АЗ АМАЛ, КАЛП САПЛЫГЫ ВЕ ЯГШЫ НИЕТ ХАКДА
Харыс ибн Езит шейле диййәр: «Өңлер шейле диердилер: «Ким бир мөмин аялың чагасына бир зат берип, оны шатландырса, Алла хем хөкман оны кыямат гүни шатландырар».
* * *
Абу Мәлик Эшгары шейле диййәр: «Ресулалла бир гезек намазыны окап болансоң, йүзүни сахабалара өвүрип:
— Эй, ынсанлар! Диңләң ве ядыңызда саклаң. Аллатагаланың шейле гуллары бардыр, олар пыгамбер ве шехит болмасалар хем, Алла билен биледиклери ве оңа якындыклары үчин, пыгамберлериң ве шехитлериң олара гөзлери гидер — дийди.
Муны эшиден бир бедеви[1] еринден туруп, бармагыны чоммалдып:
— Эй, Алланың пыгамбери! Пыгамбер ве шехит болмасалар хем, пыгамберлериң ве шехитлериң оңа Алла билен биледиклери ве оңа якындыклары себәпли гөзи гидйән ол адамлары барада бизе гүррүң бер, беян эт ве сыпатландыр! — дийди.
Бедевиниң бу сорагындан соң, пыгамберимизиң йүзи ягтылып гитди ве ол:
— Олар сизе нәбелли гарып кишилердир. Оларың арасыны доган-гарындашлык баглары бирлешдирмейәр. Олар өз араларында Алла үчин чынлакай достлук гуран кишилердир. Аллатагала кыямат гүни олар үчин нурдан мүнбер гояр ве олар онуң үстүнде отурарлар. Оларың йүзлерини ве лыбасларыны нурлы эдер. Кыямат гүнүнде хеммелер горкар, эмма олар горкмаз. Олар Алланың көңүллерине хич хили горкы салмадык ве гайгы-гамсыз достларыдыр — дийди».
* * *
Мугаз ибн Җебел пыгамбер алайхыссаламдан шу хадысы эшидендигини роваят эдйәр: «Алланың бейиклиги себәпли бири-бирлерини сөенлер Алланың көлегесинден башга бир көлегәниң болмадык гүнүнде, Аллатагаланың аршының[2] көлегесиндедир».
* * *
Шурахбил ибн Самт янына Амр ибн Абсе Сулемини чагырып, ондан:
— Эй, Ибн Абсе! Сен хут Ресулалланың өзүнден эшиден, оңа хич зат гошмадык, сенден башга хич кимиң эшитмедик бир хадысыны билйәрмиң? — дийип сорады.
Ол хем:
— Хава, мен Ресулалланың бир кудсы хадысда[3] шейле диендигини эшитдим: «Аллатагала айтды: «Мениң сөйгим, бири-бирлерини мен үчин сөенлере болды. Мениң сөйгим бири-бирлериниң халларыны мениң үчин соранлара болды. Мениң мухаббетим мен себәпли бири-бирлерине көмек эденлере болды. Мениң сөйгим диңе мениң үчин бири-бирлерини җандан сөен я-да бири-бирлери билен аладалананлара болды. Мениң сөйгим ене-де бири-бирлерине гысганман мениң үчин беренлере болды».
* * *
Абу Зер бир гезек пыгамберимизден: «Эй, Алланың илчиси! Бир адам Алла үчин иш эдйәр. Ынсанлар хем оны сөййәр, ол барада нәме айдып билерсиңиз?» дийип сорады. Пыгамберимиз: «Бу мөминиң ахыретден өңүрти ныгматыдыр» дийди.
* * *
Энес ибн Мәлик шейле диййәр: «Чөлде яшаян бир адамың гелип, Ресулалладан сораг сорамагы бизиң гөвнүмизе яраярды. Бир гүн бир чарва гелип, пыгамберимизден:
— Эй, Алланың илчиси! Кыямат хачан гопар? — дийип сорады.
Шол махал намаз үчин камат айдылды.[4] Пыгамберимиз еринден туруп, намаз окады. Намаз гутарансоң:
— Яңкы сорагы берен ниреде? — дийип сорады.
Ол чарва:
— Мен, эй, Алланың илчиси! — дийди.
Пыгамберимиз ондан:
— Сен кыямат үчин нәме тайярладың? — дийип сорады.
Ол хем:
— Кыямат үчин намаз ве ораза тайярламадым. Мен диңе Алланы ве онуң ресулыны сөййәрин — дийди.
Онда пыгамбер алайхыссалам:
— Киши өз сөени билен биле болар — дийди».
Энес мунуң үстүне: «Мусулманларың ысламы кабул эденлеринден соң бу хабара бегенишлери ялы, башга зада бегенендиклерини гөрмәндим» дийип гошды.
* * *
Абу Хурейра шейле диййәр: «Ресулалла шейле дийди: «Бири-бирлерини сөен ики мусулманың арасыны диңе оларың бириниң эден гүнәси ачар».
* * *
Хезрети Әше:
— Эй, Алланың илчиси! Ики гоңшым бар, оларың хайсына совгат берейин? — дийип сорады.
Онда Пыгамберимиз:
— Гапысы саңа иң якын болана бер — дийди.
* * *
Абу Селеме ибн Абдырахман бир гезек:
— Хиҗрети[5] терк этмек улы гүнәлердендир — дийди.
Онда Омар ибн Абдылэзиз билен Абдылла ибн Амр ибн Осман:
— Биз муны эшитмәндик — дийдилер. Абу Селеме дымды. Отуранларың бири туруп барярка, ондан:
— Нәме үчин дымярсың? — дийип сорады.
Ол хем:
— Алы ибн Абу Талып: «Мухаҗырың[6] ызына гөчмеги улы гүнәлердендир» дийип айтды — дийди».
* * *
Нугман ибн Бешир шейле дийди: «Эй, ынсанлар! Бири-бирлериңизе мерхемет эдиң. Себәби мен Ресулалланың шейле диендигини өз гулакларым билен эшидипдим: «Әхли мусулманлар бир беден ялыдыр. Онуң агзаларының бири ыза чексе, бедениниң бейлеки агзалары хем онуң ызасына гошулар».
* * *
Талха ибн Убейдылла ибн Курейз шейле диййәр: «Алла үчин бири-бирлерини сөен ики кишиден достуны Аллатагала үчин сөен хас сөйгүлидир. Кишиниң досты ёк махалы эден дилеги рет эдилмейән дилеглердендир. Ол досты үчин бир хайыр ислесе, везипели бир перишде хөкман: «Саңа хем онуң ялысы болсун!» дийип, дога-дилег эдер».
* * *
Абу Бекре шейле диййәр: «Ресулалла шейле дийди: «Хөкүмдара гаршы чыкмак ве гарындашлык гатнашыгыны үзмек гүнәдир. Оңа ахыретде берилҗек җезасындан башга, хич бир гүнә ол гүнә ялы бу дүнйәде җезасы деррев берилмәге лайык ве мынасып дәлдир».
* * *
Зухры шейле диййәр: «Бизе Ресулалланың шейле диендиги гелип етди: «Хиле этме! Хилегәре көмек хем этме! Себәби Аллатагала: «Эрбет хиле — эесине гайдып гелер»[7] диййәр. Азгынчылык этме! Азгынчылык эдйәне хем көмек этме. Себәби Аллатагала: «Сизиң азгынчылыгыңыз диңе өз гаршыңызадыр»[8] диййәр. Әхдиңден дәнме! Әхдинден дәнене хем көмек этме! Себәби Аллатагала: «Ким әхдинден дәнсе, ол диңе өз гаршысына әхдинден дәнендир»[9] диййәр».
* * *
Абу Хурейра шейле диййәр: «Ресулалла шейле дийди: «Бир мусулманың башга бир мусулман доганындан үч гүнден көп өйкеләп гезмеги халал дәлдир. Ярашмак үчин ким өңүрти гелсе, шол җеннете өңүрти гирер».
* * *
Энес ибн Мәлик Ресулалла айтды диймезинден өзи шейле дийди: «Мусулманларың арасында үч гүн я-да үч гүнден көп өйкеләп, бири-бириңден дашлашмак ёкдур».
* * *
Абул-Алыя шейле диййәр: «Бири-бирлеринден өйке-кине эденлер хакда бирнәче хадыс эшитдим. Оларың хеммеси хем агырдыр. Эшиденлеримиң иң еңили: «Бири-бирлеринден өйкеләп гезенлер хак ёлундан узаклашанлардыр» диен хадысдыр».
* * *
Абу Хурейра шейле диййәр: «Ресулалла айтды: «Бир гул мусулманларың ёлунда ятан бир тикени айрандыгы үчин җеннете гирди».
* * *
Абу Хурейра шейле диййәр: «Ресулалла айтды: «Сизиң хер бириңиз мусулман доганыңыз үчин айнадырсыңыз. Онда халамаян задыны гөрсе, оны дүзелтсин».
* * *
Абу Муса Эшгары Хасан сыркав ятырка, ондан хабар алмага гелди. Ол отырка Хезрети Алы ичери гирип, ондан:
— Гөрме-гөрүше гелдиңми я-да сорамага гелдиңми? — дийип сорады.
Абу Муса оңа:
— Гөрме-гөрше гелдим — дийип җогап берди.
Хезрети Алы:
— Бир мусулман башга бир мусулманы сыркавлыгы себәпли сорамага гелсе, оны етмиш мүң перишде уградар ве җеннет бакҗаларындакы мивелере говшурар — дийди.
* * *
Сөвбан шейле дийди: «Бир адам сыркав мусулман доганының халыны сораса, ол ерден гайдянча җеннет мивелериниң ичиндедир».
[1] Бедеви – чарва арап.
[2] Арш – асманың иң ёкаркы гаты.
[3] Кудсы хадыс – Гурхандан болман, пыгамбериң дили билен Алланың айдан сөзлери. Кудсы хадыслар көпленч «Аллатагала айтды» дийип башлаяр.
[4] Камат айтмак – намазың башландыгыны билдирйән камат сөзлерини айтмак, ягны азаны чалт-чалтдан айтмак.
[5] Хиҗрет — гөчмек, гөч этмек, ысламың яшалян юрдуна гөчмек.
[6] Мухаҗыр – хиҗрет эден, гөчен.
[7] Гурханың 35-нҗи («Фатыр») сүресиниң 42-нҗи аяты.
[8] Гурханың 10-нҗы («Юнус») сүресиниң 23-нҗи аяты.
[9] Гурханың 48-нҗи («Фатх») сүресиниң 10-нҗы аяты.