БИРИНҖИ БӨЛҮМ ЫБАДАТ ЭТМЕК ХАКЫНДА
Хасан Басры шейле диййәр: «Пыгамбер алайхыссалам: «Аллатагала хасса болмасалар хем ынсанларың хассадыр диен кишилерине мерхемет этсин» дийди. Ол бу сөзүни: «Ыбадат этмек олары ядадандыр, шонуң үчинем ынсанлар олары хассадыр өйтдүлер» дийип дүшүндирди».
* * *
Катада шейле диййәр: «Өңлер: «Мынапык[1] гиҗе укусыны пида этмез, ягны гиҗе ыбадат этмез» диердилер».
* * *
Месрук шейле диййәр: «Маңа мекгели бир адам: «Мен бир гиҗе сениң достуң Темим Дарының Аллатагаланың китабындан: «Эрбет ишлери эдйән адамлар өзлериниң дурмушларының ве өлүмлериниң иман эден ве ягшы ишлери эдйән адамларыңкы билен дең болар өйдйәрлерми? Олар нәхили нәдогры нетиҗә гелйәрлер?»[2] диен аятыны окандыгыны ве онуң тә даңдана ченли рукуг[3] ве сеҗде эдип агландыгыны гөрдүм» дийди».
* * *
Месругың аялы шейле гүррүң берйәр: «Намазы көп окаяндыгы себәпли Месругың ики аягына ган үйшүп чишди. Мен онуң ызында отурып, оңа йүрегим авап аглардым».
* * *
Яхя ибн Абу Кесир шейле диййәр: «Кагп ёлда барярка, бир адамың сесини эшитди. Ол я Гурхан окап отырды, я дога-дилег эдйәрди. Оны диңледи. Соң хем: «Кыямат гүнүнден өңүрти өз халларына аглаянлар, гөр, нәхили багтлы» дийип, ёлуны довам этди».
* * *
Убейдылла ибн Абдылла шейле диййәр: «Абдылла гөзлер юмуланда, ягны халк ука гиденде турярды ве тә даңдана ченли онуң сеси бал арыларыңкы ялы болуп эшидилйәрди, ягны аглаярды».
* * *
Абул-Ахвас шейле диййәр: «Бир гезек насраны[4] бир адам мусулманларың яшаян чадырларының янына етенде, ол ерден арыларың выззылдысы ялы сес эшитди. Мусулманлар ыбадатдадылар. Насраны: «Булар нәмеден горкярларка?» дийди. Соң болса, ол насранылары гөз өңүнде тутуп: «Олар нәмеден аркайын болярларка?» дийди».
* * *
Авн ибн Абдылла шейле диййәр: «Аллатагала бир топар адамы җеннете салар. Олара хайыр-ыхсан эдер. Олар хем хемметараплайын леззет гөрерлер. Йөне олардан хем белент дереҗелерде боланлар бардыр. Булар олара середип, олары танап: «Эй, Первердигәримиз! Олар бизиң достларымыз. Биз олар билен биледик. Нәме үчин олара бизден хас улы дереҗе бердиң?» дийип сорарлар. Онда Аллатагала шейле диер: «Хейхат, хейхат! Олар сиз док махалыңыз ачлык чекйәрдилер. Сиз сувдан ганян махалыңыз олар сува тешнедилер, сиз уклап ятыркаңыз олар намаз окаярдылар, сиз отыркаңыз олар рукугда дурдулар».
* * *
Абул-Мутевеккил Наҗы шейле диййәр: «Пыгамбер алайхыссалам шейле дийди: «Җеннетдәки бир дереҗәниң бейлекисинден тапавуды, ер билен гөгүң тапавуды ялыдыр. Гул җеннетде өзүнден ёкарда болан бир нур гөрер. Ол муңа хайран галып:
— Бу нәме? — дийип сорар.
Оңа:
— Бу доганың нурудыр — диерлер.
Ол хем:
— Пылан доганыммы? Биз дүнйәде онуң билен билеликде амал эдердик. Нәме үчин ол менден артыкмач эдилди? — дийип сорар.
Оңа:
— Ол сенден амал тайдан хас артыкды — дийип, җогап берлер. Соң онуң хем разы болмагы үчин онуң калбына разычылык салнар».
* * *
Хузейфа ибн Еман пыгамбер алайхыссалам билен гиҗе намазына дурды. Намаза башланларында пыгамберимиз: «Аллаху экбер, зул-мелекути вел-җеберути вел-кибрийәи вел-азамети»[5] дийди. Соң «Бакара» сүресини окады. Рукуг этди. Рукугда хем нәче окан болса шонча дурды. Ол рукугда: «Субхане раббиел-азым»[6] дийип гайталады. Соң келлесини галдырып, дик дурды. Рукугының мукдары ялы хем дик дурды. Ол: «Лираббиел-хамд, лираббиел-хамд»[7] дийип гайталады. Соң сеҗде этди. Сеҗдеси хем дик дуршуның мукдары ялы болды. Ол сеҗдеде: «Субхане раббиел-эглә»[8] дийип гайталады. Соң келлесини галдырды. Ики сеҗдесиниң арасының мукдар хем сеҗдеси ялы болды. Ол: «Раббигфирли, раббигфирли»[9] дийип гайталады. Соң ол «Бакара», «Әли Ымран», «Ниса», «Маиде» (я-да «Энгам»)[10] сүрелерини окады».
Мүбәрегиң халыпасы Шугбе: «Маидеми, Энгаммы хайсы сүредигини билмейәрин» дийип, икирҗеңленйәнини мәлим этди[11].
* * *
Хасан Басры шейле диййәр: «Пыгамбер алайхыссалам говы дынч алан ягдайда нурана йүз билен говы гөрнүшде сәхере чыкярды. Кәбирлери болса (Алла говы билйәндир) гөзлери укулы ве бетсыпат гөрнүшде сәхере чыкярды».
* * *
Езит Раккашы шейле диййәр: «Ресулалланың намазы өң өлчелип гойлан ялы дүзгүн-тертипли ягдайдады».
* * *
Абул-Мүтевеккил Наҗы шейле диййәр: «Ресулалла бир гезек бүтин гиҗәни бир аяты гайталап, намазда дик дуруп гечирди».
* * *
Ысхак ибн Абдылла ибн Абу Талха шейле диййәр: «Бир гезек бир адам: «Мен Ресулалланың гиҗе намазыны окайшыны сынлаҗак» дийди. Соң ол адам шейле гүррүң берди: «Пыгамберимиз яссы намазыны окады. Соң аз-овлак дынч алды. Соң туруп, хаҗатларыны битирди ве өй гошларының дуран ерине гелди. Дишлерини мисваклады[12] ве тәрет кылды. Җаным гудрат элинде болан Алладан ант ичйәрин[13]. Гиҗәниң көпүси гечдими я-да ондан аз, билмейәрин, ол эп-эсли вагтлап рукугда дурды. Укы даг мысалы мени басмарлады».
* * *
Рабыга ибн Кагп Эслеми шейле диййәр: «Мен пыгамбер алайхыссаламың отагының янында ятып, онуң окаян затларыны эшидйәрдим. Ол гиҗе намазына туранда, узак вагтлап «Субханаллахи Раббил-алемин»[14] дийип гайталады. Соңра узак вагтлап «Субханаллахи ве бихамдихи»[15] дийип гайталады»[16].
* * *
Мугыра ибн Шугба шейле диййәр: «Ресулалла бир гезек рукугда шейле көп дурды велин, ики аягына ган үйшүп, чишди. Оңа: «Эй, Алланың илчиси! Алла сениң гечен ве гелҗек әхли гүнәлериңи багышлады ахыры» дийдилер. Онда ол: «Эйсем, мен шүкүр эдиҗи гул болмайынмы?» дийди».
* * *
Мутаррыф какасындан шейле гүррүң берйәр: «Намаз окап отырка пыгамберимизиң янына гелдим. Онуң ичинден гайнаян газаның сеси ялы бир сес гелйәрди, ягны ол аглаярды».
* * *
Абдылла ибн Месгут шейле диййәр: «Ресулалла маңа: «Гурхан окап бер» дийди. Мен хем: «Гурхан сиз үчин иберилди ахыры, мен нәдип оны сизе окап берейин» дийдим. Онда Ресулалла: «Мен оны башгалардан диңлемеги халаярын» дийди. Мен «Ниса» сүресини окап башладым. Хачанда: «Хер ымматдан бир шаят, сени хем бу ыммата шаят хөкмүнде гетиренимизде нәхили болар?»[17] аятына етенимде, онуң ики гөзлеринден яш акяндыгыны гөрдүм ве ол маңа: «Боляр, бес эдәй» дийди».
* * *
Халыт ибн Есар шейле диййәр: «Гулуң эҗесиниң оглы (ягны Абдылла ибн Месгут) «Ниса» сүресини оканда пыгамбер алайхыссалам аглады, онуң агламасы гүйчленди. Соң келлесине бир зат өртүп, өйүне гирди».
* * *
Езит ибн Эсам шейле диййәр: «Ресулалланың намазда палландыгы хич гөрлен зат дәлдир».
* * *
Тавус шейле диййәр: «Ресулалла шейле дийди: «Эзиз ве Җелил[18] Аллатагаладан горкян адамың окан Гурханындан башга хич бир зат леззет бериҗи болуп эшидилмез».
* * *
Зухры шейле диййәр: «Бизе Ресулалланың шейле диендиги гелип етди: «Гурханы иң якымлы сес билен окаян адам, сесини эшидениңде онуң Эзиз ве Җелил Аллатагаладан горкяндыгы белли болян адамдыр».
* * *
Ибн Омар шейле диййәр: «Пыгамбер алайхыссаламдан Гурхан окамакда адамларың иң ягшысы барада соралды. Онда ол: «Гурхан окайшыны эшидениңде онуң Эзиз ве Җелил Алладан горкяндыгы белли болан адамдыр» дийди».
* * *
Мухаммет ибн Кагп Куразы шейле диййәр: «Пыгамбериң Гурхан окайшы харплап, хетҗикләп окаян ялы юваш-юваш гөрнүшдеди».
* * *
Ягла ибн Мумеллек шейле диййәр: «Энемиз Үмми Селеме пыгамберимизиң Гурхан окайшыны гүррүң берди. Ол онуң харплап, дүшнүкли окаяндыгыны айдярды».
* * *
Хеким ибн Умейр шейле диййәр: «Пыгамбер алайхыссалам шейле дийди: «Киме хайыр гапысы ачылан болса, оны багтыяр пурсат хасапласын, ондан пейдалансын. Себәби ол онуң хачан япылҗакдыгыны билмез».
* * *
Абдылла ибн Месгут шейле диййәр: «Сересап болуң, сизи гиҗесине-хә маслык ялы ятян, гүндизине хем ялдыравук томзак[19] ялы гөрмәйин».
* * *
Суфян Сөври бизе Сүлеймандан шейле гүррүң берйәр: «Абдылла ибн Месгут намаза дуран вагты, гөйә бир тарапда гойлан эшик ялы гымылдаман дурарды».
* * *
Абу Убейда шейле диййәр: «Абдылла ибн Месгут намаза дуран вагты ашак бакарды, сесини чыкармазды, элини хем гымылдатмазды».
* * *
Давут ибн Абу Салых шейле диййәр: «Ким намазында окаян задына үнс берсе, онуң окан задына әхмиет берлер. Ким окаян задандан дашлашса, намаз хем ондан дашлашар».
* * *
Кагп ибн Мәлик шейле диййәр: «Гул туруп, намазына йөнелсе, Эзиз ве Җелил Алла хем оңа йөнелер. Эгер гул намазындан йүз өвүрсе, Алла хем ондан йүз өврер».
[1] Мынапык – икийүзли.
[2] Гурханың 45-нҗи («Җасие») сүресиниң 20-нҗи аяты.
[3] Рукуг – намазда эглип дурмак.
[4] Насраны - христиан, исайы.
[5] Манысы: «Алла өрән бейикдир, ол улулык, хөкүмдарлык, бейиклик ве белентлик эесидир».
[6] Манысы: «Белент болан Реббим пәкдир, бейикдир».
[7] Манысы: «Хамд Реббим үчиндир».
[8] Манысы: «Бейик болан Реббим пәкдир».
[9] Манысы: «Эй, Реббим мени багышла».
[10] Гурханың 2-6-нҗы сүрелериниң атлары.
[11] Бу ерде пыгамберимизиң гиҗе намазыны узын ве җайлы эдип окандыгы айдыляр.
[12] Мисвак - якымлы ыслы агач. Онуң шахасындан диш чотгасыны ясаярлар.
[13] Бу ант ичмәниң бир гөрнүшидир. Бу хили ант ичме хадысларда көп душ гелйәр.
[14] Манысы: «Әлемлериң Ребби болан Алла пәкдир».
[15] Манысы: «Алла ве онуң хамды пәкдир».
[16] Бу ерде хем пыгамберимизиң гиҗе ыбадатында айдан дога-дилеглери ныгталяр.
[17] Гурханың 4-нҗи («Ниса») сүресиниң 41-нҗи аяты.
[18] Эзиз ве Җелил – манысы «Ыззатлы ве бейик» диймек.
[19] «Томзак ялы хич дынч алман дүнйә үчин ылгаян ягдайда гөрмәйин» диен маныда.