ҮЧҮНҖИ БӨЛҮМ САДЫК[1] ДОСТ-ЯРЛАР БИЛЕН ОТУРЫШМАК ХАКДА
Муҗахыт шейле диййәр: «Ибн Апбас шейле дийди: «Алла үчин сөй, Алла үчин өйкеле! Алла ёлунда душманчылык эт, Алла ёлунда достлук гур! Чүнки, сен диңе мунуң билен Алланың достлугына етип билерсиң. Бир адамың намазы ве оразасы көп болса хем, ёкарда айдыланлары ерине етирмесе, иманың леззетини тапып билмез. Ёгсам, бу гүн кәбир ынсанларың доганлыгы, достлугы дүнйә ичре мешхур боландыр велин, бу доганлык онуң эесине кыямат гүни хич хили согап бермез».
* * *
Суфян Сөври шейле диййәр: «Энсардан[2] бир адам шейле дийди: «Мен ынсанлара такваларының дереҗесине гөрә баха берйәрин. Билип гой, Гурхан окаян диңе Алладан горкян болса кәмиллешер. Алла табын болмакда өзүңи кем тутма, текепбирсиреме! Гүнәкәрлиги агыр иш хасапла. Дири кишилере диңе мерхумларың гөзи гитҗек затда, ягны ягшы ишлерде гөзүң гитсин!».
* * *
Мәлик ибн Мигвел шейле диййәр: «Меръем оглы Иса пыгамберден бизе гелип етмегине гөрә, ол шәгиртлерине: «Эй, хаварылар[3]! Гүнәкәрлери язгармак билен Аллатагала сөйгүңизи әшгәр эдип, ол сөйгини өзүңизе чекиң! Өзүңизи гүнәкәрлерден узаклашдырыҗы зат билен Алла якынлашың. Олара гахарланмак билен Алланың разычылыгыны гөзләң!» – дийди.
Хаварылар:
— Эй, Алланың рухы! Кимлер билен гатнашык саклалы? — дийип сорадылар.
Ол хем:
— Олары гөрмегиңиз сизе Алланы ятладян, гүррүңи ылмыңызы артдырян ве ахырет меселесинде амалы хөвесиңизи артдырян кишилер билен гатнашың — дийди».
* * *
Ибн Хайевие шейле диййәр: «Гыфарылардан[4] бири бу дүнйә барада, шейле диерди: «Эзиз ве Җелил болан Алланы ятламак билен, өзүңиздәки дүнйәни ятламагы, дүнйә хакда пикир этмеги деп эдиң».
* * *
Авн ибн Абдылла шейле диййәр: «Гапыл боланларың арасында Алланы ятлаян, сөвешден гачанларың аркасында сөвешйән ялыдыр».
* * *
Абу Муса шейле диййәр: «Вепалы дост ялңызлыкдан, ялңызлык хем эрбет достдан говудыр. Вепалы дост мүшк ялыдыр. Саңа бермесе хем, саңа онуң якымлы ысы сиңер. Эрбет дост болса, демирчи усса ялыдыр. Оды сени якмаса хем эрбет ысы саңа сиңер. Бир ягдайдан башга бир ягдая үйтгәп дурандыгы үчин калба «калп»[5] дийлендир. Калп бир гушуң елегине меңзәр. Ел оны чөлде бир агаҗа япышдырандыр. Оны тозадып, эйләк-бейләк урар».
* * *
Ибн Мулейке шейле диййәр: «Лукман хеким шейле дилег эдер экен: «Эй, Аллам! Сени гөзлейәркәм маңа көмек этмейән, Сени унудан махалым маңа Сени ятлатмаян, эмр эденимде маңа табын болмаян, дыман махалым мени гайга батырян гапыл кишилери маңа дост эйлеме!».
* * *
Убейт ибн Умейр шейле диййәр: «Давут пыгамбер шейле дилег эдер экен: «Эй, Аллам! Маңа эрбет машгала душ этме, ёгсам яман адам боларын».
* * *
Абдылла ибн Амр шейле диййәр: «Өңлер бир адам досты билен душушанда гөйә сүйтдеш доганы билен душушан ялы болярды. Эмма бу гүн бир адам бир таншы билен душушан махалы, гөйә бир душманы билен душушян ялы».
* * *
Ибн Апбас: «Ныгмат инкәр эдилер, доган-гарындашлык баглары гопарылар. Алла болса йүреклери бирлешдириҗидир. Калплар бири-бирине якынлашанларында олары хич зат хич хачан узаклашдырып билмез» дийип, шу аяты окады: «Земинде болан әхли зады харчласадың, оларың йүреклерини бирлешдирип билмездиң. Йөне Алла олары бирлешдирди»[6].
* * *
Абул-Ахвас шейле диййәр: «Абдылла ибн Апбас шейле дийди: «Булар, ягны Алланың йүреклерини бирлешдиренлер, Эзиз ве Җелил Алла ёлунда бири-бирлерини сөен кишилердир».
* * *
Абу Сагыт Худры Мухаммет пыгамбериң шейле диендигини эшидипдир: «Диңе мөмин билен достлаш! Дузуңы диңе Алланың эмрине уйян таква ийсин».
* * *
Ибн Авн шейле диййәр: «Шугайп, ягны Ибн Хапхап икимиз бир себәп билен Ыбрайымдан өтүнч сорадык. Шонда ол шуны ятлатды: «Бир адам башга бирине шейле дийипдир: «Мен сени өтүнч сорамаздан багышлаярын. Себәби өтүнҗе ялан сөз хем гошулар».
* * *
Җубейр бизе Даххакдан шейле роваят эдйәр: «Пыгамбер алайхыссалам шейле дийди: «Дузуңа Алланы сөени мыхманы чагыр!».
[1] Садык – вепалы.
[2] Энсар – Мединели мусулманлар.
[3] Хаварылар – апостоллар, шәгиртлер.
[4] Гыфарылар – арап тайпаларының бири.
[5] Калп диймеклик арап дилинде «өврүлип дуран», «үйтгәп дуран» диен манылары аңладяр.
[6] Гурханың 8-нҗи («Энфал») сүресиниң 63-нҗи аяты.