ЫНСАНЛАРЫ ЯРАШДЫРМАК ХАКДА
Сагыт ибн Мусейеп шейле диййәр: «Ресулалла бир гезек:
— Сизе окалан бирнәче намаздан ве берлен садакадан хас хайырлы зады хабар берейинми? — дийип сорады.
Сахабалар:
— Хава, эй, Алланың илчиси! — дийдилер.
Пыгамберимиз хем:
– Ынсанларың арасының дүзедилмегидир оларың ярашдырылмагыдыр. Өйке-кинеден дашда дуруң! Себәби өйке-кине ягшы амаллары ёк эдиҗидир — дийди.
* * *
Абу Идрис Хавланы шейле диййәр: «Мен Абуд-Дерданың ант ичип, шейле диендигини эшидипдим: «Алладан ант ичйәрин. Адам оглы намаз үчин йөремек, ягшы ахлаклы болмак ве ынсанлары ярашдырмакдан, арасыны сазламакдан хас хайырлы иш эден дәлдир».
Мен онуң өң ант иченини хич эшитмәндим.
* * *
Амыр ибн Сагт ибн Абу Вакгас шейле диййәр: «Ресулалла улы бир дашы гезекли-гезегине дөвйән бир топары гөрди ве олара: «Сиз гүйҗи бу агыр дашы гөтермек дийип дүшүнйәрсиңиз? Гүйч диңе сизиң бириңизиң калбыңызың өйке-кине билен долуп, соң оны еңмегиңиздир» дийди».
* * *
Абдылла ибн Месгут шейле диййәр: «Эгер бир ити масгарабазың ерине гойсадым, ит масгарабаз болмакдан утанарды! Кимдир бириниң дүнйә ве ахырет иши билен мешгулланман, бикәр зат билен мешгулланмагыны халамаярын».
* * *
Хезрети Әше шейле диййәр: «Мен Ресулалланың янында бириниң агзына өйкүндим. Ол маңа: «Мен бир кишә өйкүнмеги халамаярын. Сениң шу эден ишиң шейле-шейле эрбет ишлери этмегиңден хем эрбетдир» дийди».
* * *
Абу Җапар хабар берйәр: «Ресулалла көп агыз беклейән, гиҗе намазыны окап, узак вагтлап аяк үстүнде дурян, гүндиз намазларыны хем сыпдырмаян, догры сөзли, йөне өрән хусыт бир аял хакда гүррүң берилди. Онда Пыгамберимиз: «Онуң ялы болса, онда нәме хайыр бар?» дийди».
* * *
Абу Җапар шейле диййәр: «Ресулалла айтды: «Амалларың иң агыры, нәхили ягдайда болсаң хем Алланы ятламак, өз җаныны пида эдип, ынсанлара ынсап билен гарашык этмек, дост-догана мал-мүлкде дең гарамакдыр».
* * *
Абу Җапар шейле диййәр: «Ресулалла айтды: «Ким дили билен ынсанларың задына ве намысына дегмесе, Аллатагала хем оны кыямат гүни горар, мертебесини галдырар. Кимде-ким ынсанлара өйке-кине этмегини ташласа, олардан гахар-газабыны айырса, Аллатагала кыямат гүни оны довзах азабындан горар»
* * *
Абу Җапар шейле диййәр: «Бир адам хезрети Хүсейниң янына гелип, бир иш меселесинде ондан көмек иследи. Йөне ол ыгтыкафда[1] отырды. Хезрети Хүсейин: «Ыгтыкафым болмасады, сениң билен биле гидип, ишиңи ерине етирердим» дийди.
Яңкы адам онуң янындан чыкып, хезрети Хасаның янына гелди. Дердини оңа айтды. Ол хем онуң ишини битирмек үчин чыкды. Онда ол адам:
— Өз ишим үчин сизи азара гойдум. Мен өңүрти Хүсейиниң янына бардым. Ол: «Эгер ыгтыкафым болмасады, сениң билен биле гидердим» дийип айтды — дийди.
Онда хезрети Хасан:
— Алла үчин бир доганымың ишини ерине етирмек мениң үчин бир ай ыгтыкафда отурмакдан хас пейдалыдыр — дийди».
* * *
Хасан Басры бир адамың юмшуны битирмеги үчин Сабыт Беннанының янына гелди. Сабыт оңа:
— Мен ыгтыкафда отырын — дийди.
Онда Хасан Басры оңа:
— Бир мусулман доганымың юмшуны битирмегим бир йыл ыгтыкафдан хас пейдалыдыр — дийди.
* * *
Убейдылла ибн Велит Вассафы шейле диййәр: «Ресулалла айтды: «Бир доганымың гарныны доюрмагым бир гарыба бир дирхем бермегимден говудыр. Алла ёлы үчин доганыма бир дирхем бермегим, бир мисгине он дирхем бермегимден говудыр. Алла хакы үчин бир доганыма он дирхем бермегим, мениң үчин бир гарыба йүз дирхем садака берилмегинден хайырлыдыр».
* * *
Абу Умама шейле диййәр: «Омар ибн Хаттап тәзе эшик гейди. Хениз долы геймәнкә, шу доганы окады: «Беденими өртйән ве дурмушымы онуң билен безейән лыбасымы гейдирен Алла хамду-сеналар болсун!». Соң хем: «Муны нәме үчин айтдым, билйәрсиңизми? Ресулалланың тәзе эшиклерини гейип дураныны гөрдүм. Ол хениз доны яйҗык сүңклерине етирмәнкә, мениң айданларымы айтды. Соң хем шейле дийди: «Җаным гудрат элинде боландан ант ичйәрин, тәзе бир эшик геен, соң хем мениң яңкы догамы айдып, өңки эшигини мәтәч гарып бир мусулмана Алланың разычылыгы үчин гейдирен, ол адам яшадыгыча ве өленден соң (бу сөзлери үч гезек гайталады) ол эшикден бир бөлек ол гарыбың эгнинде дурдугыча, ол берен адам Аллатагаланың багышламагында, кепиллигинде ве Алланың якынында болар».
* * *
Ибн Мугаффел шейле диййәр: «Ресулалла шейле дийди: «Кимиң ики көйнеги бар болса, оларың бирини башга бирине гейдирсин я-да бирине пешгеш берсин».
* * *
Абу Мигшер шейле диййәр: «Нехайы Гурхан алымларының язгармадык эшигини геерди».
* * *
Амр ибн Езит ибн Месрук шейле диййәр: «Абдылла ибн Динардан:
— Хезрети Омарың оглы Абдылланың нахары нәхилиди? — дийип сорадым.
Ол хем:
— Ол бизе хер гезек дограма ийдирерди. Доймадык вагтымыз башга бир нахар гетирерди — дийди.
Соң:
— Хезрети Омарың оглы Абдылланың эшиги нәхилиди? — дийип сорадым.
Ол хем:
— Бахасы йигрими дирхем болан ики бөлек матадан ыбарат эшик геерди. Шейле хем бахасы он дирхем болан йөнекей матадан дикилен ики бөлекден ыбарат эшик геерди — дийди».
* * *
Хезрети Омарың оглы Абдылланың янына оглы гелип:
— Көйнегимиң этеги йыртылды — дийди.
Онда Абдылла:
— Оны сөк-де, тәзеден яма. Алланың берен рысгалыны гара гарнына сарп эденлерден болма! — дийди.
* * *
Урва ибн Зүбейр шейле дийди: «Хезрети Әше етмиш мүң дирхем садака берди. Эмма онда-да онуң көйнеги ямалгыды».
* * *
Шетдат ибн Хадрың гулы Абу Абдылла айдяр: «Осман ибн Аффаны Анна гүни мүнберде гөрдүм. Үстүнде бахасы дөрт-бәш дирхемлик йөнекей Аден[2] өңлүги ве чала докалан, боялан Куфе шалы барды. Өзи хем хоррак, узын сакгаллы ве гүлер йүзли кишиди».
* * *
Зейт ибн Вехп Җухени шейле диййәр: «Хезрети Алы бир гүн ики парча матадан эшикли өңүмизден чыкды. Бир парчасы билен бедениниң ашакы тарапы япылып, бейлекисини хем бедениниң үстки тарапына шал ялы эдип гойберипди. Бир тарапыны галдырды, гөрсек өңлүги ямалы экен. Ол ерден гечип барян бир чарва арап:
— Эй, бенде! Шу эшиклерден гейин, чүнки сен өлерсиң я-да өлдүрилерсиң! — дийди.
Онда хезрети Алы :
— Мен бу ики парчаны текепбирликден дашдыгы, намазда гиңдиги ве мөминлере сүннетдиги[3] үчин геййәрин — дийип җогап берди».
* * *
Абдылла ибн Убейт айдяр: «Ахнеф ибн Кайс ики саны Басра көйнегиниң бирини он алты дирхеме, бейлекисини он ики дирхеме сатын алды. Он алты дирхеме аланыны ёлда гейди. Мединә баранларында оны чыкарып, он ики дирхеме аланыны гейип, хезрети Омарың янына барды.
Хезрети Омар онуң көйнегине середип, элләп гөрүп:
— Эй, Ахнеф! Бу көйнегиңи нәчә алдың? — дийип сорады.
Онда ол:
— Он ики дирхеме алдым — дийип җогап берди.
Хезрети Омар:
— Саңа хайплар болсун! Алты дирхеме алан болсадың, артыгыны билйән ериңе, ягны садака берсең болмазмыды? — дийди».
[1] Ыгтыкаф – ораза айының соңкы он гүнүнде метҗитден чыкман отурмак .
[2] Аден – Емениң пайтагты.
[3] Сүннет – пыгамбериң ёлы.