ЫЛМЫҢ ГӨТЕРИЛМЕГИ ХАКДА
Абдылла ибн Месгут шейле диййәр: «Ылым Мухаммедиң сахабаларының ве онуң ымматының алымлары тарапындан өвредилип дурулса, адамлар хайырда болмагы довам эдерлер.
Ылым олара Мухаммет ымматының кичилери, ягны бедгатчылар[1] тарапындан гелен махалы, ине, бу оларың хеләк болҗак вагтыдыр!».
* * *
Абдылла ибн Амр ибн Ас шейле диййәр: «Ресулалла айтды: «Аллатагала ынсанлардан ылмы ызына алмаз. Ол алымлары ёк этмек билен ылмы гөтерер. Хатда екеҗе алым хем галмаз. Ынсанлар наданлары ымам сайларлар. Олардан сораг сорарлар. Олар хем ылымсыз хөкүм берерлер, хем өзлери азарлар, хем бейлекилери аздырарлар.
* * *
Ибн Шыхап Зухры шейле диййәр: «Алымлар өңлер шейле диердилер: «Сүннет[2] ёлы билен йөремек халас болуш ёлудыр. Ылым тиз гөтерилер. Диниң яшамагы ве дүнйәниң дурмагы ылмың өвренилип, бейгелдилмеги билен амала ашар. Ылмың гитмеги билен дин хем гидер».
* * *
Авн ибн Абдылла какасындан роваят эдйәр: «Өңлер «Сөзүң чылшырымлылыгындан даш дуруң!» дийлерди».
* * *
Энес ибн Мәлик пыгамбер алайхыссаламдан шейле роваят эдйәр: «Маграҗа чыкарылан гиҗәм,[3] додаклары гайчы билен кесилен адамлары гөрдүм. Җебрайыл перишдеден:
— Эй, Җебрайыл, булар кимлер? — дийип сорадым.
Ол хем:
— Сениң ымматыңдан китап окап, адамлара ягшылыгы үндәп, өзлерини унудан хатыплардыр.[4] Хей олар, пикир этҗек дәллермикә? — дийди».
* * *
Җерир ибн Хазым шейле диййәр: «Абдылла ибн Месгут адамларың бир зат өвренмәге мешгулдыкларыны гөрүп, Харыс ибн Кайсдан:
— Эй, Харыс! Булар амал этмек үчин өвренйәндир өйдйәрмисиңиз? — дийип сорады.
Харыс:
— Ёк, бейле пикир этмейәрин. Олар ылмы өвренип, соң терк эдерлер өйдүп пикир эдйәрин» — дийди.
Онда Ибн Месгут:
— Алланың адындан ант ичйәрин, сен ялңыш айтмаярсың — дийди».
* * *
Хасан Басры шейле диййәр: «Ресулалла шейле дийди: «Бу ыммат оларың Гурхан окаянлары ёлбашчылара мейил этмесе, салыхлары гүнәкәрлери «сиз тәмиз» дийип акламаса, хайырлы кишилери гүнәкәрлери батыл пикирлере элтмесе, Алланың хемаятының ве элиниң[5] ашагындадыр. Йөне булары ерине етирен махаллары Алла элини олардан айрар ве оларың үстүне залымлары мусаллат эдер. Олар хем олара эрбет азабы дадырарлар ве Алла хем олары мәтәчлик ве гарыплык билен урар. Калпларыны горкы билен долдурар».
* * *
Абул-Бухтери шейле диййәр: «Селман бир абслы[6] билен ёлдаш болды. Ёлда ол адам Диҗле дерясындан[7] сув ичди. Селман оңа:
— Өврүл, ене-де ич — дийди.
Ол адам:
— Мен ганянчам ичдим — дийди.
Селман:
— Бу ичишиң билен ондан бир зат кемелер өйдйәрмиң? — дийип сорады.
Онда ол:
— Ёк, иченим хич зады кемелтмез — дийди.
Селман хем:
— Ылым хем шейле. Ол хем кемелмез. Оңа табын бол я-да саңа ылымдан пейда берене талып бол! — дийди.
Олар ахыры бир хармана етдилер. Гөрселер, бир дайхан бугдай совуряр экен. Селман:
— Эй, абслы доган! Бу ныгматлары сизе рысгал хөкмүнде берен эгер ислеседи, Мухаммет алейхыссалам дирикә, оны ер йүзүниң хазыналарына эе эдерди. Эмма олар янларында иер ялы затдан бир бугдай болмаса хем, гиҗәни гечирип, сәхере чыкардылар — дийди.
Селман Аллатагаланың Җелулада[8] мусулманлара берен еңшини хем ятлады. Соң шейле дийди:
— Эй, абслы доган! Муны сизе басып алан ве сизе мүлк хөкмүнде берен эгер ислеседи, Мухаммеде дирикә онуң хазыналарына эе эдерди. Шейле болса хем, олар янларында бир динар я-да дирхем болмаса-да, олар гиҗәни ве гүндизи гечирердилер».
* * *
Абдылла ибн Мүбәрек шейле диййәр: «Мен Магмерден «Биз хикмети оңа хениз ол яш вагты бердик»[9] аяты хакда сорадым. Онда ол: «Мениң эшидишиме гөрә, чагалар Зекерияның оглы Яхяны чагырып:
— Яхя, ханы гел, бизиң билен ойна! — дийипдирлер.
Онда ол:
— Мен оюн үчин ярадылмадым — дийип җогап берипдир».
* * *
Абдырахман ибн Мугавыя ибн Худейч шейле хабар берйәр: «Бир адам Ресулалладан:
— Эй, Алланың илчиси! Маңа харам эдилен затлардан нәме халал болар? — дийип сорады.
Ресулалла онуң бу сорагына җогап бермән дымды. Ол адам үч гезек гайталады. Үчүсинде хем пыгамберимиз дымды. Ахыры:
— Сорагы берен ким? — дийди.
Онда ол адам:
— Мен, эй, Алланың илчиси! — дийди.
Онда пыгамберимиз ики бармагы билен ере уруп:
— Калбың нәмәни инкәр эдйән болса, оны ташла — дийди».
* * *
Абу Умама шейле диййәр: «Бир адам пыгамберимизден:
— Гүнә нәме? — дийип сорады.
Онда пыгамберимиз:
— Ичиңи быҗыкладян ве быҗыкламакда аша гидйән зады ташла! — дийди.
Соң ол адам:
— Иман нәме? — дийип сорады.
Онда пыгамберимиз:
— Эрбетлигиң сени биынҗалык эдип, ягшылыгың бегендирйән болса, сен иманлысың! — дийди.
* * *
Фудала ибн Убейт шейле диййәр: «Ресулалла хошлашык хаҗында[10] шейле дийди: «Сизе мөминиң кимдигини хабар берейинми? Мөмин адамларың мал-мүлклери ве җанлары үчин аркайын болан кишилеридир. Мусулман — элинден ве дилинден мусулманларың саламатлыкда болмагыны ислейән кишилеридир. Муҗахыт[11] — Алла тагат ёлунда небси билен гөрешйән кишидир. Мухаҗыр[12] — гүнәлерден ве ялңышлардан даш дурян кишидир».
* * *
Энес ибн Мәлик пыгамберимизден шейле роваят эдйәр: «Өзүнде шу үч зат бар болан киши иманың леззетини алар:
1. Бир кишини өз бәхбиди үчин дәл-де, онуң Алланың ёлундадыгы үчин сөййән.
2. Алланы ве ресулыны хеммелерден ичгин сөййән.
3. Аллатагала догры ёлы гөркезенсоң, күпре дөнмекден ода атылмагы говы гөрен киши».
[1] Бедгат – дине тәзелик гиризмек, динде ёк зады ойлап тапмак.
[2] Сүннет – пыгамбериң ёлы.
[3] Мыграч гиҗеси – Мухаммет алайхыссаламың Аллатагала тарапындан асмана чыкарылып, җеннете ве довзаха сейр этдирилен гиҗеси.
[4] Хатып – вагызчы, үндевчи.
[5] Бу ерде гөчме маныда болуп, эл гудрат манысындадыр.
[6] Абслылар – бир арап тайпасының ады.
[7] Диҗле дерясы – Ыракда бир деря.
[8] Җелула – бир шәхериң ады.
[9] Гурханың 19-нҗы («Меръем») сүресиниң 12-нҗи аяты.
[10] Хошлашык хаҗы – пыгамберимизиң иң соңкы гезек эден хаҗ зыяраты.
[11] Муҗахыт – гайратлы, ыхласлы.
[12] Мухаҗыр – гөчен, башга ере гөчүп гиден.