам болды. Ол намазлыкдан дүшенсоң: «Яңы шейтан мениң ызымдакылардан артыкмачлыгымың бардыгыны йүрегиме салянча, мени терк этмеди. Мундан соң хич хачан ымам болҗак дәл» дийди».
* * *
Хайва ибн Шурейх шейле диййәр: «Езит ибн Абу Хабып Аллатагаланың: «Йөрейшиңде орта ёлы сайла!»[1] аяты хакда: «Ягны чалтлыкда орта ёлы тут» дийди».
* * *
Абдылла ибн Мүбәрек шейле диййәр: «Мениң эшидишиме гөрә, Ибн Омар чалт йөрәп гөркезип: «Бу йөрейиш текепбирликден узак ве ише етишмекде чалтдыр» диерди».
* * *
Абул-Хеким Сейяр шейле диййәр: «Ресулалла не чалт, не-де юваш болан базар йөрейши билен йөрәрди».
* * *
Абу Хурейра шейле диййәр: «Мен Ресулалладан хас гөрмегей кишини гөрмедим. Гөйә онуң йүзүнде гүн парлаян ялыды. Йөрейшинде хем пыгамберден хас аграс кишини гөрмедим. Гөйә ер йүзи онуң үчин дүйрүлйән ялыды. Биз онуң ызындан етмек үчин тагалла эдйәрдик. Ол болса өзүне хич аграм салмазды. Оңа Алланың салаваты ве саламы болсун!».
* * *
Вехп ибн Мунеббех шейле диййәр: «Бир адам Ресулалладан:
— Эй, Алланың илчиси! Амалларың согаплысы хайсы? — дийип сорады.
Пыгамберимиз:
— Дини саклаян ве гораян намаздыр. Амалларың чүр депеси Алла ёлунда газават этмекдир. Мусулманың ахлагының иң согаплысы адамлар сенден саламатда болянчалар дыммакдыр — дийди».
* * *
Абу Сагыт Худрының янына бир адам гелип:
— Эй, Абу Сагыт! Маңа маслахат бер! — дийди.
Абу Сагыт оңа:
— Сенден озал мен сениң ислән бу задыңы, ягны несихаты Ресулалладан хайыш эдипдим. Ресулалла маңа шейле дийди: «Саңа Алладан горкмагы маслахат берйәрин. Себәби Алладан горкмак әхли задың башыдыр. Саңа җыхат[2] этмеги маслахат берйәрин. Себәби җыхат ысламың рухбанлыгыдыр.[3] Саңа Алланы ятламагы ве Гурхан окамагы маслахат берйәрин. Себәби ол сениң асмандакыларың янында ятланылмагыңа себәпдир. Саңа зерур болан ерде гүрлемекден башга ерде дыммагы маслахат берйәрин. Себәби сен онуң билен шейтаны еңерсиң — дийди».
* * *
Ибн Абу Җурейх шейле диййәр: «Тавусы эллерини хормат билен говшурып, какамдан бир хадыс хакда сораярка гөрдүм. Какам оңа:
— Эй, Абу Абдырахман! Лукман хеким: «Дыммак хикметдир, йөне дымян аз» дийипдир — дийди.
Онда Тавус:
— Эй, Абу Нуҗейх! Алладан горкуп гүрлемек, Алладан горкуп дыммакдан хайырлыдыр — дийди».
* * *
Шуфей ибн Матыг Эсбахы шейле дийди: «Ким көп геплесе, ялңышы хем көпелер».
* * *
Хассан ибн Атыйе шейле диййәр: «Мениң эшидишиме гөрә, Шетдат ибн Эвс бир өе баранда:
— Супраны гетириң, онуң билен гүйменели! — дийипдир.
Онуң бу айдан сөзи хич киме ярамады. Онда ол:
— Ыслама гиренимден бәри, яңкы сөзүмден башга танаплап даңмадык хич бир сөзүм ёкдур. Муны хем мениң гаршыма уланмаң! — дийипдир.
* * *
Даххак шейле диййәр: «Аллатагаланың «Хакыкатдан хем намаз ынсаны эрбет ве пис затлардан горар. Алланы ятламак — иң бейик затдыр»[4] аяты хакда Ибн Месгут пыгамберимизиң шейле диендигини айтды: «Алла табын болмадык кишиниң намазы кабул болмаз. Эрбет ве пис затлардан даш дуран киши намаз окан ялыдыр».
* * *
Сагт ибн Месгут шейле диййәр: «Бир гезек Осман ибн Мазгул пыгамбер алайхыссаламың янына гелип:
— Эй, Алланың илчиси! Агта болмак үчин бизе ругсат бармы? — дийип сорады.
Онда Ресулалла:
— Агта болан я-да агта болмак ислейән бизден дәлдир. Ымматым үчин агта болмагың дерегине «агыз беклеме» бардыр — дийди.[5]
Онда Осман:
— Эй, Алланың илчиси! Бизе дин үчин сыяхата ругсат бер — дийди.
Ресулалла:
— Ымматымың сыяхаты Алла ёлундакы җыхатдыр — дийди.
Ол ене:
— Эй, Алланың илчиси! Бизе рухбанлык үчин ругсат бер — дийди.
Ресулалла:
— Ымматымың рухбанлыгы намаза гарашып, метҗитлерде отурмакдыр — дийди».
* * *
Авн ибн Абдылла шейле диййәр: «Бир адам оглуна шейле маслахат берди: «Эй, оглум! Саңа Алладан горкмагы маслахат берйәрин. Эгер бу гүнүң дүйнки гүнүңден хайырлы болмагына ве эртирки гүнүң хем бу гүнүңден хайырлы болмагыны башарян болсаң, ерине етир! Намаз окаяркаң, гөйә иң соңкы намазыны окаян кишиниң намазы ялы болуп ока! Зерур затларыңы өзеленмек билен тапмакдан саклан! Себәби ол гарыплыга элтер. Өтүнч соралҗак ишлерден саклан»!
* * *
Авн ибн Абдылла шейле диййәр: «Абуд-Дерда Шам метҗидиниң мердуванларының үстүнде дуруп, шейле хутба айтды: «Эй, Шам халкы! Сиз чын йүрекден маслахат берйән доганыңызы диңлеҗәк дәлмисиңиз? Хакыкатдан хем сизден озалкылар көп йыгнаярдылар, өрән берк бина гурдурярдылар ве етип болмаҗак зады арзув эдйәрдилер. Оларың йыгнанлары хеләк болды, гуранлары мазар болды. Амаллары бидерек болды».
* * *
Салым ибн Абу Җагт шейле диййәр: «Меръем оглы Иса пыгамбер шейле дийди: «Алла үчин ишләң! Гарыпларыңыз үчин ишләң! Сәхер билен гидип, агшам гелйән шу гушлара середиң! Олар не экйәрлер, не-де орярлар. Алла олара рысгал берйәр. Эгер бизиң гарнымыз бу гушларыңкыдан улы дийсеңиз, шу ябаны сыгырлара ве эшеклере середиң. Олар хем эртир-агшам гезип йөрлер, не экйәрлер, не-де орярлар. Алла олара хем рысгал берйәр. Дүнйәде өзүңизе герегинден артык затдан сакланың! Чүнки, дүнйәниң артык зады соң сиз үчин Алланың янында азап болар».
* * *
Семура ибн Җүндүп шейле диййәр: «Алланың янында гадырыны билмек ислейән киши өз янындакы Алла үчин айрып гоян затларына серетсин! Өз янында шейтаның ерини ве тәсирини билмек ислейән киши гизлин ишлериниң янында шейтан бармы-ёкмы билмәге сынанышсын!».
* * *
Хузейфа ибн Еман шейле диййәр: «Хак агырдыр ве кындыр. Кындыгына гарамаздан, соңы аңсат ве говудыр. Батыл еңил ве аңсатдыр. Йөне нетиҗеси агыр ве даш-төвереге эрбетлигини яйрадыҗыдыр. Кичи гүнәлери терк этмек тоба этмекден аңсат ве хайырлыдыр. Сәхел вагтлык кейп бардыр, ол узак махал довам этҗек гайгыны мирас гояр».
* * *
Хасан Басры шейле диййәр: «Ресулалла айтды: «Бир адамы даш-төверегиндәки адамларың көплүгиниң гөвнүне ярамагы оны алдава салмасын».
* * *
Хасан Басры шейле диййәр: «Эй, Адам оглы! Аягыңы топрага үнс билен бас! Хакыкатдан хем, көп вагт гечмезден ол сениң габрың болар, хакыкатдан хем, сен дүнйә инениңден бәри хер гүн өмрүңи азалдянсың».
* * *
Кайс ибн Бишр Таглабы шейле диййәр: «Какам Шамда Абуд-Дерда билен достды. Шамда Ресулалланың сахабаларындан энсарлы Ибн Ханзелие атлы бир сахаба барды. Ол намаздан башга вагт адамлар билен аз отурышып, ялңызлыгы сөерди. Намаздан чыкансоң, тә өйүне гелйәнчә тесбих,[6] техлил[7] ве текбир [8] айдарды.
Бир гүн Абуд-Дерданың янында отуран вагтымыз, ол янымыздан гечди ве бизе салам берди. Абуд-Дерда оңа:
— Бизе пейда берҗек ве өзүңе зыян бермеҗек сөзи айт — дийди.
Онда ол:
— Ресулалла шейле дийди: «Хакыкатдан хем, сиз доганларыңызың өңүне гечип, олары йөредерсиңиз. Шонуң үчин хем эшиклериңизи арасса саклаң! Атларыңызы говы саклаң! Адамларың арасында тегмил кимин гөзе чала гөрүнйән ялы болуң. Хакыкатдан хем, Алла эрбет сөзи ве сөгүнмеги сөймез — дийди».
* * *
Хасан Басры шейле диййәр: «Сизден кимиң машгаласына, мәхелле халкына ве башгалара ымам болмага гүйҗи етсе, ымам болсун. Себәби сиз нәме этсеңиз, онуң дерегине сизиң үчин бир зат берлер».
[1] Гурханың 31-нҗи («Лукман») сүресиниң 9-нҗы аяты.
[2] Җыхат – 1. Алла ёлунда гайрат-тагалла этмек. 2. Газават этмек.
[3] Рухбан – теркидүнйә, ыбадатхон.
[4] Гурханың 29-нҗы («Анкебут») сүресиниң 45-нҗи аяты.
[5] Хадысда агыз беклемегиң җынсы ислеги азалдяндыгы айдыляр.
[6] Тесбих - «Субханалла (Алла пәкдир)» диймек.
[7] Техлил - «Элхамдулиллә (Алла хамд болсун)» диймек.
[8] Текбир - «Аллаху экбер (Алла өрән бейикдир)» диймек.