ДӨРДҮНҖИ БӨЛҮМ ДҮНЪЕ МАЛЫНА КОВАЛАШМАЗЛЫК ХАКДА
* * *
Ибн Месгут бир гезек:
— Сиз бу гүн Ресулалланың сахабаларындан хем көп гайрат-тагалла эдип, көп намаз окаярсыңыз. Эмма олар сизден хайырлыдылар — дийди.
Ондан:
— Нәме үчин? — дийип сорадылар.
Онда ол:
— Себәби олар сизден хас канагатлы болуп, ахырете көп хөвес эдердилер — дийди.
* * *
Мисвер ибн Махреме шейле диййәр: «Ресулалла билен Бедр сөвешине[3] гатнашан ве Амыр ибн Бени Луэйиң досты болан Амр ибн Авф шейле хабар берди: «Пыгамбер алайхыссалам Абу Убейда ибн Җеррахы серкерде эдип, бир ере иберди. Соң ол Бахрейнден мал-мүлк билен гайдып гелди. Энсарылар[4] Абу Убейданың гелендигини эшитдилер. Намаз вагты болансоң, энсарылар Ресулалла билен эртир намазына дурдулар. Пыгамберимиз намаз окансоң, олара тарап өврүлди. Абу Убейда билен йүзбе-йүз отурды. Энсарылара середип, йылгырып:
— Ялңышмаян болсам, сиз Абу Убейданың бир затлар гетирендигини эшиденсиңиз — дийди.
Олар:
— Хава, эй, Алланың илчиси! — дийдилер.
Ресулалла:
— Сизе шатландырыҗы затлары хабар берейин. Сиз өзүңизе шатлык гетирҗек зада гарашың. Шатланың, умыдыгәр болуң. Алланың адындан ант ичйәрин, мениң сиз үчин горкян задым гарыплык дәл. Йөне сизден өңкүлере гиңишлик берлиши ялы, сизе хем дүнйәниң гиңелдилмегинден, оларың бири-бирлери билен бәслешишлери ялы сизиң хем бәслешмегиңизден, шу себәпли дүнйәниң олары хеләк эдиши ялы, сизи хем хеләк этмегинден горкярын — дийди».
* * *
Урва билен Сагыт ибн Мусейеп шейле диййәрлер: «Хеким ибн Хызам шейле дийди: «Мен Ресулалладан бир зат хайыш этдим, ол хайыш эдип соран задымы маңа берди. Соң ене хайыш этдим, ене берди. Соң үчүнҗи гезек хайыш этдим, ене берди. Соң маңа:
— Эй, Хеким! Бу мал-мүлк гөк өнүм ялы тагамлыдыр. Ким оны небсине буйрмак билен алҗак болса, оңа берекетли болар. Небсини өңе тутмак билен алҗак болса, онда оңа берекет берилмез. Бу ийип доймадык ялы болар. Ёкардакы берйән эл, ашакдакыдан хайырлыдыр — дийди.
Онда Хеким оңа:
— Эй, Алланың илчиси! Сени хак билен иберен Алладан ант ичйәрин. Индиден бейләк тә дүнйәден гайдянчам хич кимден хич зат ислемерин — дийди.
Соң хезрети Абу Бекриң халыпалык дөврүнде олҗадан пайыны алмагы үчин Хекими чагырса-да, ол ондан хич зат алмады. Соң хезрети Омар хем олҗадан пайыны алмагы үчин оны чагыранда, ол зат алмакдан гача дурды. Онда хезрети Омар: «Эй, мусулманлар! Сизи Хекиме шаят тутунярын. Мен шу олҗадан онуң пайыны берйәрин. Ол хем хакыны алмакдан боюн товлаяр» дийди.
Хакыкатдан хем, Хеким Ресулалладан соң, хич кимден хич зат алмады».
* * *
Укба ибн Амыр шейле диййәр: «Ресулалла арадан секиз йыл геченсоң, Ухут сөвешиниң[5] шехитлери үчин гөйә дирилериң мерхумлар билен хошлашышы ялы җыназа намазыны окады. Соң мүнбере чыкып: «Мен сизиң өңүңизден гидйәрин ве сизе шаят боларын. Душушҗак еримиз көвсер ховзудыр[6]. Мен шу махал шу дуран еримден оңа середип дурун. Мен сизиң Алла шәрик гошмагыңыздан горкмаярын. Мен сизиң дүнъе малыны газанҗак болуп бири-бириңиз билен бәслешмегиңизден горкярын» дийди.
Равы Укба айдяр: «Бу мениң Ресулалла соңкы гезек бакышым болды».
* * *
Ибн Месгут шейле диййәр: «Пыгамбер алайхыссалам айтды: «Яшаян ериңизден башга ерде экин ерини эдинмәң, ёгсам дүнйә хөвес билдирерсиңиз. Мединеде болана Мединедәки, Разанда болана Разандакы ер етерлик». Разан Мединәниң голайында бир ердир.
* * *
Амыр ибн Бени Луэйден ве Ресулалланың сахабаларындан болан Абдылла ибн Сагды шейле диййәр: «Бир гезек дүйшүмде бир дага чыкдым. Онуң үстүндекәм гөзъетимиң өңүни тутан улы атлы топар пейда болды. Олар маңа голайлашанларында арадакы җүлге олара безенип, дүнйәниң әхли гөзелликлерини ве гүллерини гөркезди. Олардан екеҗе атлы хем олара гөвүн бөлмеди. Олар ол ерден геченсоңлар, җүлге өңки ягдайына өврүлди. Җүлге Алланың ислейши ялы өңки ягдайында галды.
Соң өңүмден олара меңзеш башга бир топар чыкды. Олар биринҗи топарың гелен ерине етенлеринде, җүлге олара дүнйәниң әхли гөзелликлерини гөркезди. Оларың ичинден улагларындан дүшмән бу гөзелликлерден алан-да, алмадык-да барды. Олар ол ерден геченсоңлар, җүлге ене өңки ягдайына өврүлди. Җүлге Алланың ислейши ялы ол ягдайда галды.
Соң үчүнҗи топар пейда болды. Олар ики топарың гелен ерине барансоңлар, җүлге дүнйәниң әхли ныгматларыны, гөзелликлерини олара гөркезди. Олардан иң өңдәки барян улагыны чөкерди. Екеҗе атлы хем ондан гечмеди. Ол җүлге дүнйәди. Нетиҗеде, олар дүнйә алданып, дүшдүлер. Ковмумдан ант ичйәрин, олар алдандылар ве оларың улаглары хем гачып гидипди».
* * *
Хасан Басры шейле диййәр: «Пыгамбер алайхыссалам айтды: «Мениң, сизиң ве дүнйәниң мысалы, тозап ятан бир чөле дүшен ве ондан нәче йөрәндигини, ене-де мензилиң көп я аз галандыгыны билмейән, атлары ядап эҗизләп, азыклары гутарып, чөлүң ортасында йыкылып галан, өзлериниң хеләк болҗакдыкларына гөзлери етен бир топарың мысалына меңзейәр. Ине, олар шейле халдакалар, өңүнден сачларындан сув дамып дуран, тәзе эшикли бир адам чыкар. Олар хем:
— Бу адам обаның голайдадыгының хабарчысы болса герек — диерлер.
Соң ол адам буларың янына гелер. Олардан:
— Сизиң бу халыңыз нәме? — дийип сорар.
Олар хем:
— Гөршүң ялы бизиң атларымыз тапдан дүшди, азыгымыз гутарды, чөлүң ортасында галдык. Ондан нәчерәк гечендигимизи билмейәрис — диерлер.
Онда ол:
— Эгер сизи сүйҗи ве ганып-ганып ичҗек сувуңыза, гөк өвүсйән бакҗалара элтсем, маңа нәме берерсиңиз? — дийип сорар.
Олар:
— Сен нәме дийсең биз разы — диерлер.
Ол адам хем:
— Маңа гаршы чыкмаҗакдыгыңыз барада әхт ве сөз берйәрсиңизми? — дийип сорар.
Олар хем оңа гаршы чыкмаҗакдыклары барада сөз берерлер. Ол хем олары ызына өврүп, гөк өвүсйән баг-бакҗалара ве хезил эдип ичер ялы сүйҗи сувлы чешмелере гетирер. Ол ерде бираз дурансоң:
— Бу ерден хем хас отлы бир бакҗа, шу сувуңуздан хем сүйҗи сува элтейин — диер.
Онда оларың көпүси:
— Бизиң муңа гүйҗүмиз етмез, биз шуңа зордан етдик, бу бизе етер — диерлер.
Онда олардан бир топар:
— Сиз оңа гаршы чыкмаҗакдыгыңыз барада әхт ве сөз бермәнмидиңиз? Ол сизе илкинҗи сөзүнде догрусыны айдыпды. Соңкы сөзи хем башкысы ялыдыр — диер.
Соң ол адам йөрәр, топар хем онуң ызы билен йөрәрлер. Ол адам олары гөк өвүсйән бакҗалара ве сүйҗи сувлы чешмә алып гидер. Галанларың үстүне болса, гараңкы дүшенсоң, душман гелер ве олары гыран-җыран эдип есир алар».
[1] Кескер — Ыракда бир шәхер.
[2] Нихавенд — Эйранда ерлешйән бир шәхер ады.
[3] Бедр сөвеши - 623-нҗи йылда мусулманлар билен бутпаразларың арасында болуп гечен сөвеш.
[4] Энсары – мединели мусулманлар.
[5] Ухут сөвеши - 624-нҗи йылда мусулманлар билен мүшриклериң арасында болуп гечен сөвеш.
[6] Көвсер ховзы – җеннетде мусулманлара берилҗек ховуз.